ލަންކާގެ ހަމަލާތަކުގައި ދިވެހިންގެ އެއްވެސް ބައިވެރިވުމެއް މިހާތަނަށް ނެތް: ދިވެހި ފުލުހުން

އަވަށްޓެރި ސްރީ ލަންކާގައި އާދީއްތަ ދުވަހު ދިން ބޮމުގެ ހަމަލާތަކުގައި ދިވެހިންގެ އެއްވެސް ބައިވެރިވުމެއް އޮތްކަން އެ ޤައުމުގެ ފުލުހުން މިހާތަނަށް ދިވެހި ފުލުހުންނާ ހިއްސާކޮށްފައިނުވާ ކަމަށާއި، އެ ހަމަލާތަކާ ގުޅިގެން ހައްޔަރުކުރި މީހުންގެ ތެރޭގައި ވެސް ދިވެއްސަކު ހިމެނޭ ކަމުގެ މައުލޫމާތު ލިބިފައި ނުވާ ކަމަށް ދިވެހި ފުލުހުން ބުނެފިއެވެ.

ސަލާމަތީ ޚިދުމަތްތަކުން ނޫސްވެރިންނަށް މަޢުލޫމާތުދިނުމަށް އާދިއްތަ ދުވަހު ބޭއްވި ނިއުސް ބްރީފިންގއެއްގައި ކޮމިޝަނަރ އޮފް ޕޮލިސް މުޙައްމަދު ހަމީދު ވިދާޅުވީ، ހަމަލާތަކާއި ގުޅިގެން ހައްޔަރުކޮށްފައިވާ 7 މީހުންގެ ތެރޭގައި ދިވެއްސަކު ހުރި ކަމުގެ، ނުވަތަ މި ހަމަލާގައި ދިވެހިންގެ ބައިވެރިވުމެއް އޮތްކަމުގެ އެއްވެސް އިޝާރާތެއް މިހާތަނަށް ވެފައި ނުވާ ކަމަށެވެ.

"ހިނގައިދިޔަ ބޮމުގެ ހަމަލާއާ ގުޅިގެން، ބަޔަކު މީހުން ހައްޔަރުކޮށްފަ ތަހުގީގު ހިނގަމުންދާ ކަމަށް މަޢުލޫމާތު ލިބިފަ އެބަހުރި. އެހެންނަމަވެސް މިހާތަނަކަށް އެއްވެސް ދިވެއްސެއްގެ ބައިވެރިވުމެއް، ދިވެއްސަކު ތަހުގީގަކަށް ހައްޔަރުކޮށްފަ ވާ ކަމަކަށް އަޅުގަނޑުމެންނަށް ސްރީ ލަންކާގެ ކަމާބެހޭ އެއްވެސް ވުޒާރާއަކުން އެއްވެސް އޮތޯރިޓީއަކުންނެއް ހާމަކޮށްފައެއް ނުވޭ," ހަމީދު ވިދާޅުވިއެވެ.

ހަމީދު އިތުރަށް ވިދާޅުވީ އާދީއްތަ ދުވަހު ހިނގާދިޔަ ކަންކަމާ ގުޅިގެން، ޓެރަރިޒަމްގެ އަމަލުތަކަށް ހިތްވަރު ލިބޭ ގޮތަށް ސޯޝަލް މީޑިއާގައި މެސެޖެއް ދައުރުކުރަމުންދާ ކަމަށެވެ. ހަމީދު ވަނީ އެފަދަ މެސެޖްތައް ސޯޝަލްމީޑިއާގައި ނުލިޔުމަށާއި، އެފަދަ ކޮންޓެންޓް ހިއްސާ ނުކުރުމަށް ގޮވާލައްވާއެވެ. އަދި ހަމަ މިއާ އެކު އޮންލައިން ނޫސްތަކުގެ ކޮމެންޓް ސެކްޝަންތަކުގައި ޓެރަރިޒަމަށް ހިތްވަރުލިބޭ ފަދަ ކޮމެންޓްތައް ލިޔަމުންދާ ކަމަށާއި، ނޫސްތަކުން މިކަމަށް ސަމާލުވުމަށް ވެސް ހަމީދު ގޮވާލެއްވިއެވެ.

ހަމީދު ވިދާޅުވީ އެފަދަ ކަންކަން ކުރާ ފަރާތްތަކާ މެދު އަޅަންޖެހޭ ފިޔަވަޅުތައް އަޅަމުން ދާނެ ކަމަށެވެ.

ނަޞާރާއިން ފާހަގަކުރާ އީސްޓަރއާ ދިމާކޮށް، ލަންކާގެ އެކި ހިސާބުތަކުގައިވާ އީސާއީ ފައްޅިތަކާށާއި، އީސްޓަރ ފާހަގަކުރުމަށް ހެނދުނުގެ ނަސްތާ ބާއްވަމުންދިޔަ ބޮޑެތި ޓުއަރިސްޓް ހޮޓާތަކަށް ހަށި ގޮއްވައިގެންނާއި އެހެން ގޮތްގޮތުން ދިން 8 ހަމަލާގައި މިހާތަނަށް 200 އަށްވުރެ ގިނަ މީހުން މަރުވެ، 500 އަށްވުރެ ގިނަ މީހުން ވަނީ ޒަޚަމްވެފައެވެ. މި ހަމަލާ ދިނުމުގައި ބައިވެރިވި ކަމަށް ތުހުމަތު ކުރެވޭ ޖަމާއަތަކަށް ނިސްބަތްވާ 7 މީހަކު މިހާރު ހައްޔަރުކޮށްފައިވާއިރު، ލަންކާގައި ކަރފިއު އިޢުލާނުކޮށް، ސަލާމަތީ ކަންކަން ވަރުގަދަކުރުމަށް އެ ޤައުމުގެ ކަމާއިބެހޭ ފަރާތްތަކުން ދަނީ މުހިއްމު ފިޔަވަޅުތަކެއް އަޅަމުންނެވެ.