ލަންކާ އެއާޕޯޓަށްދާން އޮންނަ މަގުތައް އަލުން ހުޅުވާލައިފި
ަމަގުތައް މިހާރު ވަނީ ހުޅުވާލާފައި
ހަމަލާތަކުގައި މަރުވި މީހުންގެ އަދަދު 359 އަށް އަރާ
އާދިއްތަ ދުވަހު ލަންކާއަށް ދެވުނު ޓެރެރިސްޓް ހަމަލާތަކަށް ފަހު، މައި އެއާޕޯޓް ބަންޑާރަނައިކެ އިންޓަނޭޝަނަލް އެއާޕޯޓަށް ދެވެން އޮންނަ މަގުތައް އާއްމުކޮށް ހުޅުވާލައިފިއެެވެ.
އާދިއްތަ ދުވަހުގެ ހަމަލާތަކަށް ފަހު ޖެހިގެން އައި ހޯމަ ދުވަހު އެއާޕޯޓާއި، އެއާޕޯޓަށް ދެވެން އޮންނަ މަގުތައް ބަންދުކުރީ އެއާޕޯޓާއި ކައިރި ސަރަހައްދަކުން ބޮމެއް ފެނިގެންނެވެ. އަދި އެއާޕޯޓަށް ދާން އޮންނަ މަގުތައް ބަންދުކޮށް ސެކިއުރިޓީ ވަރުގަދަކުރިއެވެ.
ހޯމަ ދުވަހު އެއާޕޯޓް ސަރަހައްދުން ހަފޫޓްގެ ޕީޕީސީ ހޮޅިއެއްގެ ތެރޭގައި ހަދާފައިވާ މި ބޮން ނުވަތަ (އައިއީޑީ) ފެނުނީ، އެއާފޯސްގެ އެކްސްޕްލޯސިވް އޯޑްނަންސް ޓީމަށެވެ. އެ ބޮން ވަނީ އެކަހެރި ސަރަޙައްދަކަށް ގެންގޮސް ރައްކާތެރިކަމާއިއެކު ނައްތާލާފައެވެ.
ހޯމަ ދުވަހުގެ ފަހުން ވެސް ވަނީ، އެއާޕޯޓްގެ ހިދުމަތްތައް ވަގުތީ ގޮތުން ހުއްޓާލާ އެއާޕޯޓާ އިންވެގެން އޮންނަ މަގަކުން ފެނުނު ޝައްކުކުރެވޭ ވެހިކަލެއް ފާސްކޮށްފައެވެ. އަދި އެ ސަރަހައްދުގައި ހާއްސަ އޮޕަރޭޝަނެއް ހިންގާފައިވެއެވެ. އެހެން ނަމަވެސް އެއްވެސް އެފަދަ ނުރައްކަލެއް ފެންނަން ނެތުމުން އަލުން މަގުތައް ހުޅުވައިލީއެވެ.
ސްރީލަންކާގައި އާދީއްތަ ދުވަހު ދިން ސިލްސިލާ ބޮމުގެ ހަމަލާތަކުގައި މަރުވި މީހުންގެ އަދަދު 359 އަށް އަރާފައިވާ ކަމަށް ލަންކާގެ ނިއުސްފަަސްޓްގައި ރިޕޯޓް ކޮށްފައި ވެއެވެ.
މީގެ އިތުރުން މިހާތަނަށް ހައްޔަރު ކުރި މީހުންގެ އަދަދު 40 އަށް ވަނީ އަަރާފަައެވެ.
