ދިވެހި ސިފައިންގެ 127 ވަނަ އަހަރީ ދުވަހުގެ މުނާސަބަތާ ގުޅިގެން ބާއްވާ 23 ވަނަ ސިފައިންގެ ފޮޓޯ މައުރަޒު ކުޑަކުދިންގެ ހަވީރަކާ އެކު ހުޅުމާލެ ރެހެންދި ސްކޫލްގައި ބާއްވާ ގޮތަށް ހަމަޖެހިއްޖެއެވެ.

އެމްއެންޑީއެފްގެ މީޑިއާ އޮފިޝަލް ރާއްޖެއެމްވީއަށް މައުލޫމާތު ދެއްވަމުން ވިދާޅުވީ މި ފޮޓޯ މައުރަޒު ބޭއްވުމަށް ހަމަޖެހިފައިވަނީ މި މަހުގެ 18 ވާ ބުރާސްފަތި އަދި 19 ވާ ހުކުރު ދުވަހު ކަމަށެވެ. އެމްއެންޑީއެފުން ބުނެފައި ވަނީ އާންމުކޮށް ހުޅުވާލައިގެން ބާއްވާ މި ފޮޓޯ މަޢުރަޒުގައި 1988 ނޮވެމްބަރު ތިން ވަނަ ދުވަހު ރާއްޖެއަށް ކުރިމަތިވި ޢުދުވާނީ ހަމަލާގެ ފޮޓޯތަކާއި، ރައްޔިތުންގެ ފުރާނަޔާ މުދާ ސަލާމަތްކުރުމަށް އަދި ގުދުރަތީ އެކިއެކި ކާރިސާތަކުގައި ސިފައިން ކޮށްފައިވާ ބައެއް މަސައްކަތްތައް ދައްކުވައިދޭ ފޮޓޯތަކާއި، ސިފައިން އިޖުތިމާޢީ ގޮތުން ބައިވެރިވެފައިވާ ހަރަކާތަކުގެ އިތުރުން، ސިފައިންގެ ތާރީޚާއި އަދި ސިފައިންގެ ތަމްރީންތަކާއި ގުޅުންހުރި ގިނަ ފޮޓޯތަކެއް ދައްކާލުމަށް ހަމަޖެހިފައިވާ ކަމަށެވެ.

މި ފޮޓޯ މައުރަޒާ އެކު އެޕްރީލު 19 ވާ ހުކުރު ދުވަހުގެ ހަވީރު 16:00 ން 18:00 އަށް އެމްއެންޑީއެފް މާލެ އޭރިއާގެ ކުޑަކުދިންގެ ހަވީރު ރެހެންދި ސްކޫލުގެ އޯޕަން އޭރިއާގައި ކުރިއަށްގެންދިއުމަށް ހަމަޖެހިފައިވާކަމަށާއި ކުޑަކުދިންގެ ހަވީރުގައި ކުޑަކުދިންނަށް އަމާޒުކޮށްގެން ތަފާތު ކުޅިވަރުތަކާއި ސިފައިން ބޭނުން ކުރާ ބައެއް އުޅަނދުތަކުގައި ފޮޓޯ ނެގުމުގެ އިންތިޒާމް ހަމަޖެހިފައިވާ ކަމަށް އެމްއެންޑީއެފުން މައުލޫމާތު ދެއެވެ. 

މި ފޮޓޯ މައުރަޒު ހުޅުވިފައިހުންނާނީ އެޕްރީލު 18 ވަނަ ދުވަހުގެ ހަވީރު 16:00 ން 18:00 އަށް އަދި ރޭގަނޑު 20:00 ން 22:00 އަށެވެ. އަދި އެޕްރީލު 19 ވަނަ ދުވަހުގެ މެންދުރު ފަހު 14:00 ން 15:00 އަށް، ހަވީރު 16:00 ން 18:00 އަށް އަދި ރޭގަނޑު 20:00 ން 22:00 އަށް ފޮޓޯ މައުރަޒު ހުޅުވުމަށް ވަނީ ހަމަޖެހިފައެވެ.