ޓެކްސީ މީޓަރުގެ ގޮތުގައި ބޭނުންކުރާ މޮބައިލް އެޕް ހެދުމަށް ޝައުގުވެރިވާ ފަރާތަތަކަށް އެ ފުރުސަތު އަންނަ ހަފްތާގައި ހުޅުވާލާނެ ކަމަށް ޓްރާންސްޕޯޓް މިނިސްޓްރީން ބުނެފިއެވެ. 

ޓްރާންސްޕޯޓް މިނިސްޓްރީގެ ސްޓޭޓް މިނިސްޓަރު އަހުމަދު އާދިލް ރާއްޖެއެމްވީ އަށް ވިދާޅުވީ އެޕަށް ބޭނުންވާނެ މައުލޫމާތު މި ހަފްތާ ތެރޭގައި ހާމަ ކުރައްވާނެ ކަމަށެވެ. އޭގައި ދަތުރު ޚަރަދުތައް އެނގޭނެ ގޮތާއި ކަސްޓަމަރުންނާއި ޑްރައިވަރުންނާއި އަދި އެމިނިސްޓްރީ އަށް ބޭނުންވާ މައުލޫމާތު ހުންނަން ޖެހޭނެ ކަމަށް އާދިލް ވިދާޅުވިއެވެ. 

"ދަތުރުގެ ޚަރަދު އެނގޭނެ ގޮތާއި ކަސްޓަމަރުންނަށް އަދި ޑްރައިވަރުންނަށް ޓްރާންސްޕޯޓަށް ބޭނުންވާނެ މައުލޫމާތު ހުންނަން ވާނެ،" އާދިލް ވިދާޅުވިއެވެ. 

މާލޭގައި އެކަނި ވެސް  1100 އަށް ވުރެ ގިނަ ޓެކްސީ ވަނީ ރެޖިސްޓްރީކޮށްފައެވެ.

މާލޭގައި ޓެކްސީ ދަތުރަކަށް ނަގަނީ 25ރ. އެވެ. ނަމަވެސް ސިނަމާލެ ބްރިޖް ހުރަސްކުރުމަށް އެކި ޓެކްސީތަކުން ނަގަމުން ދަނީ އެކި ވަރަށެވެ. އެ ގޮތުން އާންމު ގޮތެގައި ބްރިޖްގެ ދަތުރަކަށް 100ރ. ނަގައެވެ. 

އާދިލް ވިދާޅުވީ ޓެކްސީ މީޓަރުތަކުން ނަގާނެ އަގު މިހާރު އެމިނިސްޓްރީން ކަނޑައަޅާ ނިމިފައިވާ ކަމަށެވެ. މޮބައިލް އެޕް ތައާރަފް ކުރެވުމާ އެކު މިހާރު ޓެކްސީތަކަށް ދާ ޚަރަދަށް ވުރެ އަގުހެޔޮ ވާނެ ކަމަށް އޭނާ ވިދާޅުވިއެވެ. މޮބައިލް އެޕާ އެކު ޓެކްސީތަކަށް ފައިސާ ދޭން ޖެހޭނީ ދަތުރުގެ ދިގުމިނަށް ބަަލައިގެން ކަމަށް ޓްރާންސްޕޯޓް މިނިސްޓްރީން ބުނެއެވެ.