"ސާފު ގަން، އަހަރެންގެ ޒިންމާ" ގެ ނަމުގައި ލ.ގަން ސާފު ކުރުމުގެ ޕްރޮގްރާމެއް ހިންގައިފިއެވެ. 

ހޮނިހިރު ދުވަހު ގަމު ކައުންސިލުން އިސްނަގައިގެން ކުރިއަށް ގެންދިޔަ މި ޕްރޮގްރާާމާ ގުޅޭގޮތުން އެރަށު ކައުންސިލުގެ ނައިބު ރައީސް ވިދާޅުވީ، ހޮނިހިރު ދުވަހު ހެނދުނު 7:30 އިން 11:30 އަށް ކުރިއަށް ގެންދިޔަ މި ޕްރޮގްރާމްގައި ރަށުގެ ގިނަ އާންމު ރައްޔިތުންނެއްގެ އެއްބާރުލުން ލިބުނު ކަމަށާއި، އޭގެ އިތުރުން ބައެއް ސުކޫލުތަކާއި، މައި ކޮލްޖުގެ ފަރާތުންނާއި، ގަމު މެޖިސްޓްރޭޓް ކޯޓުގެ މުވައްޒަފުން ވެސް މި ހަރަކާތުގައި ބައިވެރިވެ ފުރިހަމަ އެއްބާރުލުން ދެއްވި ކަމަށް އަހުމަދު ޝާހީން ވިދާޅުވިއެވެ. އޭގެ އިތުރުން ގަމު ދާއިރާގެ އިންތިހާބީ މެމްބަރު މުހައްމަދު ވިސާމް (ސަމްޕަތު)ވެސް މި ހަރަކާތުގައި ބައިވެރިވެލެއްވި ކަމަށް ޝާހީން ވިދާޅުވިއެވެ. 

ޝާހީން އިތުރަށް ވިދާޅުވީ، މިއަދު ކުރިއަށް ގެންދިޔަ ޕްރޮގްރާމްގެ ތެރެއިން ގަމުގެ ސިނާއީ މަގުތަކާއި، މުކުރި މަގާއި ތުނޑީގެ ބަނދަރު ސަރަހައްދުގެ އިތުރުން، ތުނޑީގައި އާންމުން މޫދަށް އެރި އުޅޭ ސަރަހައްދު ސާފުކޮށް، ކުނިތައް ކުނިކޮށްޓަށް ގެންގޮސްފައިވާ ކަމަށާއި، އޭގެ ތެރެއިން ޕްލާސްޓިކް ކުނި ވަކިކޮށް މިއަންނަ ހަފްތާގެ ތެރޭގައި ތިލަފުއްޓަށް ފޮނުވުމުގެ މަސައްކަތް ކުރަމުންދާ ކަމަށެވެ. 

ގަމު ކައުންސިލުން އިސްނަގައިގެން ކުރިއަށް ގެންދިޔަ މި ޕްރޮގްރާމް އަހަރުގެ 4 ބަޔަކަށް ބަހާލައިގެން ކުރިއަށްގެންދާ ގޮތަށް ކައުންސިލުން ވަނީ ނިިންމާފައެވެ.