ލަންކާގެ ޑިފެންސް ސެކެޓްރީގެ މަގާމަށް ކުރީގެ ކޮމާންޑަރެއް އައްޔަނުކޮށްފި

ލަންކާގެ ޑިފެންސް ސެކެޓްރީގެ މަގާމަށް ކުރީގެ އަސްކަރިއްޔާގެ ކޮމާންޑަރެއް ކަމުގައިވާ، ޖެނެރަލް ޝާންތަ ކޮއްޓެގޮޑަ އެ ގައުމުގެ ރައީސް މައިތިރިޕާލަ ސިރިސޭނާ އައްޔަނު ކޮށްފިއެވެ.

ހޯމަ ދުވަހު ރައީސް ސިރިސޭނާ އޮފީހުގައި ބޭއްވެވި ހަފުލާއެއްގައި ޖެނެރަލް ކޮއްޓެގޮޑައާ މަގާމުގެ ފަތްކޮޅު ހަވާލުކުރައްވާފައި ވަނީ، ސިރިސޭނާއެވެ.

ލަންކާގެ އަސްކަރިއްޔާއަށް ގިނަ ދުވަސްތަކެއް ވަންދެން ހިދުމަތް ކޮށްދެއްވާފައިވާ ކޮއްޓެގޮޑައަކީ ލަންކާ އަސްކަރިއްޔާގެ 17 ވަނަ ކޮމާންޑަރެވެ. އޭނާ އަކީ ލަންކާގެ މައުންޓް ލެވީނިއާގައި ހުންނަ ސެއިންޓް ތޯމަސް ކޮލެޖުގެ ދަރިވަރެކެވެ.

ޖެނެރަލް ކޮއްޓެގޮޑަ ޑިފެންސް ސެކެޓްރީގެ މަގާމަށް އައްޔަނު ކުރަން ޖެހުނީ، ކުރިން އެ މަގާމުގައި ހުންނެވި ހެމަސިރީ ފަނާންޑޯ މަގާމުން އިސްތުއުފާ ދެއްވުމާ ގުޅިގެންނެވެ. ފަނާންޑޯ އިސްތިއުފާ ދެއްވީ މިދިޔަ ހަފުތާގެ އާދިއްތަ ދުވަހު ދިން ބޮމުގެ ހަމަލާގެ އިންޒާރު ލިބި، އެކަން ހުއްޓުވުމުގައި ނާކާމިޔާބު ވުމާ ގުޅިގެންނެވެ. އިސްތިއުފާ ދެއްވިއިރު، ރައީސް ސިރިސޭނާ ވެސް ވަނީ އޭނާ މަގާމުން އިސްތިއުފާ ދިނުމަށް އެދިވަޑައިގެންފައެވެ. ލަންކާގައި ޑިފެންސް ސެކެރެޓްރީ ވަކިކުރެވެނީ ގާނޫނު ހަދާ މަޖިލީހުން ފާސްކޮށްގެންނެވެ.