ހއ. ހޯރަފުށީގެ އެޅުމަށް ހަމަޖެހިފައިވާ އެއަރޕޯޓް އެޅުމަށް ބޭނުންވާ ބިން ހިއްކަން ފަށައިފިއެވެ.

 ރާއްޖެ އެމްވީއަށް މައުލޫމާތު ދެއްވަމުން ހޯރަފުށީ ކައުންސިލްގެ ނައިބް ރައީސް އިބްރާހިމް ޝާކިރު ވިދާޅުވީ ބިން ހިއްކުމުގެ މަސައްކަތް ފަށާފައި ވަނީ އަންގާރަ ދުވަހު މެންދުރު ކަމަށެވެ.

އަދި މި މަސައްކަތް ނިންމުމަށް ގާތްގަޑަކަށް ދެމަސް ދުވަސް ނަގާނެ ކަމަށް އޭނާ ވިދާޅުވިއެވެ.

މަހާޖައްރާފް އެރަށަށް ދިއުމުން އެރަށުގެ ރައްޔިތުން ވަނީ ފަރިވަޅެއް އަރުވާ އަދި މަހާޖައްރާފުގެ މުވައްޒަފުންނަށް މާފަތިން ހޫނު މަރުހަބާއެއް ކިޔާފައެވެ.

 ރައްޔިތުން ނުކުމު އެއަރޕޯޓް އަޅާ ސަރަހައްދުގައި ލަވައާއި އެކު އުފާފާޅުކޮށް ބޮނޑިބަތް ކެއުން ކުރިއަށް ގެންގޮސްފައިވާ ކަމަށް ޝާކިރު ވިދާޅުވިއެވެ.

ހޯރަފުށީގައި އެއާޕޯޓް މަޝްއުރޫއުގެ އަމަލީ މަސައްކަތް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިޙް ފައްޓަވައިދެއްވައިފައި ވަނީ މިދިޔަ މާރޗް މަހުގެ 31 ވަނަ ދުވަހު އެވެ.

މި މަޝްއުރޫއުގެ އަމަލީ މަސައްކަތް ފައްޓަވައި ދެއްވުމަށް ފަހު ހޯރަފުށީގެ ރައްޔިތުންނާއި ބައްދަލު ކުރައްވާ ވާހަކަފުޅު ދައްކަވަމުން ރައީސް ސާލިހު ވިދާޅުވެފައިވަނީ ހޯރަފުށީގެ އެއާޕޯޓް ހަގީގަތަކަށް ހައްދަވައިދެއްވާނެ ކަމަށެވެ. އަދި ހޯރަފުށީގެ އެއާޕޯޓާ އެކު އުލިގަމުގެ ސިޓީ ހޮޓާ ތަރައްގީ ކުރެވި، މި ސަރަހައްދުގައި ޓޫރިޒަމް ފުޅާވެ ވަޒީފާގެ ފުރުސަތުތައް ތަނަވަސް ވެގެންދާނެ ކަމަށް ވެސް ރައީސް ސޯލިޙް ވިދާޅުވިއެވެ.

އެއާޕޯޓް މަޝްއުރޫއުގެ އަމަލީ މަސައްކަތް ފައްޓަވައި ދެއްވާފައިވާއިރު ހޯރަފުށީގައި އެއާޕޯޓް އެޅުމުގެ އަމަލީ މަސައްކަތް ފެށުމަށްޓަކާ އެމްޓީސީސީއާ އެކު ޓްރާންސްޕޯޓް މިނިސްޓްރީން އެއްބަސްވުމުގައި ސޮއިކޮށްފައި ވަނީ މާރޗް މަހުގެ 25 ވަނަ ދުވަހުގައެވެ.

މިމަޝްރޫއުގެ މަސައްކަތާއި ގުޅޭގޮތުން ރާއްޖެއެމްވީއާއި ވާހަކަ ދައްކަވަމުން އެމްޓީސީސީގެ މެނޭޖިން ޑިރެކްޓަރު ހަސަން ޝާހު ވިދާޅުވެފައިވަނީ

އެއަރޕޯޓް އެޅުމަށް ބިން ހިއްކުމާއި، ރަންވޭ ހެދުމާއި، ޓާރމިނަލްގެ މަސައްކަތް، 240 ދުވަހުގެ ތެރޭގައި ނިންމާނެ ކަމަށެވެ.

 ހޯރަފުށީގައި އަޅަން ނިންމި އެއާޕޯޓަކީ ނިމިދިޔަ ސަރުކާރުން މާފިނޮޅުގައި އަޅަން ނިންމި އެއާޕޯޓެކެވެ.

އާބާދީގައި 3،000 ވުރެ ގިނަ މީހުން ރަޖިސްޓްރީވެފައިވާ ހޯރަފުށީގައި އެއާޕޯޓް އެޅުމުން، އެ ރަށާ ކައިރީގައި އޮތް އިހަވަންދޫއަށް ވެސް ފަސޭހަތަކެއް ލިބިގެންދާނެއެވެ.

އެގޮތުން ލޯންޗުގައި ތިން މިނެޓުން ފަސޭހަކަމާ އެކު އިހަވަންދޫއިން ހޯރަފުށީ އެއާޕޯޓަށް އާދެވޭނެއެވެ. އަދި ހޯރަފުށީ އެއާޕޯޓުގެ ސަބަބުން އެންމެ ބޮޑު ފަސޭހަތަކެއް ވެގެންދާނެ ދާއިރާގެ ދެ ރަށަކީ ތުރާކުނާއި އުލިގަމެވެ.