މަޖިލީހުގެ ރައީސް ކަމަށް، މެމްބަރުން ބޭނުންވާ މީހަކަށް ވޯޓު ދެވޭނެ: ޕީއެންސީ ޕީޖީ ލީޑަރު
މަޖިލީހުގައި ޕީއެންސީގެ މަސައްކަތް ތަފާތުވާނެ ކަމަށް ވިދާޅުވި
ޕާލެމެންޓްރީ ގްރޫޕް ލީޑަރު އާދަމް ޝަރީފް
މަޖިލީހުގެ ރައީސް ނުވަތަ ނައިބު ރައީސްގެ މަގާމަށް ވޯޓު ދޭނީ ކޮން ބޭފުޅަކަށްތޯ ޕީއެންސީން ނުނިންމާ ކަމަށާއި، ކޮންމެ މެމްބަރަކަށް އެ މެމްބަރަކު ބޭނުންވާ މީހަކަށް ވޯޓު ދިނުމުގެ އިހްތިޔާރު ލިބިގެންވާ ކަމަށް ޕީއެންސީގެ ޕާލެމެންޓްރީ ގްރޫޕްގެ ލީޑަރު އާދަމް ޝަރީފް ވިދާޅުވެއްޖެއެވެ.
ރާއްޖެއެމްވީއާ ވާހަކަ ދައްކަވަމުން ޝަރީފް ވިދާޅުވީ، މަޖިލީހުގެ ރައީސް ކަމަށް އަންނަ ބޭފުޅަކީ ދިވެހިރާއްޖެ ރަނގަޅަށް އެނގިވަޑައިގަންނަވަން ޖެހޭ ބޭފުޅަކަށް ވާން ޖެހޭ ކަމަށާއި، އެ މީހަކީ ރައްޔިތުންގެ ފިކުރާ އެއްގޮތަށް މަޖިލީހުގައި މަސައްކަތް ކުރައްވަން ޖެހޭ ބޭފުޅަކަށް ވާން ޖެހޭ ކަމަށެވެ.
މަޖިލީހުގެ ގާނޫނު އަސާސީ އާއި އިމްތިޔާޒުތަކާ އެއްގޮތަށް މަޖިލީސް ހިންގާ މީހަކަށް އެ މީހަކު ވާން ޖެހޭނެ ކަމަށް ވިދާޅުވިއެވެ.
މަޖިލީހުގެ ރައީސް ކަމަށް އޭނާ ތާއިދު ކުރައްވަނީ ކޮން ބޭފުޅަކަށްތޯ ސުވާލު ކުރުމުން އޭނާ ވިދާޅުވީ، ރައީސް ކަމަށް ގާބިލް ބޭފުޅުން އެބަތިއްބެވި ކަމަށެވެ. ނަމަވެސް އެއީ ކޮން ބޭފުޅުން ކަމެއް ވިދާޅެއް ނުވެއެވެ.
ނަވާރަ ވަނަ މަޖީލީހުގެ މަޑުއްވަރީ ދާއިރާ އަށް އިންތިހާބު ވެވަޑައިގަތް ކުރީގެ ޑިފެންސް މިނިސްޓަރު ޝަރީފް ވިދާޅުވީ، ޕީއެންސީގެ މަސައްކަތް މަޖިލީހުގައި ފެނިގެންދާނީ ތަފާތު ގޮތަކަށް ކަމަށެވެ. އިދިކޮޅު ސިޔާސީ ޕާޓީއެއްގެ ގޮތުގައި ތިބި ކަމަށް ވިޔަސް އެ ޕާޓީގެ ފަރާތުން ނާތަހުޒީބު އަމަލުތަކެއް ނުފެންނާނެ ކަމަށް އޭނާ ވިދާޅުވިއެވެ. ކުރިއަށް އޮތް މަޖިލީހުގައި ޕީއެންސީ ތަމްސީލްކުރައްވާނީ ތިން މެންބަރުންނެވެ. ޕީއެންސީ ކޯލީޝަންގައި ހިމެނޭ ޕީޕީއެމްގެ ފަސް މެންބަރުންނާ އެކު ކޮންގްރެސް ކޯލީޝަންގައި ތިއްބަވާނީ އަށް މެންބަރުންނެވެ.
''އަޅުގަނޑުމެން ބޮޑަށް މަސައްކަތް ކުރާނީ، މަޖިލީހުގެ ތަޅުމުގެ ތެރޭގައި ވެސް އަދި އެކި ކޮމިޓީތަކުގައި ވެސް އަޅުގަނޑުމެން މަސައްކަތް ކުރާނީ. މުޅި ގައުމުގެ މަސްލަހަތާއި އަދި ކަންކަމުގައި އަޅުގަނޑުމެންނަށް ފެންނަ ގޮތް ހާމަކޮށްދިނުމަށް،'' ކުރީގެ ޑިފެންސް މިނިސްޓަރު ކަން ކުރައްވާފައިވާ ޝަރީފް ވިދާޅުވިއެވެ.
ނިމިގެން ދިޔަ އާއްމު އިންތިހާބުގައި ސަރުކާރުގެ މައި ޕާޓީ އެމްޑީޕީ އަށް މަޖިލީހުގެ މެޖޯރިޓީ ލިބުނު ހިސާބުން މަޖިލީހުގެ ރައީސް ކަމަށް އަންނާނީ ކޮން ބޭފުޅަކާ މެދު ކުރެވޭ މަޝްވަރާތައް ވަނީ ފެށިފައެވެ. އަދި ރައީސް ކަމާއި ނައިބު ރައީސް ކަމަށް ގިނަ މެމްބަރުންތަކެއް ވަނީ ޝައުގުވެރިކަން ފާޅުކޮށްފައެވެ. އެމްޑީޕީން މަޖިލީހުގެ ރައީސް ކަމަށް ގެންނަ ބޭފުޅަކުގެ ވޯޓު ނަގާނެ ގޮތަކާ މެދު އެ ޕާޓީގެ ބެއެއް މެމްބަރުންގެ ތެރޭވަނީ ހިޔާލު ތަފާތުވުން އުފެދިފައެވެ. އެ ދެ މަގާމަށް ގިނަ ބަޔަކު ވަނީ ޝައުގުވެރިކަން ފާޅުކޮށްފައެވެ.
