އީޕީއެސް ފައުންޑޭޝަންގެ ފަރާތުން ހިދުމަތުގެ ހަވީރު ނަމުގައި ހަރަކާތެއް ބާއްވަނީ

އީޕީއެސް ފައުންޑޭޝަންގެ ފަރާތުން ހިދުމަތުގެ ހަވީރު ނަމުގައި ހަރަކާތެއް ބާއްވަން ނިންމައިފިއެވެ.

މިކަމާއި ގުޅޭގޮތުން މައުލޫމާތު ދިނުމަށް ހޯމަ ދުވަހުގެ ހަވީރު ބޭއްވި ނޫސްވެރިންގެ ބައްދަލުވުމެއްގައި އެ ފައުންޑޭޝަންގެ ޗެއަރމަން މުހައްމަދު ސަލީމް ވިދާޅުވީ މެއި މަހުގެ 1 ވަނަ ދުވަހުގެ ރޭ ދަރުބާރުގޭގައި ބޭއްވުމަށް ހަމަޖެހިފައިވާ ހިދުމަތުގެ ހަވީރުގެ މަގްސަދަކީ ވޭތުވެދިޔަ 50 އަހަރުގައި ރާއްޖޭގެ ތައުލީމަށް ހިދުމަތް ކޮށްދެއްވި އީޕީއެސް ސްކޫލުގެ މުދައްރިސުންނާއި ވަޒީފާ އަދާކުރި ބޭފުޅުންގެ އަގު ވަޒަން ކުރުން ކަމަަށެވެ. އަދިި ހަފްލާގައި އެބޭފުޅުންގެ ހިދުމަތަށް އެރުވޭ ހަނދާނީ ފިލާ އެރުވުމުގެ އިތުރުން ދަރިވަރުންގެ ހިތުގައި އޮތް ޝުއޫރު ހާމަކުރުމުގެ އިތުރުން ހިދުމަތްތެރިންގެ ޝަރަފުގައި މާހެފުމެއް ވެސް އޮންނާނެ ކަމަށެވެ.

މިއީ ސްކޫލް ދަރިވަރުން އިސްނަގައިގެން މުދައްރިސުންނާއި މުވައްޒަފުންގެ އަގު ވަޒަން ކުރުމަށް ބޮޑު ހަފްލާއެއް ބާއްވާ ފުރަތަމަ ފަހަރުކަން ފާހަގަކޮށް އޭނާ ވިދާޅުވީ ގައުމުގެ އިސްމަގާމުތަކަށް ބަލާލިޔަސް ފެނިގެންދަނީ އީޕީއެސް އިން ތައުލީމު ހާސިލް ކޮށްގެން ތިބި ބޭފުޅުން ކަމަށާއި ، ޓީޗަރުންގެ ބުރަ މަސަތްކަތާއި ، އެހާ އަގުބޮޑު ހިދުމަތް ގައުމަށް ކޮށްދެއްވާފައިވާ ޓީޗަރުންގެ އަގު ވަޒަން ކުރުމުގެ ފުރުސަތު ލިބުމަކީ ލިބޭ ވަރަށް ބޮޑު އުފަލެއް ކަމަށެވެ. އީޕީއެސް ފައުންޑޭޝަނުގެ ފަރާތުންވީ އެ ސުކޫލުގައި ކިޔެވި ހުރިހާ ދަރިވަރުންނަށް ވެސް މި ހަފްލާގައި ބައިވެރިވުމަށް ދައުވަތު އަރުވާފައެވެ.

އީޕީއެސް ސްކޫލް އުފެދުނީ މީގެ 50 އަހަރު ކުރިން 21 ޖޫން 1968 ގައެވެ. އީޕީއެސް ފައުންޑޭޝަންގެ އަމާޒަކީ އަދި އުންމީދަކީ އީޕީއެސްގެ ނަން އަބަދުމެ ދެމިހުރުމެވެ.