އެސްޓީއޯގެ އަހަރީ އާންމު ޖަލްސާ މެއި 16 ގައި

ސްޓޭޓް ޓްރޭޑިންގ އޯގަނައިޒޭޝަން އެސްޓީއޯގެ 2018 ވަނަ އަހަރުގެ އަހަރީ އާންމު ޖަލްސާ މިމަހުގެ 16 ވަނަ ދުވަހުގައި ބޭއްވުމަށް ހަމަޖައްސައިފިއެވެ .

އެސްޓީއޯއިން ބުނެފައިވަނީ އެ ކުންފުނީގެ އަހަރީ ޢާންމު ޖަލްސާ ބޭއްވުމަށް ހަމަޖެހިފައިވަނީ ރޭގަނޑު 22:00 ގައި ދަރުބާރުގެ، ރަންނަބަނޑޭރި މާލަމުގައި ކަމަށާއި ޖަލްސާއަށް ކުންފުނީގެ އެންމެހައި ޙިއްސާދާރުންނަށް ދަޢުވަތު އަރުވާ ކަމަށެވެ. މިދިޔަ މަހުގެ 21 ގައި ބޭއްވުނު ޑިރެކްޓަރ ބޯޑުގެ ބައްދަލުވުމުގައި ވަނީ އެސްޓީއޯ އިން މިދިޔަ އަހަރު ލިބުނު ފައިދާއިން ހިއްސާއަކަށް 58ރ. ބަހަން ނިންމާފައެވެ.

އެސްޓީއޯ އިން 2017 ވަނަ އަހަރު ހިއްސާގެ ފައިދާ ބަހާފައި ވަނީ 55 ރުފިޔާގެ ރޭޓުންނެވެ. 2017 ވަނަ އަހަރު އެ ކުންފުންޏަށް 7.5 ބިލިއަން ރުފިޔާ ލިބިފައިވާއިރު އޭގެ ތެރޭގައި ސާފު ފައިދާގެ ގޮތުގައި ލިބިފައިވަނީ 211 މިލިއަން ރުފިޔާއެވެ. އަދި ކުންފުނި ހިންގުމުގެ ފައިދާގެ ގޮތުގައި 287 މިލިޔަން ރުފިޔާ ވަނީ ލިބިފައެވެ.

މިދިޔަ އަހަރުގެ ހަތަރު ކުއާރޓާގައި ވެސް އެކުންފުންޏަށް ފާއިދާތަކެއް ވެފައިވާއިރު ފުރަތަމަ ކުއާޓަރުގައި 46 މިލިއަން ރުފިޔާގެ ފައިދާ، ދެވަނަ އަދި ތިން ވަނަ ކުއާޓާރގައި 47 މިލިއަން ރުފިޔާ، މީގެ އިތުރުން ހަތަރުވަނަ ކުއާޓާރގައި 65 މިލިއަން ރުފިޔާގެ ފައިދާ ވަނީ ވެފައެވެ.