ޓެކްސީތަކަށް ރީތި ޑިޒައިނެއް ކަޑައެޅުމަށް މަޝްވަރާ ކުރަނީ
13 މެއި 2019 | ހޯމަ 07:48ޓެކްސީ ޑްރައިވަރުންނާއި އާންމުންނާ މަޝްވަރާ ކުރާނެ
ޓެކްސީތަކެއް
ރާއްޖޭގައި ދުއްވާ ޓެކްސީތަކަށް ރީތި ޑިޒައިނެއް ކަނޑައެޅުމަށް މަޝްވަރާތައް ކުރަމުން އަންނަ ކަމަށް ޓްރާންސްޕޯޓް މިނިސްޓްރީގެ ސްޓޭޓް މިނިސްޓަރ އަހުމަދު އާދިލް ވިދާޅުވެއްޖެއެވެ.
އާދިލް ވިދާޅުވީ ރާއްޖެއަކީ ޓޫރިސްޓުން ގިނަ އަދަދަކަށް އަންނަ ގައުމަކަށް ވާތީ ޓެކްސީތައް ވެސް ނަލަ ކުރުމުގެ މަޝްވަރާތައް އެމިނިސްޓްރީން ކުރަމުން ގެންދާ ކަމަށެވެ.
އެކަމުގެ މަޝްވަރާތަކުގައި ޓެކްސީ ޑްރައިވަރުންނާއި އާންމުންނާ މަޝްވަރާ ކުރައްވާނެ ކަމަށް ވެސް އޭނާ ވިދާޅުވިއެވެ.
"އަޅުގަނޑުމެން މަޝަވަރާ ކުރީ ރާއްޖެއާ ގުޅޭ ރީތި ޑިޒައިނަކަށް ޓެކްސީތައް ބަދަލުކުރަން. މިހާރު ހުރި މޮޑިއުލްތައް. މިސާލަކަށް ޔުނީފޯމެއް ނުވަތަ ޓެކްސީތަކުގައި އެއްކުލައެއް ލުން ކަހަލަ، އެކަމަކު އަދި ވަކި ގޮތަކަށް ނުނިންމަން،" އާދިލް ވިދާޅުވިއެވެ.
ޓެކްސީތަކަށް ގެންނަން މަޝްވަރާ ކުރި ކަންތައްތައް މި މަހުގެ ތެރޭގައި ޓެކްސީ ޑްރައިވަރުންނާ މަޝްވަރާކޮށް ޚިޔާލު ހޯއްދަވާނެ ކަމަށް އޭނާ ވިދާޅުވިއެވެ.
މީގެ އިތުރުން އާދިލް ވިދާޅުވީ ދުވަސްވެފައިވާ ޓެކްސީތައް ބަދަލުކުރުމަށް މަޝްވަރާ ކޮށްފައިވާ ކަމަށާއި އެކަމަށް އަދި ގޮތެއް މިނިސްޓްރީން ނުނިންމާ ކަމަށެވެ. އެ މީހުންނަށް ޓެކްސީ ބަދަލު ކުރުމަށް އަހަރެއްހާ ދުވަސް ދެއްވާނެ ކަމަށް އާދިލް ވިދާޅުވިއެވެ. އަދި 2016 ވަނަ އަހަރު ޓެކްސީ އާ ކުރުމަށް އެމިނިސްޓްރީން ކަނޑައެޅި ގޮތަށް ބޭންކުތަކުން ލޯނު ދޫކުރާނެ ކަމަށާއި އެ ކަމަށް ޓެކްސީ ގެންގުޅޭ ފަރާތްތަކަށް ލުއި ގޮތްތައް ހޯއްދަވައި ދެއްވާނެ ކަމަށް ވިދާޅުވިއެވެ.
