18 ވަނަ މަޖިލީހުގެ އެންމެ ފަހުގެ ޖަލްސާ މި މަހުގެ 29 ގައި
ފަހު ޖަލްސާ ބާއްވާނީ މިމަހުގެ 29 ވަނަ ދުވަހުގެ ހެނދުނު 9:00 ގައި
ރައްޔިތުންގެ މަޖިލީހުގެ ރައީސް ގާސިމް އިބްރާހިމް
ހިނގަމުން މިދާ ރައްޔިތުންގެ މަޖިލީހުގެ އެންމެ ފަހުގެ ޖަލްސާ ބޭއްވުމަށް ހަމަޖެހިފައި ވަނީ މިމަހުގެ 29 ވާ ހޯމަ ދުވަހުގައި ކަމަށް ރައްޔިތުންގެ މަޖިލީހުގެ ރައީސް ގާސިމް އިބްރާހިމް ވިދާޅުވެއްޖެއެވެ.
އަންގާރަ ދުވަހު އޮތް ރައްޔިތުންގެ މަޖިލީހުގެ ޖަލްސާ ފެއްޓެވުމުގެ ކުރިން މަޖިލީހުގެ ރައީސް ގާސިމް އިބްރާހިމް ވިދާޅުވީ ހިނގަމުން މިދާ ރައްޔިތުންގެ މަޖިލީހުގެ ފަހު ޖަލްސާ ބާއްވާނީ މިމަހުގެ 29 ވަނަ ދުވަހުގެ ހެނދުނު 9:00 ގައި ކަމަށެވެ.
" މާދަމާ އާއި އަނެއް ދުވަހާ އެކަނި މަޖިލިސް ހިނގާނީ ރަސްމީ ސިފައެއްގައި. 29 ވަނަ ދުވަހުގެ ހެނދުނު 9:00 ގައި އެންމެ ފަހު ޖަލްސާ އޮންނާނީ،" ގާސިމް ވިދާޅުވި އެވެ.
އަށާރަވަނަ ރައްޔިތުންގެ މަޖިލީހުގެ ފަހު ދައުރު ހިނގަމުން ދާއިރު 19 ވަނަ ރައްޔިތުންގެ މަޖިލީސް ހުވާކުރުމަށް ހަމަޖެހިފައިވަނީ އަންނަ މެއި މަހުގެ 28 ގައެވެ.
ނަވާރަ ވަނަ މަޖިލީހަށް މެމްބަރުން ހޮވުމަށް ބޭއްވި އިންތިޚާބުގައި 65 ގޮނޑި މޯލްޑިވިއަން ޑިމޮކްރަޓިކް ޕާޓީ އެމްޑީޕީއަށް ވަނީ ލިބިފައެވެ. ޖޭޕީ އަށް ފަސް ގޮނޑި، ޕީޕީއެމް އަށް ފަސް ގޮނޑި، ޕީއެންސީއަށް ދެ ގޮނޑި ، އެމްޑީއޭއަށް ދެ ގޮނޑި އަދި އަމިއްލަ ގޮތުން ވާދަކުރި ކެންޑިޑޭޓުންނަށް ހަތް ގޮނޑި ވަނީ ލިބިފައެވެ. މިފަހަރުގެ މަޖިލީހުގައި 87 މެމްބަރުން ތިއްބަވާނެއެވެ. 19 ވަނަ ރައްޔިތުންގެ މަޖިލީހުގެ މެމްބަރުންނާއިއެކު މިއަހަރުގެ ދެވަނަ ދައުރު ގަވައިދުގައި ވާގޮތުން ފަށާނީ ޖޫން މަހުގެ ތެރޭގައެވެ.
