އޭސީ މިލާނުން ބަޔާން މިއުނިކަށް ކުޅެމުން އަންނަ ޖަރުމަންގެ ވިންގާ ތޯމަސް މުލާއަށް ޝައުގުވެރިވާ ކަމަށް ރިޕޯޓްތައް ބުނެފިއެވެ.
ކުޅިވަރު ޚަބަރުތައް ގެނެސްދޭ ކިކާއިން ބުނީ، މުލާ ހޯދުމަށް އޭސީ މިލާނުން ބޭނުންވާ ކަމަށާއި، އެޓީމުން އޭނާ ބޭނުންވަނީ ކުރިޔަށް އޮތް ސީޒަނަށް އަމާޒުކޮށް ކަމަށެވެ.
އުމުރުން 29 އަހަރުގެ މުލާ ބަޔާންއާ އެކު ހަދާފައިވާ އެއްބަސްވުން 2021 ވަނަ އަހަރު ހަމަވާއިރު، އޭނާ ހޯދުމަށް އޭސީ މިލާންގެ އިތުރުން އިންޓަ މިލާނުން ވެސް އަންނަނީ މަސައްކަތް ކުރަމުންނެވެ.
ރިޕޯޓްތައް ބުނާ ގޮތުން އޭސީ މިލާން އަދި އިންޓައިން މުލާ ހޯދުމަށް މަސައްކަތް ކުރި ނަމަވެސް އެއްބަސްވުން ހަމަވުމުގެ ކުރިން މުލާ ދޫކޮށްލަން ބަޔާންއިން ބޭނުމެއް ނެވެއެވެ. އެގޮތުން ބެލެވޭ ގޮތުގައި އޭނާ އެއްބަސްވުން ހަމަވަންދެން ކްލަބުގައި މަޑުކުރާނެއެވެ.
ބަޔާން އިން 2008 ވަނަ އަހަރު ސީނިއާ ކެރިޔަރު ފެށި މުލާ ޔޫތު ކެރިޔަރުވެސް ހޭދަކޮށްފައިވަނީ އެ ކްލަބުގެ ޔޫތު ޓީމުގައެވެ. އޭނާ ވަނީ އެ ކްލަބަށް މިހާތަނަށް ކުޅުނު 481 މެޗުގައި 185 ލަނޑު ކާމިޔާބުކޮށްފައެވެ.
މުލާ ވަނީ ބަޔާންއާ އެކު ހަތް ލީގު ތަށި، ހަތަރު ޖަރުމަން ކަޕް، ހަތަރު ޖަރުމަން ސުޕަ ކަޕް، އެއް ޔުއެފާ ޗެމްޕިއަންސް ލީގު، އެއް ޔުއެފާ ސުޕަ ކަޕް އަދި އެއް ފީފާ ކްލަބް ވޯލްޑް ކަޕް ކާމިޔާބުކޮށްފައެވެ.
ޖަރުމަން ގައުމީ ޓީމާއެކު 2010 ވަނަ އަހަރު ފީފާ ވޯލްޑް ކަޕްގެ ތިންވަނަ ހޯދި މުލާ ވަނީ ގައުމީ ޓީމަށް މިހާތަނަށް ކުޅުނު 100 މެޗުގައި 38 ލަނޑު ކާމިޔާބުކޮށްފައެވެ. އަދި އޭނާ ވަނީ 2010 ވަނަ އަހަރު ވޯލްޑް ކަޕްގެ ރަން ބޫޓު ހޯދުމުގެ އިތުރުން އެންމެ މޮޅު ޒުވާން ކުޅުންތެރިޔާގެ މަގާމުވެސް އެފަހަރުގެ މުބާރާތުގައި ހޯދާފައެވެ.
ގިނަ އިންޑިވިޖުއަލް އެވޯޑްތަކެއް ހޯދާފައިވާ މުލާ ވަނީ 2010 ވަނަ އަހަރު ބްރާވޯ އެވޯޑްގެ އިތުރުން ވޯލްޑް ސޮކާ ޔަންގް ޕްލޭޔާ އޮފް ދަ އިޔާވެސް ހޯދާފައެވެ.
