ޅައިމަގުން ގެއްލުނު މީހާ ހޯދަމުން ދަނިކޮށް މީހެއްގެ ހަށިގަނޑުގެ ބައިތަކެއް ފެނިއްޖެ
ލުތުފަރުގެ ހަށިގަނޑުގެ ބައިތައް ކަމަށް ބެލެވޭ ބައިތައް ފެނިފައިވާ ކަމަށް ފުލުހުން ބުނީ ހޯމަ ދުވަހު
ބޯޓެއްގައި ބިދޭސީންތަކެއް
ށ. ޅައިމަގާއި މާލެއާ ދޭތެރޭ ދަތުރު ކުރާ ބޯޓެއްގައި މަސައްކަތް ކުރާ ބިދޭސީއަކު ގެއްލިގެން ހޯދަމުން ދަނިކޮށް ކަނޑުގެ އަޑިން އޭނާގެ ހަށިގަނޑުގެ ބައިތައް ކަމަށް ބެލެވޭ ބައިތަކެއް ފެނިފައިވާ ކަމަށް ފުލުހުން ބުނެފިއެވެ.
ފުލުހުން ބުނީ މިދިޔަ މަހުގެ 22 ވަނަ ދުވަހުގެ ރޭ ދަންވަރު ގެއްލިފައިވާ ލުތުފަރު އޮތް ކަމަށް ބެލެވޭ ކަނޑުގެ ސަރަހައްދު ފުލުހުން ޑައިވް ކޮށްގެން ކުރެވުނު ސާރޗްގެ ތެރެއިން ލުތުފަރުގެ ހަށިގަނޑުގެ ބައިތަކެއް ކަމަށް ބެލެވޭ އިންސާނެއްގެ ބައިތަކެއް ހޯދިފައިވާ ކަމަށެވެ.
ހަށިގަނޑުގެ ބައިތައް ފެނިފައި ވަނީ ޅައިމަގު ބަނދަރުގެ ބޭރު ތޮށި ކައިރިން އުރަފަށުން ކަމަށް މައުލޫމާތު ލިބިފައި ވެއެވެ. "ކުރިމަގު 1" ބޯޓުގެ ކައްޕި ބައެއް މީޑިއާތަކަށް ބުނެފައިވާ ގޮތުން ލުތުފަރު ނަމަކަށް ކިޔާ ބިދޭސީ މީހާ ގެއްލިފައި ވަނީ މިދިޔަ މަހުގެ 21 ވަނަ ދުވަހުއެވެ. އޭނާ ގެއްލުނުކަން އެނގުނީ ބޯޓު މާލެ ފުރަން ބެލި އިރު އޭނާ ނުފެނުމުންނެވެ.
ލުތުފަރު ގެއްލުމާ އެކުހެން އެ ބޯޓުގެ އެހެން ބިދޭސީންނަށް ޝައްކުކުރެވުނެވެ. ފުލުހުން ވަނީ އެ މައްސަލައާ ގުޅިގެން ދެ މީހަކު ހައްޔަރުކުރި ކަމަށް ބުނެފައެވެ. ނަމަވެސް އެނގިފައިވާ ގޮތުގައި ފުލުހުން ފަހުން ވަނީ އެ ބޯޓުގައި މަސައްކަތްކުރާ ބައެއް އެހެން ބިދޭސީން ވެސް ހައްޔަރުކޮށްފައެވެ. ފުލުހުން ބުނީ އެ މައްސަލައިގައި މި ވަގުތު ފުލުހުންގެ ބެލުމުގެ ދަށުގައި ހަތަރު ބިދޭސީއަކު އެބަ ތިބި ކަމަށެވެ.
އެ ބޯޓުގައި މަސައްކަތްކުރާ ބައެއް ބިދޭސީން ކުރިން ބުނެފައި ވަނީ ލުތުފަރު ގެއްލުނު ރޭ އެ ބޯޓުގައި މަސައްކަތްކުރާ ބަޔަކާއި އޭނާއާ ދެމެދު ވަރަށް ބޮޑަށް ޒުވާބުކުރި ކަމަށެވެ.
