ރަޝިއާގެ ފްލައިޓްގައި ރޯވުން: މަރުވި މީހުންގެ އަދަދު 41 އަށް
ފްލައިޓްގައި ދަތުރު ކުރަމުން ދިޔައީ 78 ފަސިންޖަރުން
ފްލައިޓް ކްރޭޝް ލޭންޑް ކުރަން ޖެހުނު ސަބަބު އެއްވެސް ރަސްމީ ފަރާތަކުން މިހާތަނަށް ހާމަކޮށްފައެއް ނުވޭ
ރަޝިއާގެ އެއާލައިނެއް ކަމަށްވާ އެރޯފްލޮޓްގެ ފްލައިޓެއްގައި ރޯވެ، މަރުވި މީހުންގެ 41 އަށް އަރައިފިއެވެ.
އެރޯފްލޮޓް ފްލައިޓް އެސްޔޫ 1492 ގައި މަރުވި މީހުންގެ ތެރޭގައި ދެ ކުޑަ ކުދިން ވެސް ހިމެނެއެވެ.
އާދިއްތަ ދުވަހު މޮސްކޯއިން މަރމަންސްކް އަށް ދަތުރު ކުރަމުން ދިޔަ މި ފްލައިޓްގައި ދިމާވި އެމަޖަންސީއެއްގެ ސަބަބުން ފްލައިޓް އަނބުރާލުމަށް ފަހު ކްރޭޝް ލޭންޑް ކުރަން އުޅުމުގެ ތެރޭގައި ވަނީ ރޯވެފައެވެ.
ފްލައިޓް ކްރޭޝް ލޭންޑް ކުރަން ޖެހުނު ސަބަބު ރަސްމީ އެއްވެސް ފަރާތަކުން މިހާތަނަށް ހާމަކޮށްފައި ނުވާއިރު، ރަޝިއާގެ 'އިންޓަފެކްސް ނިއުސް' އިން ރިޕޯޓް ކުރާ ގޮތުގައި ފްލައިޓް އަނބުރާލަން ޖެހުނީ ހޮނު އެޅުމުގެ ސަބަބުން ކޮމިއުނިކޭޝަން ގެއްލުމުންނެވެ.
މަރމަންސްކް އަށް ދަތުރު ކުރަމުން ދިޔަ އެރޯފްލޮޓް ފްލައިޓް އެސްޔޫ 1492 މޮސްކޯއަށް އަނބުރާލީ ނައްޓާލިތާ 30 މިނިޓް ފަހުންނެވެ.
ފްލައިޓް ޖެއްސި އިރުގެ ވީޑިއޯތަކުން ދައްކާ ގޮތުގައި ލޭންޑް ކުރަން ދިޔަ އިރު ރޯވެފައެއް ނެތެވެ. ވީޑިއޯ އިން ފެންނަ ގޮތުގައި ބާރަށް އައިސް ޖެއްސުމުން ފްލައިޓް ކަހާލައިގެން ދެއެވެ. އަދި ދެވަނަ ފަހަރަށް ރަންވޭގައި ޖެހުމާ އެކު ރޯވާ މަންޒަރު ފެނެއެވެ.
އެ އަށް ފަހު 55 ސިކުންތު ތެރޭގައި ހުރިހާ ފަސިންޖަރުން ނެރެފައިވާ ކަމަށް އެރޯފްލައިޓުން ބުނެފައި ވެއެވެ.
އެރޯފްލޮޓް ފްލައިޓް އެސްޔޫ 1492ގައި ދަތުރު ކުރަމުން ދިޔަ ހުރިހާ ފަރާތްތައް ސަލާމަތް ކުރުމަށް އެންމެހާ މަސައްކަތް ކުރިކަމަށާއި ފްލައިޓުން އެންމެ ފަހުން ފާބައިފައިވަނީ އޭގެ ކެޕްޓަންކަމަށް އެރޯފްލޮޓުން ނެރުނު ބަޔާނެއްގައި ފާހަގަކޮށްފައި ވެއެވެ.
މި ފްލައިޓްގައި 78 މީހުން ދަތުރު ކުރަމުން ދިޔަ އިރު، 37 މީހުން ވަނީ ސަލާމަތް ވެފައެވެ. އެއީ 33 ފަސިންޖަރުންނާއި ހަތަރު ކްރޫ މެމްބަރުންނެވެ. އަދި ރަޝީއާގެ އިންވެސްޓިގޭޓިވް ކޮމިޓީގެ ތަރުޖަމާނު، އެލެނާ މާކޮސްކަޔާ ވިދާޅުވި ގޮތުގައި އެތަނުން ފަސް މީހުންނަށް ހޮސްޕިޓަލްގައި ދަނީ ފަރުވާ ދެމުންނެވެ. އަދި ކަންތައް ވީގޮތް ބެލުމަށް "ފުރިހަމަ" ތަހުގީގެއް ހިންގުމަށް ރަޝިއާގެ ރައީސް ވްލާޑަމިއެރ ޕުޓިން ވަނީ އަންގާފައެވެ.
އެގޮތުން، އިންވެސްޓިގޭޓިވް ކޮމިޓީން ތަހުގީގު ކުރާ ކަންތަކުގެ ތެރޭގައި މިކަމާ ގުޅުން ހުރި ހުރިހާ ފަރާތްތަކުގެ ގާބިލްކަން ބެލުން ހިމެނެއެވެ. އަދި ތަހުގީގަށް ބޭނުންވާ ފްލައިޓްގެ ރިކޯޑަރުތައް މިހާރު ވަނީ ހޯދިފައެވެ.
އެރޯފްލޮޓް ފްލައިޓް އެސްޔޫ 1492 އަކީ 2011 ވަނަ އަހަރު ތައާރަފްވި ސުކޮއި ކުންފުނީގެ ފްލައިޓެކެވެ. އެއީ ރަޝިއާގެ ކުންފުންޏަކަށްވާއިރު، އޭގެ 100 އަށް ވުރެ ގިނަ ފްލައިޓް ދުނިޔޭގައި އެކި ކަންކޮޅުގައި އޮޕަރޭޓް ކުރާ ކަމަށް އެ ކުންފުނިން ބުނެއެވެ.
މި ހާދިސާއަށް ފަހު ވެސް، ސުކޮއިގެ ފްލައިޓްތައް ގްރައުންޑް ކުރަން ޖެހޭ ސަބަބެއް ނެތް ކަމަށް ރަޝިއާގެ ޓްރާންސްޕޯޓް މިނިސްޓަރ ވަނީ ވިދާޅުވެފައެވެ.
ނަމަވެސް، އެ ކުންފުނީގެ ކުރީގެ އިންޖިނިއަރަކު ވަނީ އެ ފްލައިޓްތަކުގެ ސަލާމަތީ ކަންކަމާ ގުޅޭ ގޮތުން ކަންބޮޑުވުން ފާޅުކޮށްފައެވެ. އެއް ސަބަބަކީ 2014 ވަނަ އަހަރު ރަޝިއާއަށް އަޅާފައިވާ ދަތިކުރުމުގެ ފިޔަވަޅުގެ ސަބަބުން ފްލައިޓަށް ބޭނުންވާ ބައިތައް ހޯދަން އުނދަގޫވުން ކަމަށް އޭނާ ފާހަގަކޮށްފައި ވެއެވެ.
