ކައުންޓަރ ޓެރަރިޒަމް އެވެއަރނަސް ވޯރކްޝޮޕެއް ފަށައިފި

މޯލްޑިވްސް ޕޮލިސް ސާރވިސް އިން އިސްނަގައިގެން ކައުންޓަރ ޓެރަރިޒަމް އެވެއަރނަސް ވޯރކްޝޮޕެއް ފަށައިފި އެވެ.

ފުލުހުންނާއި، ޓޫރިޒަމް މިނިސްޓްރީ އަދި ޔޫކޭގެ "އިންޓަރނޭޝަނަލް ޕްރޮޓެކްޓް އެންޑް ޕްރިޕެއަރ މޯލްޑިވްސް" އާ ގުޅިގެން ކުރިއަށް ގެންދާ މި ވޯރކްޝޮޕް ބުދަ ދުވަހު ފަށާފައިވާއިރު، ވޯރކްޝޮޕް ހުޅުވުމުގެ ރަސްމިއްޔާތު ޝަރަފުވެރިކޮށްދެއްވީ އެސިސްޓެންޓް ކޮމިޝަނަރ އޮފް ޕޮލިސް އިސްމާއިލް ނަވީނެވެ. އޭގެ އިތުރުން، ޗީފް އިންސްޕެކްޓަރ އޮފް ޕޮލިސް ފާތިމަތު ނަޝްވާ އާއި، އިންޓަރނޭޝަނަލް ޕްރޮޓެކްޓް އެންޑް ޕްރިޕެއަރ މޯލްޑިވްސް ގެ ޕްރޮގްރާމް ކޯޑިނޭޓަރ ސީން ކެލީ ވެސް ބައިވެރިވެ ވަޑައިގެންފައިވާއިރު، ރާއްޖޭގެ ރިސޯޓްތަކާއި، ގެސްޓް ހައުސްތަކާއި، ހޮޓާތަކުގައި މަސައްކަތް ކުރައްވާ ފަރާތްތަކުން ވެސް ބައިވެރިވެފައި ވެއެވެ.

މި ވޯރްކްޝޮޕްގެ މަޤްސަދަކީ ޓެރަރިޒަމްގެ ހާދިސާއެއް ދިމާވެއްޖެ ނަމަ ޓޫރިޒަމް ދާއިރާގައި ސެކިއުރިޓީ މަސައްކަތްކުރައްވާ ފަރާތްތަކަށް އެޅިދާނެ ފިޔަވަޅުތަކާއި، އެކަމާ ކުރިމަތިލާނެ ގޮތްތައް ދަސްކޮށްދިނުމާއި، އެ ދާއިރާގެ ސަލާމަތާއި ރައްކާތެރިކަން އިތުރަށް ކަށަވަރު ކުރުމަށް އެޅިދާނެ ފިޔަވަޅުތައް ދެނެގަތުން ކަމަށް ފުލުހުންގެ މީޑިއާ އިން ބުނެފައި ވެއެވެ.

ކައުންޓަރ ޓެރަރިޒަމް އެވެއަރނަސް ވޯރކްޝޮޕް ފެށުމުގެ ރަސްމިއްޔާތުގެ ތެރެއިން

ފުލުހުންނާއި ޓޫރިޒަމް މިނިސްޓްރީގެ ތަޖުރިބާކާރު ފެސިލިޓޭޓަރުންނާއި، ޔޫކޭ އިންޓަރނޭޝަނަލް ޕްރޮޓެކްޓް އެންޑް ޕްރިޕެއަރ ޕްރޮޖެކްޓުގެ ތަޖުރިބާކާރުންގެ އެހީއާ އެކު ކުރިއަށްގެންދާ މި ވޯރކްޝޮޕަކީ މީގެ ތިން ވަނަ ވޯރކްޝޮޕް ކަމަށް ފުލުހުން މައުލޫމާތު ދެއެވެ. އެގޮތުން ދެ ދުވަހަށް ބަހާލައިގެން މާރޗު 10 އާއި 11 ގައި ވެސް މިފަދަ ވޯރކްޝޮޕްތަކެއް ވަނީ ކުރިއަށް ގެންގޮސްފައެވެ.