މަރުތައް ބަލާ ކޮމިޝަނަށް ޝުމްބާ ހާޒިރުވާން އަންގައިފި
ހާޒިރު ކުރަނީ އަފްރާޝީމާއި ރިލްވާނާ ގުޅޭ ތަހުގީގަށް
ސޯޝަލް މީޑިއާ އެކްޓިވިސްޓް އަހުމަދު އަޝްރަފު (ޝުމްބާ)
މަރާލާފައިވާ މީހުންނާއި، ގެއްލުވާލާފައިވާ މީހުންގެ މައްސަލަތައް ތަޙުޤީޤުކުރާ ރިޔާސީ ކޮމިޝަނަށް ސޯޝަލް މީޑިއާ އެކްޓިވިސްޓް އަހުމަދު އަޝްރަފު (ޝުމްބާ) ހާޒިރުވާން އަންގައިފިއެވެ.
މޯލްޑިވްސް ތާރޑްވޭ ޑިމޮކްރޭޓްސް (އެމްޓީޑީ) ކައުންސިލްގެ މެމްބަރުކަން ކުރައްވާ ޝުމްބާ "ރާއްޖެއެމްވީ"އަށް ވިދާޅުވީ ބުރާސްފަތި ދުވަހުގެ މެންދުރު ރިޔާސީ ކޮމިޝަނަށް ހާޒިރުވާން އަންގާފައިވާ ކަމަށާއި އެދިފައިވާ ގޮތަށް އެ ކޮމިޝަންގެ ތަހުގީގުތަކަށް އެއްބާރުލުން ދެއްވާނެ ކަމަށެވެ. މަރާލާފައިވާ މީހުންނާއި، ގެއްލުވާލާފައިވާ މީހުންގެ މައްސަލަތައް ބަލާ ކޮމިޝަނަށް އޭނާ ހާޒިރު ކުރަނީ ކޮން ސަބަބަކާ ގުޅިގެން ކަމެއް ނޭނގޭ ކަމަށް ޝުމްބާ ވިދާޅުވިއެވެ.
ރާއްޖެއެމްވީއަށް އެނގިފައިވާ ގޮތުގައި ޝުމްބާ އެ ކޮމިޝަނަށް ހާޒިރު ކުރަނީ އަވަހާރަކޮށްލާފައިވާ އުނގޫފާރު ދާއިރާގެ ކުރީގެ މެމްބަރު ޑރ. އަފްރާޝީމް އަލީ އާއި ގެއްލުވާލާފައިވާ މިނިވަން ނޫހުގެ ނޫސްވެރިޔާ އަހުމަދު ރިލްވާންގެ މަރާ ގުޅޭ ގޮތުން އޭނާ ކޮންފައިވާ ޓްވީޓުތަކާ ގުޅިގެންނެވެ.
ރިޔާސީ ލޯންޗުކޮޅުގައި އެއްޗެއް ގޮވި މައްސަލައާ ގުޅިގެން ކަމަށް ބުނެ، ރައީސް ޔާމީންގެ ވެރިކަމުގައި ޝުމްބާ ހައްޔަރު ކުރިއެވެ. ސްރީލަންކާގައި އޭނާ ހުއްޓާ ހައްޔަރުކޮށްގެން ރާއްޖެ ގެނެސް، ހުކުމް ނުކޮށް، ތިން އަހަރާއި އެއްމަހާއި 22 ދުވަސް ވަންދެން އޭނާ ބަންދުކޮށްފައި ބެހެއްޓިއެވެ.
މަރާލާފައި އޮއްވާ ފެނުނު ބްލޮގަރު ޔާމީން ރަޝީދަށް 2011 ވަނަ އަހަރާއި 2012 ވަނަ އަހަރު ދީފައިވާ އިންޒާރުތަކާ ގުޅިގެން، ޕީޕީއެމް ކައުންސިލްގެ ކުރީގެ މެމްބަރު ޒާހިދު ރަމީޒު ވެސް މިދިޔަ ހަފްތާގައި ވަނީ ރިޔާސީ ކޮމިޝަނަށް ހާޒިރުކޮށް، ބަޔާން ނަގާފައެވެ.
ގޮތް ނޭނގޭ ގޮތަށް މަރާލާފައިވާ މީހުންނާއި ގެއްލިފައިވާ މީހުންގެ މަރުތައް ބަލައި އިންސާފު ހޯދައި ދިނުމަށް ރައީސް ސޯލިހު އުފެއްދެވި ރިޔާސީ ކޮމިޝަނުން ބަލަނީ 25 މަރެއްގެ މައްސަލައެވެ. އެ ކޮމިޝަނުން ތަހުގީގު ކުރަނީ 2012 ވަނަ އަހަރުން ފެށިގެން 2018 ވަނަ އަހަރުގެ ނިޔަލަށް ހިނގާފައިވާ މަރުގެ މައްސަލަތަކެވެ.
ޔާމީނަށް ޒާހިރު އިންޒާރު ދިން މައްސަލަ ނިމިދިޔަ ސަރުކާރުގައި ފުލުހުންނަށް ހުށަހެޅިއެވެ. ނަމަވެސް އެ މައްސަލަ ތަހުގީގު އޮތް ހިސާބެއް ފުލުހުން ނުބުނެއެވެ.
