ވައުދެއް ނުފެއްދި އޮތުމަށް ދައްކާނެ އެއްވެސް ބަހަނާއެއް ނެތް!

ވެރިކަން ހިންގާ މައި ޕާޓީއަކީ އެމްޑީޕީއެވެ. އާ ގާނޫނުއަސާސީގެ ދަށުން ދެ ވަނަ ފަހަރަށް އެ ޕާޓީން ވެރިކަން ކުރަމުންދަނީ ޕާޓީތައް ހިމެނޭ ކޯލިޝަނަކުންނެވެ. އެމްޑީޕީން ވެރިކަން ކުރަމުންދަނީ ގާނޫނީ ބާރުވެރިކަމާއެކުގައެވެ. މަޖިލީހުގެ ސާފު އަގުލަބިއްޔަތު ވެސް އެ ޕާޓީއަށް ވަނީ ލިބިފައެވެ. ރައީސުލްޖުމްހޫރިއްޔާގެ މަގާމަށް ރައީސް ސޯލިހު ވަޑައިގެންނެވުމާ އެކު އެ ޕާޓީގެ އެންމެ އިސް ލީޑަރަކީ އެމަނިކުފާނެއެވެ. ރައީސް ސޯލިހު ވެރިކަމަށް ވަޑައިގެންނެވީ ވަރަށް ގިނަ ވައުދުތަކަކާ އެކުގައެވެ. އިންތިހާބުގައި އެންމެ ގިނަ ރަށްތަކަށް ވަޑައިގެންނެވި ކެންޑިޑޭޓަކީ ރައީސް ސޯލިހެވެ. އެމަނިކުފާނު ވަނީ ރައްޔިތުންގެ ޝަކުވާތައް އަޑުއައްސަވައި، ގުޅިފައިވާ ޕާޓީތަކުގެ މެނިފެސްޓޯ އިއުލާން ކުރައްވާފައެވެ. ރާއްޖެއަށް މިވަގުތު އެންމެ މުހިއްމީ އިންސާފުވެރި ފަނޑިޔާރުގެއެއް ކަމަށާއި ނާއިންސާފުންކޮށްފައިވާ ހުކުމްތައް ރިވިއު ކުރެވެންޖެހޭ ކަމަށާއި ވާދަވެރި ސިޔާސީ މާހައުލެއް ތަނަވަސްކޮށްދޭނެ ކަމަށް ވައުދުވެވަޑައިގެންނެވިއެވެ.

ޒުވާނުންގެ ބޭނުން ނަހަމަ ގޮތުގައި ހިފުން ހުއްޓުވައި، މަސްތުގެ ވަބާއިން މުޖުތަމައު ރައްކާތެރި ކުރާނެ ކަމަށް ވައުދު ވީ ގުޅިފައިވާ ޕާޓީތަކުންނެވެ. އިޖުތިމާއީ ރައްކާތެރިކަން ކަށަވަރުކޮށް، ސަލާމަތީ ހިދުމަތްތައް ސިޔާސީ ނުފޫޒުން ރައްކާތެރި ކުރާނެ ކަމަށް ވެސް ވައުދުވިއެވެ. ސަރަހައްދީ ސަލާމަތާއި ރައްކާތެރި ކަމަށް ބުރޫ އަރާނެ ކަމެއް ރާއްޖެއިން ނުކުރާނެ ކަމަށް ވެސް ވައުދުވީ ރައީސް ސޯލިހެވެ.

ރާއްޖެފަދަ އިސްލާމީ ދައުލަތަކުން އިސްލާމީ ގައުމުތަކާ ގުޅުން ކަނޑާލައި، ބާކީވެފައިވާ ގައުމަކަށް ރާއްޖެ ވެގެން ނުދާނެ ކަމަށް ވެސް ވައުދުވިއެވެ. ބާރުގަދަ، ނުފޫޒު ގަދަ ގައުމެއްގެ އަތް ދަށަށް ރާއްޖެ ދީލާ ނުލާނެ ކަމަށް ވެސް، ބުންޏެވެ. ރާއްޖޭގެ މާލީ ނިޒާމް ވަކި ގައުމަކަށް ބަރޯސާވެފައި އޮތް އޮތުން ހުއްޓުމަކަށް ގެނެސް، ދައުލަތް ދަރަނިވެރިވުން ހުއްޓުވާނެ ކަމަށް ވެސް ބުންޏެވެ.

އެންމެހާ ނުފޫޒުތަކުން އެއްކިބާވެފައިވާ ރައްޔިތުންގެ އިންސާނީ ކަރާމާތާއި ހައްގުތައް ރައްކާތެރިކޮށް، ގާނޫނުއަސާސީ އާއި ގާނުނުތަކުގެ ތެރެއިން އިންސާފު ގާއިމުކޮށްދޭނެ މިނިވަން ޝަރުއީ ނިޒާމެއް ގާއިމު ކުރުމުގެ ވައުދަކީ އެމްޑީޕީގެ އެންމެ ބޮޑު ވައުދެވެ. އެގޮތުން ސިޔާސީ މަގުސަދެއް ހާސިލު ކުރުމަށް ނުހައްގުން ޖަލަށްލެވިފައިވާ ފަރާތްތަކާ މެދު ކަންކުރެވުނު ގޮތް މުރާޖާއާކޮށް، ވަކި ބަޔަކަށް ނުވަތަ ވަކި މީހަކަށް މަންފާ ހޯދުމަށް ސިޔާސީ ނުފޫޒުން ނިންމާފައިވާ މަދަނީ މައްސަލަތައް މުރާޖާ ކުރުން އޭގެ ތެރޭގައި ހިމެނެއެވެ. ދައުލަތުގެ އެންމެހާ އިދާރާތަކުގެ ސިޔާސަތުގެ ތެރެއިން ރައްޔިތުންނަށް އަނިޔާ ލިބޭ ގޮތަށް ބައްޓަންކޮށްފައިވާ ސިޔާސަތުތައް ބަދަލު ކުރުމަކީ ވެސް ގުޅިފައިވާ ޕާޓީތަކުގެ މެނިފެސްޓޯގައި ލިޔެފައިވާ ވައުދެކެވެ.

ރާއްޖޭގައި އިންސާފު ގާއިމުކޮށް، އަދުލުވެރި ދައުލަތެއް އުފެއްދުމަށްޓަކާއި ޕްރޮސެކިއުޓާ ޖެނަރަލްގެ އޮފީސް ހަރުދަނާކޮށް، ބާ އެސޯސިއޭޝަން އުފައްދައި ޕަބްލިކް ޑިފެންޑަރސް އޮފީސް ގާއިމުކޮށް، އިންތިގާލީ އަދާލަތު ގާއިމު ކުރުމަކީ އެމްޑީޕީން އުފަންކުރި ވައުދުތަކެވެ.

މިއަދު އެ ވައުދުތައް ފުއްދުމުގެ ހަގީގީ ބާރުވެރިކަން ލިބިފައި ވަނީ އެމްޑީޕީއަށެވެ. ސަބަބަކީ އާ މަޖިލީހުގެ ސާފު އަގުލަބިއްޔަތު އެ ޕާޓީއަށް ލިބިފައިވުމެވެ. ފަސްދޮޅަށް ފަސް މެމްބަރުންގެ އަގުލަބިއްޔަތާ އެކު ގާނޫނީ އޮނިގަނޑު އެކުލަވާލުމަށް އެއްވެސް ހުރަހެއް އެ ޕާޓީއަށް މިއަދަކު ނެތެވެ. ރާއްޖޭގެ ބަރުހަލަމާނީ ހަޔާތުގައި ޕާޓީއަކަށް މިހާތަނަށް ނުލިބޭ ވަރުގެ ބޮޑު އަގުލަބިއްޔަތެއް އެ ޕާޓީއަށް އެ ވަނީ ލިބިފައެވެ. އެހެންކަމުން ވައުދެއް ނުފުއްދި އޮތުމަށް ދައްކާނެ އެއްވެސް ބަހަނާއެއް އެމްޑީޕީއަށް މިހާރަކު ނެތެވެ.