ކަނޑޫދޫ މިރުހުގެ އަގު 700ރ. އަށް ވެއްޓިއްޖެ
ކުރިން ކަނޑޫދޫ މިރުސް ވިއްކަމުން ދިޔައީ ކިލޯއެއް 1000ރ އަށް ވުރެ މަތީގައި
ކަނޑޫދޫ މިރުސް
ކަނޑޫދޫ މިރުސް ކިލޯއެއްގެ އަގު 700ރ. އަށް ވެއްޓިއްޖެއެވެ.
ރޯދަ މަސް ފެށުމުގެ ކުރިން ކަނޑޫދޫ މިރުހުގެ އަގު އުޅުނީ ކިލޯއެއް 1000ރ. އަށް ވުރެ މަތީގައެވެ. އެހެން ނަމަވެސް މިހާރު ކަނޑޫދޫ މިރުހުގެ އަގު މާރުކޭޓުގައި ވެއްޓިފައި ވަނީ އެ މިރުސް ވިއްކާ ފަރާތްތަކުން އަގު ހެޔޮކުރުމާ ގުޅިގެން ކަމަށް ވިޔަފާރިވެރިން ބުނެއެވެ.
"މިއަދު މިރުހުގެ އަގު ހެޔޮވީ، އަގު ހެޔޮކޮށް ލިބުނީމާ. އެހެންވެ ކިލޯއެއް 700ރ. އަށް ވެސް ވިއްކަން މިހިރީ،" ވިޔަފާރިވެރިއަކު ބުންޏެވެ.
ކަނޑޫދޫގެ އާބާދީގައި 600 މީހުން ހިމެނޭއިރު އެ ރަށުގެ 90 އިންސައްތައަކީ ދަނޑުވެރިންނެވެ. ކަނޑުދޫގެ ދަނޑުވެރިއެއް ކަމަށްވާ އުމުރުން 37 އަހަރުގެ އިލްޔާސް މަހްމޫދު، ބުނީ މިރުހުގެ އަގު ބޮޑުވެފައި ވަނީ މިރުސް ނުލިބޭތީ އާއި ހޫނު ގަދަ ދުވަސްވަރަކަށް ވުމުން މިރުހުގެ މާ ހަރުނުވާތީ ކަމަށެވެ. އިލްޔާސް ބުނީ ރަށަށް ވާރޭ ނުވެހޭތާ ވަރަށް ގިނަ ދުވަސްވެފައިވާ ކަމަށެވެ.
އެހެން ބާވަތްތަކުގެ މިރުހާ އަޅާބަލާއިރު ކަނޑޫދޫ މިރުސް ހާއްސަ ވަނީ އެ މިރުސް ކުޅިވެފައި ރަހަ މީރުވުމުގެ ސަބަބުންނެވެ.
