ތޫފާން ކެނެތުގެ ސަބަބުން މޮޒެމްބީކްގެ ހާލަތު ގޯހުން ގޯހަށް!

ދެކުނު އެފްރިކާ އަށް ތޫފާން "އިދާއީ" އަރައި މޮޒެމްބީކަށް ބޮޑެތި ގެއްލުންތަކެއް ވެފައިވަނިކޮށް އަނެއްކާ ވެސް ތޫފާނެއް އަރައި އެގައުމުގެ ހާލަތު ގޯހުން ގޯހަށް ހިގައްޖެއެވެ.

އިދާއީ ތޫފާން އެރިތާ ދެ މަސް ވެސް ނުވަނީސް އެރި ތޫފާން "ކެނެތު" ގައި މޮޒެމްބީކްގެ 38 މީހަކު މަރުވެފައިވާ ކަމަށް ހޯމަ ދުވަހު ވަނީ ރިޕޯޓް ކުރެވިފައެެވެ.

މާރޗް މަހު އެރި އިދާއި ތޫފާނުގައި މޮޒެމްބީކުން އެކަނި ވެސް 600 އަށް ވުރެ ގިނަ މީހުން ވަނީ މަރުވެފައެވެ. އަދި އެންމެ ބޮޑެތި ގެއްލުންތަކެއް ވެސް ލިބިފައި ވަނީ އެ ގައުމަށެވެ. މޮޒެމްބީކްގެ ނޭޝަނަލް ޑިޒާސްޓަރ ސެންޓަރު ބުނީ، ތޫފާނުގައި މިހާތަނަށް 35000 (ތިރީސް ފަސްހާސް) ގެ ހަލާކުވެފައިވާ ކަމަށެވެ. އަދި ތޫފާނުގެ އަސަރު އެގައުމުގެ 160،000 މީހުންނަށް ކޮށްފައިވާ ކަމަށެވެ.

ގަދަ ވަޔާއެކު ކުރަމުންދާ ވިއްސާރައިގައި މޮޒެމްބީކުގެ އެންމެ އުތުރުގައި އޮންނަ "ކަބޯ ޑެލްގާޑޯ" ޕްރޮވިންސްގައި ފެންބޮޑުވުމުގެ ސަބަބުން ބިންގަނޑު ކަނޑައިގެން ދިއުމުގެ ހާދިސާތައް ވަނީ ހިނގާފައެވެ. އަދި ބައެއް ކޯރުތައް ބަންޑުންވެދާނެކަމުގެ ބިރު ވަނީ ބޮޑުވެފައެވެ.

އދ. އެހީދޭ ޖަމާއަތްތަކުން ވަނީ ހޯމަދުވަހުގެ ހެނދުނު ވަގުތެއްގައި އެގައުމަށް އެހީގެ ތަކެތި ފޯރުކޮށްދޭން ފަށާފައެވެ. އެހެން ނަމަވެސް އެހީގެ ތަކެތި ފޯރުކޮށްދިނުމުގައި ދަތިތަކެއް ހުރި ކަމަށް އެފަރާތުން ބުނެއެވެ.

ކުރިއަށް އޮތް ދުވަސްތަކުގައި ބޯ ވިއްސާރަ ކުރާނެ ކަމަށާއި، ގަޑިއަކު 200 ކިލޯ މީޓަރުގެ ބާރުމިނުގައި ވައިޖެހޭނެކަމަށް މޫސުމާބެހޭ އިދާރާތަކުން ލަފާކުރާއިރު މިހާރު ވެސް ބޯކޮށް ވާރޭ ވެހެމުންދާ ޕެމްބާ ސަރަހައްދުގައި އުނަގަނޑާ ހަމައަށް ފެން ބޮޑުވެ ކަރަންޓު ވަނީ ކެނޑިފަ އެވެ.

ފެން ބޮޑުވެ ކިސަޑު ފޭބުމުގެ ބިރު އޮތްކަން ހާމަ ކުރަމުން މޮޒެމްބީކް ސަރުކާރުގެ އޮފިޝަލުން އެ ގައުމުގެ ރައްޔިތުން ތޫފާނުން ސަލާމަތްތެރިކަން ހޯދާ ރައްކާތެރި އުސް ސަރަހައްދުތަކަށް އެރުމަށް ވަނީ އިލްތިމާސް ކޮށްފަ އެވެ.