ލަންކާގެ ސޯޝަލް މިޑިއާ ބްލޮކް ކޮށްފައި އޮތް އޮތުން ނިމުމަކަށް
ސޯޝަލް މީޑިއާ ބްލޮކް ކުރީ ބޮމުގެ ހަމަލާއާ ގުޅިގެން
ސްރީލަންކާއަށް ދިން ހަމަލާއާއި ގުޅިގެން ސެކިއުރިޓީ ވަނީ ވަރުގަދަ ކޮށްފައި
ބޮމުގެ ހަމަލާތަކާއި ގުޅިގެން ސްރީލަންކާގައި ވަގުތީ ގޮތުން ބްލޮކް ކޮށްފައިވާ ސޯޝަލް މީޑިއާ ބޭނުން ކުރަން އަންގާރަ ދުވަހު ހުއްދަ ދީފިއެވެ.
ލަންކާ ސަރުކާރުން ނެރެފައިވާ ނޫސްބަޔާނެއްގައި ބުނެފައި ވަނީ ގައުމުގެ ހާލަތާއި ގުޅިގެން ބްލޮކްކޮށްފައިވާ ސޯޝަލް މީޑިއާ އެޕްތައް ބްލޮކް ކުރިން ނިމުމަކަށް ގެނެސް އަލުން އެ އެޕްތައް ބޭނުން ކުރުމުގެ ހުއްދަ ރައީސް މައިތިރިޕާލާ ސިރިސޭނާ ދެއްވާފައިވާ ކަމަށެވެ.
ލަންކާގައި ސޯޝަލް މީޑިއާ ބޭނުން ކުރުން ބޮލޮކް ކޮށްލާފައިވަނީ އެ ގައުމުގައި މި މަހުގެ 21 ވަނަ ދުވަހު ދިން ބޮމުގެ ހަމަލާތަކާއި ގުޅިގެން އެދުވަހުއެވެ.
އެގައުމުގެ އަށް ސަރަހައްދަކަށް ދިން ބޮމުގެ ހަމަލާގައި ދުއިސައްތައަށްވުރެ ގިނަ މީހުން މަރުވެފައިވާއިރު ޒަޚަމްވި މީހުންގެ އަދަދު 500 އަށް އަރައެވެ.
ލަންކާގައި މޫނު ނިވާކޮށްގެން އުޅުން މަނާ ކޮށްފައިވާއިރު ކުރިއަށް އޮތް ރަމަޟާން މަހާއި ދިމާކޮށް އެގައުމުގައި ސެކިއުރިޓީ ވަނީ އިތުރަށް ވަރުގަދަ ކޮށްފައެވެ. ސެކިއުރިޓީ އިތުރަށް ވަރުގަދަ ކޮށްފައިވަނީ ހައްދުފަހަނައަޅާފައިވާ ހަނގުރާމަވެރިންގެ ހަމަލާތަކެއް ލަންކާއަށް އަމާޒުވެދާނެ ކަމަށް ބުނާ ޖާސޫސީ މައުލުމާތާތުކެއް ލިބުމާއެކުއެވެ.
