ރިލްވާން ގެއްލުވާލި މައްސަލާގައި ޝުމްބާ އާއި ސުވާލުކޮށްފި
ތަހުޤީޤްގައި ކޮމިޝަންގެ ފަރާތުން އަމަލުކޮށްފައިވަނީ ވަރަށް ޕްރޮފެޝަނަލްކޮށް
އަހުމަދު އަޝްރަފް (ޝުމްބާ)
މިނިވަން ނިއުސްގެ ނޫސްވެރިޔާ އަހުމަދުު ރިލްވާން ގެއްލުވާލި މައްސަލާގައި، ސޯޝަަލް މީޑިއާ އެކްޓިވިސްޓް އަހުމަދު އަޝްރަފް (ސުމްބާ) އާއި މަރުތަކާއި، ގެއްލުވާލާފައިވާ މީހުންގެ މައްސަލަތައް ބަލާ ކޮމިޝަނުން ސުވާލުކޮށްފި އެވެ.
ރައީސް އިބްރާހިމް މުހައްމަދު ސޯލިހަށް ލިބިވަޑައިގަންނަވާ ބާރުގެ ދަށުން އުފެއްދެވި ކޮމިޝަނަށް ޝުމްބާ ހާޒިރުކޮށް ސުވާލުކޮށްފައިވާކަން ހާމަކޮށް ކޮމިޝަނުން ކުރި ޓުވީޓެއްގައި ބުނީ، ޝުމްބާ އާއި ސުވާލުކޮށްފައިވަނީ ބަޔަކު ރާވައިގެން އަހުމަދު ރިލްވާން އަބްދުﷲ ގެއްލުވާލުމާއި ގުޅޭގޮތުން 2014 ވަނަ އަހަރުގެ އޮގަސްޓް މަހުގައި ކޮށްފައިވާ ޓުވީޓަކާއި ގުޅިގެން ކަމަށެވެ. އަދި އެ ޓުވީޓާއި، ގުޅިގެން ހާޒިރުކޮށް، ސުވާލުކޮށް، ކޮމިޝަނުން ބޭނުންވާ މައުލޫމާތުތައް ހޯދާފައިވާކަމަށް ކޮމިޝަނުން ބުންޏެވެ.
ކޮމިޝަނަށް ހާޒިރުކުރުމާއި ގުޅެގޮތުން ޝުމްބާ ބުނީ، ކޮމިޝަންގެ އެދުމުގެ މަތިން ކޮމިޝަނަށް ހާޒިރުވެ، ކޮމިޝަނުން ކުރި ސުވާލުތަކަށް ޖަވާބުދީފައިވާކަމަށެވެ. އަދި އެކަމުގައި ކޮމިޝަނުން ބޭނުންވާ މައުލޫމާތު ހިއްސާކުރިމަކަށާއި، ސުވާލުކުރީ އޮގަސްޓް 2014 ގައި ރިލްވާން ކަނޑުފައްތާފައިވާކަމަށް ބުނެ ކޮށްފައިވާ ޓުވީޓެއްގެ ސްކްރީން ޝޮޓާއި ގުޅޭގޮތުން ކަމަށެވެ.
ޝުމްބާ ބުނީ ތަހުޤީޤްގައި ކޮމިޝަންގެ ފަރާތުން އަމަލުކޮށްފައިވަނީ ވަރަށް ޕްރޮފެޝަނަލްކޮށް ކަމަށެވެ.
މަރާލާފައި އޮއްވާ ފެނުނު ބްލޮގަރު ޔާމީން ރަޝީދަށް 2011 ވަނަ އަހަރާއި 2012 ވަނަ އަހަރު ދީފައިވާ އިންޒާރުތަކާ ގުޅިގެން، ޕީޕީއެމް ކައުންސިލްގެ ކުރީގެ މެމްބަރު ޒާހިދު ރަމީޒު ވެސް މިދިޔަ ހަފްތާގައި ވަނީ ރިޔާސީ ކޮމިޝަނަށް ހާޒިރުކޮށް، ބަޔާން ނަގާފައެވެ.
ގޮތް ނޭނގޭ ގޮތަށް މަރާލާފައިވާ މީހުންނާއި ގެއްލިފައިވާ މީހުންގެ މަރުތައް ބަލައި އިންސާފު ހޯދައި ދިނުމަށް ރައީސް ސޯލިހު އުފެއްދެވި ރިޔާސީ ކޮމިޝަނުން ބަލަނީ 25 މަރެއްގެ މައްސަލައެވެ. އެ ކޮމިޝަނުން ތަހުގީގު ކުރަނީ 2012 ވަނަ އަހަރުން ފެށިގެން 2018 ވަނަ އަހަރުގެ ނިޔަލަށް ހިނގާފައިވާ މަރުގެ މައްސަލަތަކެވެ.
