އިސްކޯ ހޯދަން ޔުވެންޓަސްއިން 85 މިލިއަން ޔޫރޯ ހުށަހަޅަނީ

ރެއާލް މެޑްރިޑަށް ކުޅެމުން އަންނަ އިސްކޯ ހޯދަން ޔުވެންޓަސްއިން 85 މިލިއަން ޔޫރޯ ހުށަހަޅަން އުޅޭ ކަމަށް ރިޕޯޓްތައް ބުނެފިއެވެ.

އިޓަލީގެ ނޫސްތަކުން ބުނީ، ކުރިޔަށް އޮތް ސީޒަނަށް ތައްޔާރުވުމުގެ ގޮތުން އިސްކޯ ހޯދަން ޔުވެންޓަސް އިން މަސައްކަތް ފަށާފައިވާ ކަމަށާއި، އޭނާ ހޯދަން އެ ކްލަބުން 85 މިލިއަން ޔޫރޯ ހުށަހަޅަން ތައްޔާރު ކަމަށެވެ.

ރެއާލުން އިސްކޯ ވިއްކާލާނެކަމާ މެދު ސުވާލު އުފެދޭއިރު، އެ ކްލަބުން އަންނަނީ ޗެލްސީގެ އެޑެން ހަޒާޑް އަދި ޓޮޓެންހަމް ހޮޓްސްޕާގެ ކްރިސްޓިއަން އެރިކްސަންވެސް ހޯދަން މަސައްކަތް ކުރަމުންނެވެ.

އިސްކޯ ރެއާލްއާ އެކު ހަދާފައިވާ އެއްބަސްވުން 2017 ވަނަ އަހަރުގެ ސެޕްޓެމްބަރ މަހު ވަނީ އާކޮށްފައެވެ. އެ އެއްބަސްވުމުގެ ދަށުން އޭނާ 2022 ގެ ނިޔަލަށް ކްލަބުގައި މަޑުކުރަން ޖެހޭނެއެވެ.

ވެލެންސިއާ އިން ކެރިއަރު ފެށި އިސްކޯ ވަނީ މަލާގާ އަށް ވެސް ކުޅެފަ އެވެ. އެގޮތުން އޭނާ ވަނީ މަލާގާއާ އެކު ހޭދަކުރި ދެ ސީޒަނުގައި އެޓީމަށް ކުޅުނު 82 މެޗުގައި 17 ލަނޑު ކާމިޔާބުކޮށްފައެވެ. މަލާގާ ދޫކޮށްލުމަށް ފަހު އިސްކޯ ރެއާލްއާ ގުޅުނީ 2013 ވަނަ އަހަރެވެ.

އޭނާ ވަނީ އެ ކްލަބުގައި މިހާތަނަށް ހޭދަކުރި ހަތަރު ސީޒަނުގައި ކުޅުނު 271 މެޗުގައި 47 ލަނޑު ކާމިޔާބުކޮށް، ލަލީގާ، ސްޕެނިޝް ސުޕަރ ކަޕް، ޔުއެފާ ޗެމްޕިއަންސް ލީގު ހަތަރު ފަހަރު، ފީފާ ކްލަބް ވާރލްޑްކަޕް ތިންފަހަރު، ޔުއެފާ ސުޕާ ލީގު ތިން ފަހަރު އަދި ކޮޕާޑެލްރޭ ކާމިޔާބުކޮށްފައެވެ.

ކްލަބް ލެވެލްގައި ގިނަ ކާމިޔާބީތައް ހޯދާފައިވާ އިސްކޯ ވަނީ ސްޕެއިންގެ 21 އަހަރުން ދަށުގެ ޓީމާއެކު ޔޫރޯ ކާމިޔާބުކޮށްފަ އެވެ. މީގެ އިތުރުން އޭނާ ވަނީ 17 އަހަރުން ދަށުގެ ފީފާ ވާރލްޑްކަޕްގެ ތިންވަނަ ސްޕެއިންއާ އެކު ކާމިޔާބުކޮށްފައެވެ.