ވިލާ އެއަރގެ ސީނިއަރ މުވައްޒިފަކު ގަވާއިދާއި ޚިލާފަށް ވަޒީފާއިން ވަކިކޮށްފައިވާ ކަމަށް ލޭބާރ ޕާޓީގެ ސެކެޓްރީ ޖެނެރަލް އަބްދުﷲ ހަސީން ވިދާޅުވެއްޖެ އެވެ.

ލޭބާރ ޕާޓީން ބޭއްވި ނޫސްވެރިންގެ ބައްދަލުވުމެއްގައި ވާހަކަދައްކަވަމުން ހަސީން ވިދާޅުވީ ވިލާ އެއަރގެ ސީނިއަރ މުވައްޒިފަކު ވަޒީފާގެ އެއްބަސްވުމާއި ޚިލާފަށް ވަޒީފާއިން ވަކިކޮށްފައިވާތީ، އެ މައްސަލަ ޓްރައިބިއުނަލް އަށް މިހާރު ހުށަހަޅާފައިވާ ކަމަށެވެ. ހަސީން ވިދާޅުވީ އަދި އިތުރު ދެ ފަރާތެއްގެ މައްސަލަ ޝަރީއަތަށް ހުށަހަޅާފައިވާ ކަމަށެވެ. އެ ފަރާތްތަކުގެ މައްސަލަތަކުގެ އަޑުއެހުންތައް މިހާރު ކުރިއަށްދާ ކަމަށް ހަސީން ވިދާޅުވިއެވެ.

ހަސީން ވިދާޅުވީ ބައެއް ކުންފުނިތަކުން އެ ކުންފުނިތަކުގެ މުވައްޒިފުންނަށް ރަމްޟާން މަހުގެ އިނާޔަތްނުދޭ ކަމަށެވެ. އެގޮތުން ވެމްކޯގެ އަންހެން މުވައްޒިފުންގެ ތެރެއިން ބައެއް މުވައްޒިފުންނަށް ރަމްޟާން މަހުގެ އިނާޔަތެއް ނުދޭ ކަމަށާއި، އެ މީހުންނަކީ ރޭގަނޑު ވަރަށް ދަންވަންދެން މަސައްކަތް ކުރަމުން އަންނަ ބައެއް ކަމަށް ހަސީން ވިދާޅުވިއެވެ.

"ވެމްކޯގައި މަސައްކަތް ކުރާ މުވައްޒިފުން އެހެން ކުންފުނިތަކުގައި މަސައްކަތް އެބަކުރޭ، އެ ކުންފުނިތަކުގެ ތެރެއިން ދެ ކުންފުންޏެއްގައި މަސައްކަތް ކުރާ މުވައްޒިފުން ކާރީގައި މި ބުނަނީ، މިސާލަކަށް ވެމްކޯއިން ބުނަނީ އެ މީހުންގެ ރަމްޟާން މަހުގެ އިނާޔަތް ދޭނީ މި ކުންފުނިންނެއް ނޫނޭ، އަނެއް ކުންފުނިންނޭ. އެ ކުންފުނިން މި ބުނަނީ، ދޭން ޖެހޭނީ ވެމްކޯއިންނޭ" ހަސީން ވިދާޅުވިއެވެ.

ދެ ކުންފުނިން ކުރެ އެއްވެސް ކުންފުންޏަކުން އެ މީހުންނަށް ރަމްޟާން މަހުގެ އިނާޔަތެއް ނުދޭ ކަމަށް ހަސީން ވިދާޅުވިއެވެ. ހަސީން ވިދާޅުވީ ދެ ކުންފުނީގައި ވަޒީފާ އަދާކުރާ ފަރާތްތަކަށް ރަމްޟާން މަހުގެ އިނާޔަތްދޭއިރު، ދޭނީ ކޮން ކުންފުންޏަކުންތޯ ބަލާކަށް ނުޖެހޭ ކަމަށާއި، އެ ބައެއްގެ މުވައްޒިފަކަށް ދޭން ޖެހޭ އިނާޔަތް ދިނުމަކީ އެ ކުންފުންޏެއްގެ ޒިންމާއެއް ކަމަށެވެ.

ގާނޫނީ އިމުން ބޭރުން ވަޒީފާދީފައިވާ ފަރާތުން މަސައްކަތް ތެރިންނާއި ދޭތެރޭ އަމަލުކުރާނަމަ، އެ ފަރާތްތަކުގެ ހައްގުތައް ހޯދައިދިނުމުގައި ކުރެވެން ހުރި ހުރިހާ މަސައްކަތެއް ގާނޫނީ އިމުގެ ތެރެއިން ލޭބާރ ޕާޓީން ކުރާނެ ކަމަށް ހަސީން ވިދާޅުވިއެވެ.

ލޭބާރ ޕާޓީއަކީ މަސައްކަތްތެރިންގެ ހައްގުގައި މަސައްކަތް ކުރާ ސިޔާސީ ޕާޓީއެކެވެ.