ސުޕްރީމް ކޯޓަށް ހާޒިރުކުރީ ޓްވީޓަކާއި ގުޅިގެން: އިންތި

ރައްޔިތުންގެ މަޖިލީހުގެ މާފަންނު އުތުރު ދާއިރާގެ މެމްބަރު އިމްތިޔާޒް ފަހުމީ އަންގާރަ ދުވަހު ސުޕްރީމް ކޯޓަށް ހާޒިރުކުރީ އޭނާ ކޮށްފައިވާ ޓްވީޓަކާ ގުޅިގެން ކަމަށް އޭނާ ވިދާޅުވެއްޖެއެވެ.

މިއަދު ހެނދުނު ސުޕްރީމް ކޯޓުން ނުކުމެ ވަޑައިގެން ރާއްޖެޓީވީއަށް ދެއްވި އިންޓަރވިއުއެއްގައި އިންތި ވިދާޅުވީ އޭނާ ސުޕްރީމް ކޯޓަށް ހާޒިރުކޮށްފައި ވަނީ ސުޕްރީމް ކޯޓުގެ ބެންޗްގެ ނިންމުންތަކާ ގުޅޭ ގޮތުން އޭނާ ކުރެއްވި ޓްވީޓަކާ ގުޅިގެން ސުވާލު ކުރުމަށް ކަމަށެވެ.

އިންތި ޓްވީޓްކުރައްވާފައި ވަނީ ފެބްރުއަރީ 1ގެ ހުކުމާ ގުޅޭ ގޮތުންނެވެ.

އިންތި ވިދާޅުވީ އެއީ ކީއްވެގެން ކޮށްފައިވާ ޓުވީޓެއްތޯ އޭނާ އާއި ސުވާލުކޮށްފައިވާ ކަމަށެވެ. އެ ޓްވީޓް ކޮށްފައިވާ ސަބަބު ސުޕްރީމް ކޯޓަށް އޮޅުން ފިލުއްވައިދެއްވާފައިވާ ކަމަށް އިންތި ވިދާޅުވިއެވެ. އިންތި އެ ޓުވީޓް ކޮށްފައިވަނީ މަރުތައް ބަލާ ކޮމިޝަންގެ ރައީސް އަދި މަޝްހޫރު ގާނޫނީ ވަކީލު ހުސްނުއްސުއޫދު ރާއްޖެ ޓީވީގައި ދެއްކެވި ވާހަކައާއި ގުޅޭ ގޮތުން އޭނާ ސުޕްރީމް ކޯޓަށް ހާޒިރުކޮށް ބަޔާން ނަގާފައިވާތީ، އެ ކަމުގެ ކަންބޮޑުވުމާއި ގުޅިގެން ކަމަށެވެ.

"އަޅުގަނޑު ދެންނެވިން ތި ބޭފުޅުންގެ ޖަލު، ރާއްޖެޓީވީގެ ޕްރޮގްރާމެއްގައި މަޝްހޫރު ގާނޫނީ ވަކީލު ހުސްނުއްސުއޫދު ދެއްކެވި ވާހަކައާއި ގުޅިގެން އޭނާ ހާޒިރުކޮށް ސުވާލުކުރުމުން އަޅުގަނޑު ކުރި ޓުވީޓެއް އެއީ" އިންތި ވިދާޅުވިއެވެ.

އިންތި ވިދާޅުވީ ފަނޑިޔާރުގެ އިސްލާހު ކުރާ ފަރާތްތައް ކޯޓަށް ހާޒިރުކޮށް އެ މީހުންގެ ބަޔާން ނެގުން އެއީ އޭނާ ކަންބޮޑުވެވަޑައިގަންނަވާ ކަމެއް ކަމަށް ސުޕްރީމް ކޯޓުގައި ވިދާޅުވެފައިވާނެ ކަމަށެވެ. އެ ގޮތަށް ޓްވީޓްކުރުމުން ނޭދެވޭ އަސަރެއް ކޮށްފާނެ ކަމަށް ސުޕްރީމް ކޯޓުން ބުނި ކަމަށް އިންތި ވިދާޅުވިއެވެ.

"އަޅުގަނޑު ބުނިން ހުރިހާ ޕްލެޓް ފޯމަކީ ވެސް ކަންކަން އިސްލާހުކުރަން ވާހަކަދައްކަންޖެހޭ ޕްލެޓް ފޯމެއް ކަމަށް. ޓުވީޓް ވިޔަސް އެހެން ނޫން ތަނެއް ވިޔަސް އަދި މަޖިލިސް ވިޔަސް، ކޮންމެ ތަނެއްގައި ވިޔަސް، ވާހަކަދެއްކުމުގެ ހައްގު އޮންނަންވާނެ ކޮންމެ މީހަކަށް ވިޔަސް،" އިންތި ވިދާޅުވިއެވެ.