ލަންކާގައި ދިން ބޮމުގެ ހަމަލާއާއި ގުޅިގެން 13 މީހަކު ހައްޔަރު ކޮށްފި
ހައްޔަރު ކުރި އެއްވެސް ބައެއްގެ ވަނަވަރު މިހާތަނަށް ހާމަކޮށްފައެއް ނުވޭ
ކުރިން ވަނީ ހަތް މީހަކު ހައްޔަރު ކޮށްފައި
ލަންކާގައި ދިން ބޮމުގެ ހަމަލާއާއި ގުޅިގެން 13 މީހަކު ހައްޔަރު ކޮށްފިކަމަށް ރިޕޯޓްތައް ބުނެފިއެވެ.
ސްރީ ލަންކާގެ ޑިފެންސް މިނިސްޓަރ އާއި ހަވާލާ ދީ ބައިނަލްއަގުވާމީ ބައެއް ނޫސްތަކުގައި ބުނެފައިވަނީ، ކުރިން ހައްޔަރުކުރި ހަތް މީހުންގެ އިތުރުން، އިތުރު ހަ މީހަކު މިހާރު ހައްޔަރު ކޮށްފައިވާ ކަމަށެވެ.
13 މީހުން ހައްޔަރު ކުރިކަމަށް ބައެއް ނޫސްތަކުގައި ބުނެފައިވީ ނަމަވެސް ހައްޔަރު ކުރި އެއްވެސް ބައެއްގެ ވަނަވަރު މިހާތަނަށް ހާމަކޮށްފައެއް ނުވެއެވެ.
ލަންކާގެ ޑިފެންސް މިނިސްޓަރ ރުވާން ވިޖޭވަރުދަނަ ވިދާޅުވީ އެ ގައުމުގައި ހަރަކާތްތެރިވާ ހަރުކަށި ވިސްނުމުގެ ގުރޫޕްތަކާ ދެކޮޅަށް ހަރުކަށި ފިޔަވަޅު އަޅުއްވާނެ ކަމަށާއި އެ ކަންތައްތައް ހުއްޓުމަކަށް ގެންނާނެ ކަމަށެވެ. ހަމަލާއާއި ގުޅިގެން ފުރަތަމަ ހައްޔަރު ކުރި 7 މީހުން ހައްޔަރު ކޮށްފައި ވަނީ ކޮލަމްބޯ އާއި ނިގަންބޯ އަދި ބަޓިކޯލާއިންނެވެ.
ލަންކާގެ ހަތަރު ފައްޅިއަކާއި ބައެއް ހޮޓާތަކަށް ވެސް އަމާޒުކޮށް އާދިއްތަ ދުވަހު ދިން ހަމަލާއާއި ގުޅިގެން މިހާތަނަށް 207 މީހަކު ވަނީ މަރުވެފައެވެ. އަދި މި ހަމަލާތަކުގައި ޒަހަމްވި މީހުންގެ އަދަދު މިހާރުވަނީ 500 އަށް ވުރެ މައްޗަށް އަރާފައެވެ.
