މަޖިލީހުގެ ރައީސް ކަމަށް ރޮޒައިނާ ވެސް ޝައުގުވެރިކަން ފާޅު ކުރައްވައިފި

ނަވާރަ ވަނަ ރައްޔިތުންގެ މަޖިލީހުގެ ރައީސް ކަމަށް އެމްޑީޕީ ޕާލަމެންޓްރީ ގްރޫޕުގެ ޑެޕިއުޓީ ލީޑަރު ރޮޒައިނާ އާދަމް ވެސް ޝައުގުވެރިކަން ފާޅު ކުރައްވައިފިއެވެ.

މަޖިލީހުގެ ރައީސް ކަމަށް ޝައުގުވެރިވެވަޑައިގަންނަވާ ކަމަށް ރޮޒައިނާ ވިދާޅުވީ ރާއްޖެޓީވީ "ފަލަސުރުހީ" ޕްރޮގްރާމްގައި ވާހަކަފުޅު ދައްކަވަމުންނެވެ. ރޮޒައިނާ އާއިއެކު މަޖިލީހުގެ ރައީސް ކަމަށް ވާދަ ކުރައްވާ ބޭފުޅުންގެ އަދަދު ވަނީ ހައަކަށް ހަރާފައެވެ.

ރޮޒައިނާ އާއިއެކު މަޖިލީހުގެ ރައީސް ކަމަށް ޝައުގުވެރިކަންފާޅު ކުރައްވާފައިވާ ބޭފުޅުންނަކީ އެމްޑީޕީ ޕާލަމެންޓްރީ ގްރޫޕުގެ ލީޑަރު މުހައްމަދު އަސްލަމާއި، މެދުހެންވޭރު ދާއިރާގެ މެމްބަރު އަލީ އާޒިމާއި، ވިލުފުށީ ދާއިރާގެ ގޮނޑި ކާމިޔާބު ކުރެއްވި ހަސަން އަފީފާއި، މަރަދޫ ދާއިރާގެ މެމްބަރު އިބްރާހިމް ޝަރީފުގެ އިތުރުން މިނިވަން މެމްބަރެއްގެ ގޮތުގައި މަޖިލީހަށް ވާދަ ކުރައްވައި ކާށިދޫ ދާއިރާގެ ގޮނޑި ކާމިޔާބު ކުރެއްވި އަބްދުﷲ ޖާބިރެވެ.

މަޖިލީހުގެ ރައީސް ކަމަށް ޝައުގުވެރިކަން ފާޅު ކުރައްވައި ވާހަކަފުޅު ދައްކަވަމުން ރޮޒައިނާ ވިދާޅުވީ މިދަނޑިވަޅަކީ އަންހެނަކު މަޖިލީހުގެ ރައީސް ކަމަށް ވަޑައިގަތުމަށް ރަނގަޅު ވަގުތެއް ކަމަށެވެ. މަޖިލީހުގެ ނައިބު ރައީސް ކަމަށް އެންމެ ރަނގަޅު ބޭފުޅެއްގެ ގޮތުގައި އައްޔަން ކުރަން އޭނާއަށް ފެންނަނީ ގަލޮޅު އުތުރު ދާއިރާގެ މެމްބަރު އީވާ އަބްދުﷲ ކަމަށް ރޮޒައިނާ ވިދާޅުވިއެވެ.

"އަޅުގަނޑުމެންގެ ޕާޓީން ވާހަކަ ދައްކަމުން މިދަނީ އަންހެނުން ބާރުވެރި ކުރުވުމަށް. ވުމަން އެމްޕަވާމަންޓަށް. އަޅުގަނޑުމެން ސަރުކާރަށް އައިއިރުގައި ރައީސުލްޖުމްހޫރިއްޔާ ވެވަޑައިގެންނެވި ވައުދުތަކުގެ ތެރޭގައި ވެސް އަންހެނުން ބާރުވެރިކުރުވުން އެބަ އޮތް... އެހެންވީމަ އަޅުގަނޑު ގަބޫލު ކުރާ ގޮތުގައި މިއީ ހަމަ ރަނގަޅު ވަގުތެއް އަންހެނަކު މަޖިލީހުގެ ރައީސް ކަމަށް ކުރިމަތިލާން ވެސް. އެހެންވީމަ އެ ޝައުގުވެރިކަން އަޅުގަނޑުވެސް އެބަހުރި،"

ރޮޒައިނާ ވިދާޅުވި ގޮތުގައި މަޖިލީހުގެ ރައީސް ކަމަށް އެމްޑީޕީ ކުރިމަތިލާނެ ބޭފުޅަކު ހޮވުމަށް އެމްޑީޕީ ޕާލަމެންޓްރީ ގްރޫޕުގައި ނަގަން ޖެހޭނީ ސިއްރު ވޯޓެކެވެ. ސަބަބަކީ އެމްޑީޕީ ޕާލަމެންޓްރީ ގްރޫޕުގެ ލީޑަރާއި ޑެޕިއުޓީ ލީޑަރު ވެސް ހޮއްވަވަނީ ސިއްރު ވޯޓަކުން ކަމަށް ވިދާޅުވިއެވެ.

މަޖިލީހުގައި މެދުނުކެނޑި ދެ ދައުރު ފުރިހަމަކޮށް، ތިން ވަނަ ދައުރަކަށް މަޖިލީހަށް އިންތިހާބުވެވަޑައިގެންނެވި ރޮޒައިނާ ވިދާޅުވީ މަޖިލީހުގައި މައިނޯރިޓީގެ އަޑު އިވެންޖެހޭނެ ކަމަށާއި މެޖޯރިޓީ އޮންނަ ޕާޓީން އެ މީހުންގެ އަޑު އަހަންޖެހޭނެ ކަމަށެވެ. މަޖިލީހުގެ ބޮޑު އަގުލަބިއްޔަތެއް އެމްޑީޕީއަށް ލިބުމުން، މަޖިލީހުގެ ބަހުސްތަކުގައި މައިނޯރިޓީއަށް ރަނގަޅަށް ބައިވެރިވެވޭނެ ގޮތްތަކެއް ހެދުމަށް މަޖިލީހުގެ ގަވާއިދަށް އިސްލާހުތަކެއް ގެންނަންޖެހޭ ކަމަށް ރޮޒައިނާ ވިދާޅުވިއެވެ.

"އަޅުގަނޑަށް ގަބޫލު ކުރެވޭ ގޮތުގައި މަޖިލީހުގެ ހިންގުމުގެ ނިޒާމު ހަރުދަނާ ކުރަން އެބަޖެހޭ. އެތަނަކީ އެތަނުގެ ހައިބަތު ވެސް ހިފަހައްޓާ، ރައްޔިތުންގެ އިތުބާރާއި ގަދަރާއި އޮންނަތަނަކަށް. މަޖިލީހުގެ މެމްބަރުންނަށް އިއްޒަތްތެރި މެމްބަރުންނޭ ކިޔުމުން އިއްޒަތްތެރިއެއް ނުވޭ. އިއްޒަތްތެރި ވަނީ އިއްޒަތްތެރި މެމްބަރުންނޭ ބުނާ ގޮތަށް ކަންތައްތައް ބެހެއްޓީމަ،"