ޕާޓީތަކަށް ފައިސާ ދޫކުރެވޭނީ މާލީ ރިޕޯޓް ހުށައެޅުމުން: އީސީ
7 މެއި 2019 | އަންގާރަ 10:15ފައިސާ ދޫކުރާނީ 10،000 މެމްބަރުން ހަމަވާ ޕާޓީތަކަށް
އީސީގެ ބައެއް މެމްބަރުން
ޕާޓީ ތަކަށް ފައިސާ ދޫކުރެވޭނީ ކަނޑައެޅިފައިވާ މުއްދަތަށް އަހަރީ ރިޕޯޓް ހުށައެޅުމުން ކަމަށް އިލެކްޝަންސް ކަމިޝަން(އީސީ)އިން ބުނެފިއެވެ.
އިލެކްޝަންސް ކަމިޝަންގެ މެމްބަރު އަދި ތަރުޖަމާނު އަހުމަދު އަކްރަމް ރާއްޖެއެމްވީއަށް ވިދާޅުވީ ޕާޓީތަކަށް ފައިސާ ދޫކުރެވޭނީ އަހަރީ ރިޕޯޓާއި އޮޑިޓް ރިޕޯޓް ހުށައެޅުމުން ކަމަށެވެ. އެހެން ނަމަވެސް ފައިސާ ދޫކުރާނީ ކޮން ތާރީޚެއްގައި ކަމެއް ވިދާޅެއް ނުވެއެވެ.
ސިޔާސީ ޕާޓީތަކުގެ ގާނޫނު ބުނާ ގޮތުން 10،000 މެމްބަރުން އެޕާޓީއެއްގައި ހިމެނޭނަމަ އެޕާޓީއަކަށް ފައިސާ ދޫކުރަން ވާނެއެވެ. އެހެން ނަމަވެސް ޕާޓީއަށް ފައިސާ ދޫކުރެވޭނީ ފާއިތުވެދިޔަ އަހަރުގެ އޮޑިޓް ރިޕޯޓާއި އަހަރީ ރިޕޯޓް އެޕާޓީއަކުން އީސީއަށް ހުށައަޅައިގެންނާއި ޕާޓީގެ މަގުސަދުތައް ހާސިލު ކުރުމަށް މަސައްކަތް ކޮށްފައިވާ އަހަރީ ރިޕޯޓުން ފެންނަން އޮތުމުންނެވެ.
އީސީއިން ވަނީ މިމަހުގެ 9 ވަނަ ދުވަހުގެ ކުރިން ފާއިތުވެދިޔަ އަހަރުގެ އޮޑިޓް ރިޕޯޓާއި އަހަރީ ރިޕޯޓް ހުށަ ނާޅާ ފަރާތްތަކަށް ފިޔަވަޅު އަޅާނެކަން ހާމަ ކޮށްފައެވެ. މިހާތަނަށް ޕާޓީތަކުގެ ރިޕޯޓް ހުށައަޅާފައިވަނީ ، މޯލްޑިވިއަން ޑިމޮކްރަޓިކް ޕާޓީ (އެމްޑީޕީ)، ޖުމްހޫރީ ޕާޓީ(ޖޭޕީ)އަދި މޯލްޑިވްސް ޑިވެލޮޕްމަންޓް އެލަޔަންސް (އެމްޑީއޭ) އިން އެކަންޏެވެ.
ގާނޫނު ބުނާ ގޮތުން ކުރިއަށް އޮތް އަހަރަށް ދައުލަތުގެ ބަޖެޓް ފާސްކުރާ ފަހުން ސިޔާސީ ޕާޓީއެއްގެ ގޮތުގައި އެ އަހަރު ކަމިޝަންގެ ރެޖިސްްޓްރީ ކުރާ ޕާޓީއަށް ކުރިއަށް އޮތް އަހަރުގެ ބަޖެޓް ހިނގަން ފެށުމުން އެއަހަރުގެ ދައުލަތުގެ ބަޖެޓުން ދޭ ފައިސާގެ އެހީ ސިޔާސީ ޕާޓީތަކަށް ދޫކުރާއިރު އެ ފައިސާއެއް ނުލިބޭނެއެވެ. މިދިޔަ އަހަރު ފައިސާ ދޫކޮށްފައިވަނީ 10،000 މެމްބަރުން ހަމަވި ހަތަރު ޕާޓީ ކަމަށްވާ އެމްޑީޕީ، ޖޭޕީ، އެމްޑީއޭ، ޕީޕީއެމް އަށެވެ.
މިއަހަރު ވެސް ސިޔާސީ ޕާޓީތަކަށް ފައިސާ ދޫކުރާނީ އެ އުސޫލުން ކަމަށް އަކްރަމް ވިދާޅުވިއެވެ. މިއަހަރު 10،000 މެމްބަރުން ހަމަވާ ޕާޓީތައް ސާފުވާނީ މާލީ ރިޕޯޓްތައް ހުށައެޅުމުން ކަމަށް ވެސް އޭނާ ވިދާޅުވިއެވެ.
