ޖިންސީ ފުރައްސާރައިގެ ތުހުމަތުތަކުން އިސް ފަނޑިޔާރު ސަލާމަތްވުމުން އިންޑިއާގައި މުޒާހަރާ

އިންޑިއާގެ އެންމެ އިސް ފަނޑިޔާރު, ރަންޖަން ގޯގޮއިގެ މައްޗަށް އެ ކޯޓުގެ ކުރީގެ މުވައްޒަފަކު ކުރި ޖިންސީ ގޯނާގެ ތުހުމަތުތަކުން އެމަނިކުފާނު ސަލާމަތްވެ ވަޑައިގަތުމުން އެކަމާ ދެކޮޅަށް އެގައުމުގެ ސުޕްރީމް ކޯޓުގެ ދޮރުމަތީގައި މުޒާހަރާކުރި މީހުންގެ ތެރެއިން 50 އަންހެނަކު އެ ގައުމުގެ ފުލުހުން ހައްޔަރު ކޮށްފިއެވެ.

ވެރިރަށް ދިއްލީގައި ހުންނަ ކޯޓުގެ ބޭރަށް ޖަމާވި އެކްޓިވިސްޓުން ޑިމާންޑް ކުރަމުން ދިޔައީ ތުހުމަތު ތަކާމެދު އިންސާފުވެރި ތަހުގީގެއް ހިންގުމަށެވެ.

އިސް ފަނޑިޔާރު، އުމުރުފުޅުން 64 އަހަރު ފުޅުގެ ރަނަޖްން ގޯގޮއި ވަނީ 35 އަހަރުގެ އަންހެން މީހާ ކުރާ ތުހުމަތަކީ ގަބޫލު ކުރައްވަން ދަތި އަދި އެ ކަމަކީ އެ މަނިކުފާނު މުހިއްމު އަޑުއެހުންތައް ހުއްޓުވުމަށް ކޮށްފައިވާ ކަމެއް ކަމަށް ވިދާޅުވެފައެވެ.

އަދި އެއީ އެގައުމުގެ ޝަރުއީ ނިޒާމު ހަމަނުޖެހުމަކަށް ގެންދަން ދައްކާފައިވާ ވާހައެއްކަމަށެވެ.

ޕެނަލްގެ ނިންމުން އައިސްފައިވަނީ އެ ޕެނަލްގެ ނިންމުން އިންސާފުވެރިވެދާނެކަމާމެދު ސުވާލު އުފައްދައި، މައްސަލަ ހުށަހެޅިފަރާތުން އެ މައްސަލަ އަނބުރާ ނެގިފަހުންނެވެ.

މުޒާހަރާކުރާ ފަރާތްތަކުން ބޭނުންވަނީ އާ ތަހުގީގެއް ހިންގައި މައްސަލައިގައި ފަނޑިޔާރުގެ މައްޗަށް ކުރެވޭ ތަހުގީގުގެ ރިޕޯޓް އާއްމުކުރުމަށެވެ.

" އަހަރެމެން ފަސް މިނެޓަށް ވެސް މުޒާހަރާ ކޮށްލަން ފުރުސަތު ނުދިން" ޤާނޫނީ ވަކީލެއް ކަމަށްވާ އަމްރިތަނަންދާ ޗަކްރަވޮރްތީ ޓްވިޓަރގައި ބުނެފައިވެއެވެ.

ސުޕްރީމް ކޯޓުގެ 22 ފަނޑިޔާރުންނަށް އޭޕްރީލް މަހުގެ 19 ވަނަ ދުވަހު ފޮނުވާފައިވާ ސިޓީގައި ބުނެފައިވާ ގޮތުން މިދިޔަ އަހަރުގެ އޮކްޓޯބަރު މަހުގެ ތެރޭގައި ފަނޑިޔާރުވަނީ ފަނޑިޔާރުގެ ރަސްމީ ގެކޮޅުގެ އޮފީހުގައި އަންހެން މީހާގެ ފަރާތުން ޖިންސީ އުފާ ހޯދުމަށް ދެ ފަހަރެއްގެ މަތިން އުޅެފައެވެ.

ހުށަހެޅި މައްސަލައާއެކު ސުޕްރީމް ކޯޓުންވަނީ އެ މައްސަލަ ބެލުމަށް އެ ކޯޓުގެ ދެ އަންހެން ފަނޑިޔާރަކު ހިމެނިވަޑައިގަންނަވާގޮތަށް ތިން ފަޑިޔާރުންގެ ބެންޗެއް އެކުލަވާލާފައެވެ

މައްސަލަ ތަހުގީގުކުރި ޕެނަލުން ހޯމަ ދުވަހު ނިންމާފައިވަނީ އެ ތުހުމަތުތަކަކީ އެއްވެސް އަސްލެއް ނެތް ތުހުމަތުތަކެއް ކަމަށެވެ. މައްސަލައިގެ ތަހުގީގު ރިޕޯޓް އާއްމު ނުކުރުމަށް ޕެނަލުން ވަނީ ނިންމާފައެވެ.