ފުލުހުންގެ ބެލުމުގެ ދަށުގައި ހުރި ގިނަ އަދަދެއްގެ މަސްތުވާތަކެތި ނައްތާލައިފި
29 އެޕްރީލު 2019 | ހޯމަ 07:31ނައްތާލާފައި ވަނީ 2011 އިން 2019 އަށް އެކި މައްސަލަތަކުގައި ގެނެސްފައިވާ ތަކެތި
މޯލްޑިވިސް ޕޮލިސް ސަރވިސް
އެކިއެކި މައްސަލަތަކާ ގުޅިގެން ފުލުހުންގެ ބެލުމުގެ ދަށަށް ގެނެސްފައިވާ ތަކެތީގެ ތެރެއިން، ފުލުހުންގެ ބެލުމުގެ ދަށުގައި ހުރި ގިނަ އަދަދެއްގެ ބަނގުރަލާއި މަސްތުވާތަކެތި ނައްތާލައިފިއެވެ.
އާދީއްތަ ދުވަހު ނައްތާލާފައި ވަނީ 2011 އިން 2019 އަށް އެކި މައްސަލަތަކުގައި ފުލުހުންގެ ބެލުމުގެ ދަށަށް ގެނެސްފައިވާ ބަގުރަލާއި އަދި މިއަހަރުގެ އެކި މައްސަލަތަކުގައި ފުލުހުންގެ ބެލުމުގެ ދަށަށް ގެނެސްފައިވާ މަސްތުވާތަކެއްޗެވެ. އެގޮތުން ނައްތާލި ބަނގުރަލުގެ ތެރޭގައި ހިމެނެނީ 16 މައްސަލައަކާއި 20 އިންސިޑެންޓްގައި ފުލުހުންގެ ބެލުމުގެ ދަށަށް ގެނެސްފައިވާ 49 ފުޅި ބަނގުރަލާއި 78 ޕެޓް ފުޅި އާއި 13 ބިއަރު ދަޅާއި 20 ލީޓަރުގެ ހަތް ޓައްޕުގައި ހުރި ބަނގުރަލުގެ އިތުރުން 20 ލީޓަރުގެ 2 ހަމުގައި ހުރި ބަނގުރަލެވެ.
ނައްތާލި މަސްތުވާތަކެތި
މީގެ އިތުރުން އިއްޔެ ނައްތާލި މަސްތުވާތަކެތީގެ ތެރޭގައި 5130 މަނާ ބޭސް ގުޅަ އާއި 601 ރަބަރު ޕެކެޓާއި 110 ސެލޯފިންކޮޅާއި ފިލްމް ހުސްކުރި ފަސް ދަޅުގެ އިތުރުން ދެ ބިޑި ހިމެނެއެވެ.
ބަނގުރަލާއި މަސްތުވާތަކެތި ނައްތާލުން ދޫނިދޫގައި ކުރިއަށް ގެންގޮސްފައި ވަނީ ފުލުހުންގެ ބެލުމުގެ ދަށަށް ގެނެވޭ ބަނގުރަލާއި މަސްތުވާތަކެއްޗާ ބެހޭ މައްސަލަތަކުގައި ހެކީގެ ގޮތުގައި ހިފެހެއްޓޭ އެއްޗެއްސާ މެދު އަމަލުކުރާނެ ގޮތުގެ ޤަވާއިދުގެ ދަށުން އެކަމަށްޓަކައި އެކުލަވާލި ކޮމިޓީގެ ބެލުމުގެ ދަށުން ކަމަށް ފުލުހުން ވަނީ ބުނެފައެވެ.
