އާސާރީތަންތަން ރައްކާތެރި ކުރުމަށް މަޝްވަރާނުކޮށް އެފަދަ ތަންތަން ކޮނުމުން އިއާދަނުކުރެވޭނެ ވަރުގެ ގެއްލުމެއް ލިބިދާނެ: ހެރިޓޭޖު
11 މެއި 2019 | ހޮނިހިރު 12:35ބަލަހައްޓާނެ ގޮތުގެ ތަސައްވުރެއް ނެތި ކޮނުމަކީ ދެވޭ ގެއްލުމެއް
ބިލެއްދޫގައި ހުރި ވެވު
އާސާރީތަންތަން ރައްކާތެރި ކުރުމަށް ކަމާބެހޭ ފަރާތްތަކުގެ މަޝްވަރާއާއި ލަފާ ނުހޯދައި ތަންތަން ކޮނުމަކީ އެ ތަންތަނަށް އިއާދަނުކުރެވޭނެ ވަރުގެ ގެއްލުން ވެދާނެ ކަމެއް ކަމަށާއި، އެކަން އެގޮތަށް ނުކުރުމަށް ހެރިޓޭޖް މިނިސްޓްރީން އަންގައިފިއެވެ.
ފ. ބިލެއްދޫ ވެވު ކޮނުނު މައްސަލާގައި މިނިސްޓްރީން ނެރުނު ބަޔާނުގައި ބުނީ ބިލެއްދޫ ވެވު ކޮނުމުގެ މަސައްކަތް ކުރާކަން މިނިސްޓްރީއަށް އެނގިފައިވަނީ މީސްމީޑިޔާއިން ކަމަށާއި، ރަށު ކައުންސިލުން އެކަން އަންގަވާފައި ނުވާ ކަމަށެވެ.
ހެރިޓޭޖުން ބުނީ ކޮންނަމުންދާ ސަރަޙައްދަކީ ގެޒެޓު ކޮށްފައިވާ ދިވެހިރާއްޖޭގެ އާސާރީ ތަންތަނުގެ ދަފްތަރުގައި ހިމެނޭ ސަރަޙައްދެއް ކަމަށް މަޢުލޫމާތު ލިބުމާއެކު އެކަން މިނިސްޓްރީން ގެންދިޔައީ ކައިރިން ބަލަމުން ކަމަށާއި، އަދި މަސައްކަތް ހުއްޓަވާލެއްވުމަށް އެދި ކައުންސިލަށް ފޯނުންނާއި ލިޔުމުން ވާނީ އަންގާފައި ކަމަށެވެ.
ނަމަވެސް، ވެވު ކޮނުމުގެ މަސައްކަތް ކައުންސިލްގެ ފަރާތުން ކުރިއަށް ގޮންގޮސްފައިވާ ކަމަށާއި، މިފަދަ ތަންތަން ކޮނުމުގެ މަސައްކަތަކީ ވަކި އުޞޫލެއްގެ މަތިން ވަކި ހަމަތަކާ އެއްގޮތަށް ނުކޮށްފިނަމަ އިއާދަނުކުރެވޭނެވަރުގެ ގެއްލުން ލިބިދާނެ ކަމެއް ކަމަށް ހެރިޓޭޖުން ބުންޏެވެ.
ދިވެހިރާއްޖޭގެ އާސާރީ އަދި ތާރީޚީ ތަންތަނާއި ތަކެއްޗާއި ބެހޭ ޤާނޫނު އިން އާސާރީ ތަންތަން ހަލާކުކޮށް ރޫޅައި، އެފަދަ ތަންތަނާއި ތަކެއްޗަށް ގެއްލުން ދިނުމަކީ މަނާކަމެއްކަން ފާހަގަކޮށް ހެރިޓޭޖުން ބުނީ އެފަދަ ތަނެއް ރައްކާތެރިކުރެވޭނެ ގޮތްތަކެއް ނުހޯދައި، ބަލަހައްޓާނެ ގޮތުގެ ތަސައްވުރެއް ނެތި ކޮނުމަކީ ދެވޭ ގެއްލުމެއް ކަމަށެވެ. އަދި މިފަދަ ތަންތަން ކޮނުމަށް ބޭނުންކުރާ އާލަތްތައް ބޭނުންނުކޮށް ކޮނުމަކީ ކަނޑައެޅިގެން އާސާރީ އަދި ތާރީޚީ އެއްޗަކަށް ގެއްލުން ލިބިދާނެ ކަމެއް ކަމަށާއި، ތަޖުރިބާހުރި ދާއިރާގެ މީހުންގެ ބައިވެރިވުން ނެތި، ކަމާބެހޭ ފަރާތްތަކުގެ މަޝްވަރާއާއި ލަފާ ނުހޯދައި ތަންތަން ކޮނުމަކީ އެ ތަންތަނަށް އިއާދަނުކުރެވޭނެ ވަރުގެ ގެއްލުން ވެދާނެ ކަމެއް ކަމަށެވެ.
ހެރިޓޭޖުން ބުނީ ދެމެހެއްޓެނިވި ގޮތަކަށް ރައްކާތެރިކުރެވޭ ގޮތު ގެ މެނޭޖްމަންޓް ޕްލޭން ތައްޔާރުކޮށްގެން މެނުވީ މިފަދަ ތަންތަން ކޮނުމަކީ ރަނގަޅުގޮތެއް ނޫން ކަމަށެވެ.
މީގެ އިތުރުން ހެރިޓޭޖުން ބުނީ އެ ރަށެއްގައި ހުރި އާސާރީތަންތަން ރައްކާތެރި ކުރެވޭނީ އެ ރަ ށެއްގެ ރައްޔިތުންގެ ބައިވެރިވުމާއިއެކު ކަމަށާއި، އަންނާން އޮތް ޖީލުތަކަށް އެ ތަންތަން ގެންގޮސްދިނުމަކީ އެންމެންގެ ޒިންމާއެއް ކަމަށެވެ.
