ގައުމުތަކާއި ދައުލަތްތަކަށް ހުރި އެންމެ ނުރައްކާތެރި ގޮންޖެހުމަކީ ހަރުކަށި ޖަމާއަތްތަކާއި ހައްދު ފަހަނަޅާފައިވާ ފިކުރުތަކާއި ވަކި ވަކި ފަރުދުން ދޭ ނުރައްކާތެރި ހަމަލާ ކަމަށް ޗީފް އޮފް ޑިފެންސް ފޯސް މޭޖަރ ޖެނެރަލް ޢަބްދުﷲ ޝަމާލް ވިދާޅުވެއްޖެއެވެ. 

އަންގާރަ ދުވަހުގެ ރޭ ބޭއްވި ސިފައިންގެ 127 ވަނަ އަހަރީ ދުވަހުގެ ޚާއްސަ ޖަލްސާގައި ވާހަކަ ދައްކަވަމުން ޝަމާލް ވިދާޅުވީ ގައުމަތަކަށް ނުރައްކާތެރި ވަނީ ކޮންސަބަބު ތަކާއި ހުރެކަން އަވަށްޓެރި ސްރީލަންކާގައި ހިނގައިދިޔަ ކަންތައްތަކުން ވެސް އެނގިގެން ދާކަމަށާއި އަސްކަރިއްޔާތަކުގެ އަމާޒު މިއަދު ބަދަލުވެ ، ދިމާވެދާނެ ކޮންމެ ހާލަތަކަށް ތައްޔާރު ވާން ޖެހޭ ކަމަށެވެ. އެހެން ގައުމުތަކާ ހިލާފަށް ރާއްޖެއަކީ ކަނޑުގެ ސަރަހައްދު ބޮޑު ، ސަލާމަތާއި ރައްކާތެރިކަން ކަނޑުގެ ސަރަހައްދަށް ގުޅިލާމެހިފައިވާ ގައުމެއްކަން ފާހަގަ ކުރައްވައި ޝަމާލް ވިދާޅުވީ އަސްކަރިއްޔާ އަކީ ދިމާވެދާނެ ކޮންމެ ނުރައްކައުތެރި ހާލަތަކަށް މަސަތްކަތް ކުރެވޭނެ ބަޔަކަށް ވުން މުހިންމު ކަމަށާއި ދިވެހި ސިފައިން ވާންޖެހޭނީ މި ޖަޒީރާ ފަރުތަކާއި ފަޅުަތައް ފަރިތަ ހިންގަން ޖެހޭ އަސްކަރީ ކޮންމެ ހާއްސަ އޮޕަރޭޝަނެއް ހިިންގޭނެ ބައެއްގެ ގޮތުގައި ކަމަށެވެ. ޕައިރެސީ ، ޑްރަގް ޓްރެފިކިންގް އަދި ގަން ރަނިންގް ފަދަ ކަންތައްތަކަކީ އިންޑިއާ ކަނޑުގައި ވަމުންދާ ކަންތައް ކަމަށާއި އެއީ ގައުމަށް ވަރަށް ބޮޑަށް ނުރައްކާވާ ކަމެއްގެ ގޮތުގައި ކަމަށް ޝަމާލް ވިދާޅުވިއެވެ.

 ޗީފް އޮފް ޑިފެންސް ފޯސްގެ ވާހަކަފުޅުގައި ދިވެހި އަސްކަރިއްޔާ އަކީ މި ޤައުމުގައި އޮތް އެންމެ ގިނަ ދުވަސްވީ އެންމެ ކަރާމާތްތެރި އެއް މުއައްސަސާކަމަށް ރައްޔިތުން ޝައްކެއް ނުކުރައްވާނެކަން ފާހަކުރެއްވިއެވެ. އަދި ސިފައިންނަކީ މި ލޮބުވެތި ވަޠަންގެ މިނިވަންކަމުގެ އައްޑަނަ ކަމަށާއި ޤައުމާއި ރައްޔިތުންގެ ސަލާމަތާއި ރައްކާތެރިކަމުގެ ހިމާޔަތުގެ އައްޑަނަ ކަމަށް ވިދާޅުވިއެވެ.

މީގެއިތުރުން ޝަމާލްގެ ވާހަކަފުޅުގައި ސިފައިންގެ ވެލްފެއަރގެ ކަންކަން ރަނގަޅު ކުރުމަށްޓަކައި ކުރެވެމުންދާ މަސައްކަތްތަކާއި ދިވެހިރާއްޖޭގެ ޤައުމީ ދިފާޢީ ބާރުގެ އޮޕަރޭޝަނަލް ކެޕޭސިޓީ ވަރުގަދަކުރުމުގެ މަސައްކަތްތައް ކުރެވެމުންދާކަން ފާހަގަ ކުރެއްވިއެވެ. ސިފައިންގެ ތެރޭގައި އިންސާފާއި ހަމަހަމަކަމާއި އުސޫލުތަކާއި ނިޒާމުތައް ހަރުދަނާކޮށް ޤާއިމުކުރުމުގެ އިތުރުން އާންމު ރައްޔިތުންނާ އޮންނަ ގުޅުން އިހުނަށް ވުރެ ރަނގަޅު ކުރުމަށް މަސައްކަތް ކުރައްވަމުން ގެންދަވާ ކަމަށާއި މިކަންކަން ކުރުމަށްޓަކައި ރައީސުލްޖުމްހޫރިއްޔާ އަދި ސިފައިންގެ އެންމެ މަތީވެރިޔާ ގެންދަވަނީ ވަރަށް ގާތުން ކަންކަން ބައްލަވަމުންކަން ފާހަގަކުރައްވާ ދިވެހި ސިފައިންނާއި ސިފައިންގެ ޢާއިލާތަކުގެ ނަންފުޅުގައި އެމަނިކުފާނު ވަނީ ޝުކުރު އަދާކުރައްވާފައެވެ. އަދި މި ކަންކަން ހަމަޖައްސަވައި ދެއްވުމުގައި ދިފާޢީ ވަޒީރު ކުރައްވަމުންގެންދަވާ މަސައްކަތްޕުޅާއި ދެއްވި އިސްކަން ފާހަގަކުރައްވާ އެކަމަނާއަށް ވެސް ވަނީ ޝުކުރު ދަންނަވާފައެވެ.