ހޫނު ގަދަވެ، ގާ ހުދުވުމުގެ ބިރާ އެކު ފަޅުފުންކުރުމާއި، ބިން ހިއްކުން މަޑުޖައްސާލުމަށް އެދިއްޖެ
13 މެއި 2019 | ހޯމަ 07:39ރާއްޖެ މި ވަގުތު އޮތީ [ވޮޗް] ލެވެލް (ދެވަނަ ގިންތި) ގައި
ރާއްޖޭގެ ރަށެއްގެ ފަޅުމަތި
ކަނޑުތަކުގެ ހޫނުމިން މަތިވެ، ފަރުތަކުން ގާހުދުވުމުގެ ބިރާ އެކު، ފަޅުފުންކުރުމާއި، ބިން ހިއްކުން ވަގުތީ ގޮތުން މަޑުޖައްސާލުމަށް މެރިން ރިސާރޗް ސެންޓަރުން އެދިއްޖެ އެވެ.
މިނިސްޓްރީ އޮފް ފިޝަރީޒް، މެރިން ރިސޯސަސް އެންޑް އެގްރިކަލްޗަރގެ ދަށުން ހިންގަމުންދާ މެރިން ރިސާރޗް ސެންޓަރުން އާންމުކުރި ނޫސްބަޔާނެއްގައި ބުނީ، މި ދުވަސްވަރަކީ ކަނޑުތަކުގެ ލޮނުގަނޑުގެ ހޫނުމިން މަތިވުމުގެ ސަބަބުން ފަރުތަކުން ގާހުދުވުމަށް މަގުފަހިވާ ދުވަސްވަރެއް ކަމަށެވެ. އެގޮތުން ދުނިޔޭގެ ކަނޑުތަކުގެ ފިނި ހޫނުމިން ބެލުމަށް، އަދި، ކަނޑުތަކުގެ ހޫނުމިން މަތިވުމުގެ ސަބަބުން ފަރުތަކުގެ ގާ ހުދުވުމުގެ ހާދިސާތައް ކުރިއާލައި ލަފާ ކުރުމަށް އެމެރިކާގެ ނޭޝަނަލް އޯޝިއޭނިކް އެންޑް އެޓްމޮސްފެރިކް އެޑްމިނިސްޓްރޭޝަން (ނޮއާ) އިން ހިންގާ [ނޭޝަނަލް އެންވަޔަރަންމެންޓަލް ސެޓަލައިޓް ޑޭޓާ އެންޑް އިންފޮރމޭޝަން ސަރވިސް] ޕްރޮގްރާމުގެ އެންމެ ފަހުގެ ސެޓަލައިޓް މައުލޫމާތަށް ބަލާއިރު ރާއްޖެ މިވަގުތު އޮތީ [ވޮޗް] ލެވެލް (ދެވަނަ ގިންތި) ގައި ނަމަވެސް، ކުރިއަށް އޮތް ހަފްތާތަކުގައި [ވޯނިންގ] ލެވެލް އަށް އަރާނެކަމަށް ލަފާ ކުރެވޭކަމަށެވެ. އަދި ރާއްޖޭގެ ދެކުނުގެ ބައެއް ސަރަހައްދުތަކުގައި [އެލާރޓް ލެވެލް 1] އަށް ފޯރުންވެސް އެކަށީގެންވާކަމަސް މެރިން ރިސާރޗް ސެންޓަރުން ބުންޏެވެ.
އެ ސެންޓަރުން ބުނީ، ދުނިޔޭގެ އެހެން ގައުމުތަކާ އަޅާބަލާ އިރު ރާއްޖޭގެ ފަރުތައް މިފަދަ ގާ ހުދުވުމުގެ ހާދިސާތަކަށް ފަހު އަލުން އިއާދަ ވާ މިންވަރު އަވަސްވި ނަމަވެސް، މިފަދަ ދުވަސްވަރެއްގައި ހިންގޭ އިންސާނީ ހަރަކާތްތަކުން ފަރުތަކަށް ކުރާ އަސަރުގެ ސަބަބުން ފަރުތައް އަލުން އިއާދަވާ މިންވަރު ލަސްވުން، އަދި އިއާދަވުމަށް ހުރަސް އެޅުން އެކަށީގެންވާ ކަމަށެވެ. އެގޮތުން ރާއްޖޭގައި ފުޅާ ދާއިރާއެއްގައި ކުރެވެމުންދާ ފަޅު ފުންކުރުމާއި ބިން ހިއްކުމުގެ މަސައްކަތްތަކާއި، ބީޗް ނަރިޝްމަންޓް މަސައްކަތްތަކަކީ، މި މަސައްކަތްތަކުގެ ސަބަބުން ފަރުތަކުގެ މާހައުލަށް ވަގުތީ ގޮތުން ނަމަވެސް ނޭދެވޭ އަސަރުތަކެއް ކުރަމުންދާ ކަންކަން ކަމަށް މެރިން ރިސާރޗް ސެންޓަރުން ބުންޏެވެ.
"ވީމާ، ކަނޑުތަކުގެ ހޫނުމިން މަތިވެ، ފަރުތަކުން ގާހުދުވުމުގެ ހާދިސާތައް ފޯކާސްޓްކޮށްފައިވާ މި ދުވަސްވަރުގައި، ފަރުތަކަށް ސްޓްރެސް ބޮޑުވާފަދަ އެންމެހައި މަސައްކަތްތައް (ފަޅުފުންކުރުމާއި، ބިންހިއްކުމާއި، ބީޗް ނަރިޝިންގފަދަ ކަންކަން) ވަގުތީގޮތުން މަޑުޖައްސާލުމަށް އިލްތިމާސް ކުރަމެވެ."
ދިވެހި ރައްޔިތުންގެ ދިރިއުޅުމާއި ސީދާ ގޮތުންނާއި ނުސީދާ ގޮތުން ފަރުތައް ގުޅި ލާމެހިފައިވާކަން ފާހަގަކޮށް މެރިން ރިސާރޗް ސެންޓަރުން ބުނީ ދުނިޔޭގެ ފިނިހޫނުމިން މަތިވުމާއި ގުޅިގެން މެދުވެރިވާ ހާދިސާތަކުގެ ސަބަބުން ފަރުތަކަށް ކުރާ އަސަރު ކުޑަކުރުމަށް ކުރެވެން އޮތް އެންމެހައި ކަމެއް ކުރުމަކީ ރާއްޖޭގެ ފަރުތަކުގެ ދެމެހެއްޓުމަށާއި، ފަރުތަކުގެ މައްޗަށް ބަރޯސާވާ ރާއްޖޭގެ އިޤްތިޞާދުގެ މައި ދެ ތަނބުކަމަށްވާ ފަތުރުވެރިކަމާއި މަސްވެރިކަމަށް ކޮށްފާނޭ ނޭދެވޭ އަސަރުތައް ކުޑަކުރުމަށްޓަކައި ނުހަނު މުހިންމު ކަމެއް ކަމަށެވެ.
ރާއްޖޭގެ ފަރުތަކުން ފުޅާދާއިރާއެއްގައި ގާ ހުދުވުމުގެ ހާދިސާއެއް އެންމެ ފުރަތަމަ ފަހަރަށް ފާހަގަކުރެވިފައިވަނީ 1998 ވަނަ އަހަރު އެވެ. އޭގެފަހުން އެފަދަ ހާދިސާތައް މެދުވެރިވާ މިންވަރު ގާތްވަމުން (ފްރީކްއެންސީ އިތުރުވަމުން) އަންނަކަމަށް މެރިން ރިސާރޗް ސެންޓަރުން ބުންޏެވެ.
