ޙައްޖަށް މީހުން ގެންދިއުމަށް ޝައުޤުވެރިވާ ފަރާތްތަކަށް ފުރުސަތު ހުޅުވާލައިފި
17 އެޕްރީލު 2019 | ބުދަ 02:59ހުއްދަދިނުމަށް ހަމަޖެހިފައިވަނީ 100 ޕަސެންޓު ދިވެހިންގެ ހިއްސާ އޮންނަ ކުންފުނިތަކަށް
ހައްޖަށް ފުރުމަށް މާލޭގެ ބަނދަރުމަތީގައި ބަޔަކު މަޑުކޮށްލައިގެން
ދިވެހިރާއްޖެއިން ޙައްޖަށް މީހުން ގެންދިއުމަށް ޝައުޤުވެރިވާ ފަރާތްތަކަށް ޕްރޮޕޯޒަލް ހުށަހެޅުމުގެ ފުރުޞަތު ހުޅުވާލައިފި އެވެ.
މިނިސްޓްރީ އޮފް އިސްލާމިކް އެފެއާޒުން ކުރި އިއުލާނެއްގައި ބުނެފައި ވަނީ 1440 ވަނަ އަހަރު ދިވެހިރާއްޖެއިން މީހުން ޙައްޖަށް ގެންދިއުމާ ބެހޭ ގޮތުން 15 އޭޕްރިލް 2019 ގައި ގެޒެޓް ކޮށްފައިވާ "ދިވެހިރާއްޖެއިން ޙައްޖަށް މީހުން ގެންދިއުމާބެހޭ އުސޫލު"ގައިވާ ގޮތުގެ މަތީން އެކަމަށް އެދި ޕްރޮޕޯޒަލް ހުށަހެޅޭނީ، އެ އުސޫލުގައި ބުނެފައިވާ ޝަރުޠު ފުރިހަމަވާ ކުންފުނިތަކަށް ކަމަށެވެ. އަދި ޕްރޮޕޯޒަލް ފޮތާއި، ޕްރޮޕޯޒަލް ހުށަހަޅާ ފަރާތްތަކަށް ދެވޭ މަޢުލޫމާތު ކަރުދާސް 15 އޭޕްރިލް އިން ފެށިގެން މިނިސްޓްރީ އޮފް އިސްލާމިކް އެފެއާޒްގެ ވެބްސައިޓް އިން ލިބެން ހުންނާނެ ކަމަށް ވެސް އިއުލާންގައި ބުނެފައި ވެއެވެ.
ޕްރޮޕޯޒަލް ހުށަހަޅާ ކުންފުނިތަކުން 28 އޭޕްރިލް ވާ އާދިއްދަ ދުވަހުގެ 12:00 ގެ ކުރިން "ދިވެހިރާއްޖެއިން ޙައްޖަށް މީހުން ގެންދިއުމާބެހޭ އުޞޫލު"ގެ 7 ވަނަ މާއްދާގެ (ހ) ގައި ވާ ޕްރޮޕޯސަލް ހުށަހެޅުމުގެ ފީ ދައްކަން ވާނެ ކަމަށް ވެސް އިއުލާންގައި ބުނެފައިވެއެވެ. އަދި ޕްރޮޕޯޒަލް ހުށަހެޅުމުގެ ފީއަކީ 10000 (ދިހަހާސް) ރުފިޔާކަމަށް އިސްލާމިކް މިނިސްޓްރީގެ އިއުލާންގައި ބުނެފައިވެއެވެ.
ހައްޖަށް މީހުން ގެންދިއުމަށް ހުއްދަދިނުމަށް ހަމަޖެހިފައިވަނީ 100 ޕަސެންޓު ދިވެހިންގެ ހިއްސާ އޮންނަ ކުންފުނިތަކަށް އެކަނި އެވެ. ހުއްދައަށް އެދޭ ކުންފުނީގެ ޑިރެކްޓަރުންނަކީ ޖިނާއީ ކުށެއްގައި ހުކުމް ތަންފީޒު ކުރަމުންދާ ނުވަތަ ކޮށްފައިވާ މީހަކަށް ވެގެން ނުވާނެކަމަށް އިސްލާމިކް މިނިސްޓްރީން ވަނީ ކަނޑައަޅާފަ އެވެ.
