އަންގާރަ ދުވަހުގެ ރޭ އަލިފާން ރޯވި މޫކައި ސުއިޓްސް އަލުން ހުޅުވަން ހަފްތާއެއްހާ ދުވަސް ނަގާނެ ކަމަށް އެ ތަނުން ބުނެފިއެވެ.
މޫކައި ސުއިޓްސްގެ އޮފިޝަލަކު ރާއްޖެއެމްވީއަށް ވިދާޅުވީ އެ ހޮޓެލްގައި ދިމާވި އަލިފާނުގެ ހާދިސާއާ ގުޅިގެން އެތަނަށް ކަރަންޓް ދިނުމުގެ މަސައްކަތް ކުރަމުން އަންނަ ކަމަށެވެ.
"ހޮޓެލްގައި އަލިފާނުގެ ހާދިސާއާ ގުޅިގެން ބަންދުކުރީ. އަލުން ހުޅުވަން ހަފްތާއެއްހާ ދުވަސް ނަގާނެ" އޭނާ ވިދާޅުވިއެވެ.
އަލިފާނުގެ ހާދިސާއާ ގުޅިގެން އެ އިމާރާތުގައި ހިންގާ އޮފީސްތައް ވެސް ވަނީ ބަންދު ކޮށްފައެވެ. އޭގެ ތެރޭގައި ހައްޖު ކޯޕަރޭޝަނާއި އެންސްޕާ ހިމެނެއެވެ. އެ އޮފީސްތަކުގެ ޚިދުމަތް ވެސް ދެވޭނީ އެ އިމާރާތައް ކަރަންޓް ދެވިގެން ކަމަށް އޮފިޝަލް ވިދާޅުވިއެވެ.
އަލިފާނުގެ ހާދިސާއާ ގުޅިގެން އިމާރާތުން ދުން އަރާތީ އެ ހޮޓެލްގައި ތިބި ހުރިހާ މީހުން ވަނީ އަންގާރަ ދުވަހުގެ ރޭ ހުސްކޮށްފައެވެ.
އެމްއެންޑީއެފުން ބުނީ އަލިފާން ރޯވީ ފުރަތަމަ ފަންގިފިލާގައި ހުރި ކޭބަލްތަކެއްގައި ކަމަށެވެ.
ހާދިސާ ހިނގިތާ ގާތްގަނޑަކަށް އެއް ގަޑިއިރު ފަހުން ދުން އެރުން ވަނީ ހުއްޓިފައެވެ. ފުލުހުން ބުނީ މި ހާދިސާގައި އެއްވެސް މީހަކަށް ގެއްލުން ނުވާ ކަމަށެވެ.
