ނުހެދި ހުރި ރަށްތަކުގެ މުއްދަތު އިތުރުކުރަން މަޖިލީހަށް ބިލެއް
22 އެޕްރީލު 2019 | ހޯމަ 07:20މި ބިލް ރައްޔިތުންގެ މަޖިލީހަށް ހުށަހެޅުއްވީ ބިލެތްދޫ ދާއިރާގެ މެމްބަރު އަހްމަދު މުބީން
މެދުފުށި އައިލެންޑް ރިސޯޓްގެ މަންޒަރެއް
ޓޫރިސް ރިސޯޓް ތަރައްގީ ކުރަން ދޫކޮށްފައިވާ ރަށްރަށާއި ބިންބިމާ ގުޅިގެން އެތަންތަން ކުއްޔަށް ދޫކޮށްފައިވާ މުއްދަތު އިތުރު ކުރަން ޓުއަރިޒަމާއި ބެހޭ ގާނޫނަށް އިސްލާހު ގެނައުމުގެ ބިލެއް ރައްޔިތުންގެ މަޖިލީހަށް ހުށަހަޅައިފިއެވެ.
މި ބިލް ރައްޔިތުންގެ މަޖިލީހަށް ހުށަހެޅުއްވީ ބިލެތްދޫ ދާއިރާގެ މެމްބަރު އަހްމަދު މުބީންއެވެ.
މުބީން ހުށަހެޅުއްވި އިސްލާހުގައި ބުނެފައިވަނީ ޓޫރިސްޓް ރިސޯޓް ތަރައްގީ ކުރުމަށް ދޫކޮށްފައިވާ ރަށްރަށާއި ބިންބިމާ ގުޅިގެން އެތަންތަން ކުއްޔަށް ދޫކޮށްފައިވާ މުއްދަތު އިތުރުކޮށް ނުދެވިއްޖެނަމަ ، ކަނޑައެޅިފައި އޮތް ސުންގަޑިއަށް ފައިސާ ދައްކާ މުއްދަތު އިތުރު ނުކުރެވުނު ފަރާތްތަކަށް ބޮޑެތި ގެއްލުމާ ކުރިމަތިލާން ޖެހިފައިވާ ކަމަށެވެ. އޭގެ ސަބަބުން ރާއްޖޭގެ ޓުއަރިޒަމް ސިނާއަތަށް ބޮޑެތި ލޮޅުން އަރާ، އޭގެ ސަބަބުން ދައުލަތަށް ވަންނަން އޮތް ފައިސާއަށް ހުރަސްއެޅޭނެ ކަމަށެވެ. މި އިސްލާހުގެ ސަބަބުން ޓޫރިސްޓް ރިސޯޓް ތަރައްގީ ކުރުމަށް ދޫކޮށްފައިވާ ރަށްރަށާއި ބިންބިން ކުއްޔަށް ނަގާފައިވާ ފަރާތްތަކަށް އެކަށީގެންވާ ހުޅުވިފައިވާ ވިޔަފާރި އުސޫލުން ވިޔަފާރިކުރުމުގެ މަގު ފަހިވެ، ދިވެހި ދައުލަތަށް ލިބެން ހުރި ފައިސާ ގާނޫނީ ހަމަތަކުގެ މަތިން ލިބޭނޭ ފުރުސަތު ފަހިވެގެންދާނެ ކަމަށެވެ.
ބިލްގައި ބުނެފައިވަނީ ޓުއަރިޒަމާއި ބެހޭ ގާނޫނުގެ އަށްވަނަ މާއްދާއަށް އިސްލާހު ގެނެސް މި ގާނޫނަށް އަމަލުކުރަން ފަށާ ތާރީޚުން ފެށިގެން ހަތަރު މަސްދުވަހުގެ ތެރޭގައި، އެކަމަށް އެދި ޓުއަރިޒަމާބެހޭ މިނިސްޓްރީއަށް ހުށަހަޅަންވާނެ ކަމަށެވެ. އެފަދައިން ހުށަހަޅާ ހުށަހެޅުންތައް ފުރިހަމަ ކަމަށްވާނަމަ، އެއް މަސްދުވަހުގެ ތެރޭގައި ޓުއަރިޒަމް މިނިސްޓްރީއަށް ހުށަހަޅަންވާނެ ކަމަށް ބިލްގައި ބުނެފައިވެއެވެ.
