ކުރިއަށް އޮތް 24 ގަޑި އިރުގެ އެކި ސަރަހައްދުތަކަށް އުދަ އަރާނެ: މެޓް
މާލެއާ އައްޑޫ އަތޮޅުގެ ބައެއް ރަށްތަކަށް ވަނީ އުދަ އަރާފައި
ހުޅުދޫއަށް އުދަ އަރާފައިވާ މަންޒަރު
ކުރިއަށް އޮތް 24 ގަޑި އިރުގެ ތެރޭގައި ދިޔަވަރު ބޮޑުވާ ވަގުތުގައި ރާއްޖޭގެ އެކި ސަރަހައްދުތަކަށް އުދަ އަރާފާނެ ކަމަށް ލަފާ ކުރެވޭ ކަމަށް މެޓް އޮފީހުން ބުނެފިއެވެ.
ރާއްޖެއެމްވީއަށް މައުލޫމާތު ދެމުން މެޓް އޮފީހުގެ އޮފިޝަލަކު ވިދާޅުވީ ހުކުރު ދުވަހު މެންދުރު ދިޔަވަރު ބޮޑުވީ ގަޑީގައި މާލެއަށާއި އައްޑޫ އަތޮޅުގެ ބައެއް ރަށްތަކަށް އުދައަރާފައިވާ ކަމުގެ ރިޕޯޓް ލިބިފައިވާ ކަމަށެވެ. ކުރިޔަށް އޮތް 24 ގަޑިއިރުގެ ތެރޭގައި ދިޔަވަރު ބޮޑުވާ ގަޑީގައި އުދަ އަރާފާނެ ކަމަށް ލަފާ ކުރެވުނަސް، މި ދުވަސްވަރަކީ މޫސުން ބަދަލުވާ ދުވަސްވަރަށް ވުމާ އެކު، އުދަ އެރުމަކީ އާދައިގެ ކަމެއް ކަމަށް އޮފިޝަލް ވިދާޅުވިއެވެ.
މެޓް އޮފީހުން ކުރިއަށް އޮތް 24 ގަޑި އިރުގެ މޫސުން ލަފާކުރާގޮތުގައި ރާއްޖޭގެ އެކިހިސާބަށް ވިއްސާރަ ކުރުމާއެކު ބައެއް ރަށްތަކަށް ބޯކޮށް ވާރޭވެހި ގުގުރާނެއެވެ. ހުޅަނގާއި ހުޅަނގުއުތުރުން، ދެކުނުގެ އަތޮޅުތަކަށް ގަޑިއަކު 7 މޭލާއި 17 މޭލާ ދެމެދުގެ ބާރު މިނުގައި ވައި ޖެހޭނެއެވެ. އެހެން ހިސާބުތަކަށް ގަޑިއަކު 05 މޭލާއި 13 މޭލާ ދެމެދުގެ ބާރު މިނުގައި ވައި ޖެހޭނެއެވެ. ވިލާގަނޑުގައި ގަޑިއަކު ގާތްގަނޑަކަށް 35 މޭލަށް ވައި ގަދަ ވާނެ ކަމަށް ލަފާ ކުރެވެއެވެ.
ދެކުނުގެ ކަނޑުތައް އާދައިގެ ވަރަކަށް ގަދަ ވާނެ ކަމަށް ލަފާކުރާ އިރު، އެހެން ހިސާބުތަކުގެ ކަނޑުތައް އާދައިގެ ވަރަކަށް މަޑު ވެފައި ވިލާގަނޑުގައި އާދައިގެ ވަރަކަށް ގަދަ ވާނެ ކަމަށް މެޓް އޮފީހުން ވަނީ ލަފާކޮށްފައެވެ.
ގިނަ ދުވަސްތަކެއް ވަންދެން ރާއްޖެއަށް ވާރޭ ނުވެހި އޮތުމަށް ފަހު ވާރޭވެހެން ފަށާފައި ވަނީ މިދިޔަ ބުދަ ދުވަހުގައެވެ. އެގޮތުން އޭޕްރިލް 18 ވަނަ ދުވަހުގެ ހެނދުނު 7:19ން ހެނދުނު 7:54ށް، މާލެ ސިޓީއަށް ވާރޭ ވެހިފައިވެއެވެ.
