މެލޭޝިއާގެ ފުރަތަމަ އަންހެން އުއްތަމަ ފަނޑިޔާރު ހުވާކުރައްވައިފި
6 މެއި 2019 | ހޯމަ 13:48މައިމުން ތުއާން ކުރިން ވަނީ ތިން ކޯޓެއްގައި މަސައްކަތް ކުރައްވާފައި
މައިމުން ތުއާން ވަނީ މެއިމަހުގެ ދެ ވަނަ ދުވަހުން ފެށިގެން މަގާމުގެ ޒިންމާތައް ރަސްމީކޮށް އުފުއްލަވަން ފައްޓަވާފައި
މެލޭޝިއާގެ ފުރަތަމަ އަންހެން އުއްތަމަ ފަނޑިޔާރުގެ މަގާމަށް އައްޔަން ކުރައްވާފައިވާ މައިމުން ތުއާން މަތުއަށް ރަސްގެފާނު އަލް-ސުލްތާން އަބްދުﷲ ރިއާޔަތުއްދީން އަލް-މުސްތަފާ ބިއްލާހް ޝާޙް މަގާމުގެ ފަތްކޮޅު ހޯމަ ދުވަހު ރަސްމީކޮށް އަރުވައިފިއެވެ.
ރަސްގެފާނުގެ ގަނޑުވަރުގެ ކުޑަކޮޓަރިކޮޅެއްގައި ބޭއްވި ކުޑަ ރަސްމިއްޔާތެއްގައި އެކަމަނާއާ މަގާމްގެ ފަތްކޮޅު ރަސްމީކޮށް ހަވާލުކުރެވުނު ނަމަވެސް މެއިމަހުގެ 2 ވަނަ ދުވަހުން ފެށިގެން އެކަމަނާ ހުންނެވީ މަގާމުގެ މަސްއޫލިއްޔަތާ ހަވާލުވެވަޑައިގެންނެވެ.
އުއްތަމަ ފަނޑިޔާރުގެ މަގާމަށް އައްޔަން ކުރެއްވުމުގެ ކުރިން މައިމުން ތުއާން ވަނީ ތިން ކޯޓެއްގައި މަސައްކަތް ކުރައްވާފައެވެ. އެއީ، ކުއަލަލަމްފޫރު ހައި ކޯޓު، ޝާހް އަލަމް ހައިކޯޓުގެ އިތުރުން ފެޑެރަލް ކޯޓެވެ.
އަންނަ ޖުލައި މަހު 60 އަހަރު ފުޅު ފުރޭ މައިމުން ތުއާން ޔުނިވާސިޓީ މެލެޔާއިން ތައުލީމް ހާސިލް ކުރެއްވުމަށް ފަހު އެންމެ ފުރަތަމަ ޝަރުއީ ދާއިރާގައި މަސައްކަތް ކުރެއްވީ ކުއަލަލަމްޕޫރް ހައިކޯޓުގައެވެ. އެ ކޯޓުގައި އަހަރެއްހާ ދުވަސް ވަންދެން އެކަމަނާ ފުރުއްވެވީ ޖުޑީޝަލް ކޮމިޝަނަރގެ މަގާމެވެ.
މެއި މަހުގެ ދެވަނަ ދުވަހުން ފެށިގެން މަގާމުގެ މަސްއޫލިއްޔަތު އަދާކުރެއްވޭގޮތަށް އާ އުއްތަމަ ފަނޑިޔާރަކު މެލޭޝިޔާގައި އައްޔަންކޮށްފައި ވަނީ އެ މަގާމު ފުރުއްވަމުން ގެންދެވި ރިޗަޑް މަލަންޖުމް މިދިޔަ މަހުގެ 12 ވަނަ ދުވަހު އެ މަގާމުން މުސްކުޅި ކުރެއްވުމާ ގުޅިގެންނެވެ.
ރިޗަޑް އުއްތަމަ ފަނޑިޔާރުކަން ކުރެއްވި 10 މަސް ތެރޭގައި އެމަނިކުފާނު ވަނީ، އެގައުމުގެ ޝަރުއީ ދާއިރާއަށް ބޮޑެތި އިސްލާހުތަކެއް ގެންނަވާފައެވެ.
މެލޭޝިއާގެ ގައި ފަނޑިޔާރުން މުސްކުޅިކުރައްވާ އުމުރަކީ 66 އަހަރެވެ. 1963ވަނަ އަހަރު އިނގިރޭސިންގެ ދަށުން މިނިވަންވުމަށް ފަހު މެލޭޝިއާގައި އުއްތަމަ ފަނޑިޔާރު ކަން ކުރައްވާފައިވާ 15 ބޭފުޅުންނަކީ ވެސް ފިރިހެނުންނެވެ.
