ދުނިޔޭގެ ތަރިކައިގެ ދުވަހާއި ކުރެހުމުގެ ދުވަސް ފާހަގަ ކުރުމަށް ހަވީރެއް ބާއްވަނީ
15 އެޕްރީލު 2019 | ހޯމަ 06:35ކުޑަކުދިންގެ ކުޅިވަރާއި، ފަންނުވެރީންގެ ހުނަރު ދައްކާނެ
ކުޑަކުދިންނަށް ބޭއްވި ޚާއްސަ ހަވީރެއްގެ ތެރެއިން
ދުނިޔޭގެ ތަރިކައިގެ ދުވަހާއި ދުނިޔޭގެ ކުރެހުމުގެ ދުވަސް ފާހަގަ ކުރުމުގެ ގޮތުން ޚާއްސަ ހަވީރެއް ބޭއްވުމަށް ނިންމައިފިއެވެ.
މިނިސްޓްރީ އޮފް އާޓްސް، ކަލްޗަރ އެންޑް ހެރިޓޭޖުން ބުނީ ހަވީރު ބޭއްވުމަށް ހަމަޖެހިފައި ވަނީ އަންނަ ހޮނިހިރު ދުވަހު ކަމަށެވެ.
މި ހަވީރުގައި ކުޑަކުދިންނަށް ޚާއްސަ ކުޅިވަރާއި ތަފާތު އެކި ފަންނުވެރީންގެ ހުނަރު ދެއްކުމުގެ ތަފާތު ހަރަކާތްތައް އޮންނާނެ ކަމަށް މިނިސްޓްރީން މައުލޫމާތުދެއެވެ.
މީގެ އިތުރުން ހެރިޓޭޖް މިނިސްޓްރީން ބުނީ މި ހަވީރުގައި "ފުޑް ސްޓޯލް"ތަކެއް ބެހެއްޓުމަށް ނިންމާފައިވާ ކަމަށާއި މި ފުޑް ސްޓޯލްތައް ހިންގުމަށް ޝައުގުވެރިވާ ފަރާތްތަކަށް އެކަމަށް އެދުމުގެ ފުރުސަތު ވެސް ހުޅުވަލާފައިވާ ކަމަށެވެ.
މިނިސްޓްރީން ބުނީ ކަނޑައަޅާ އުސޫލެއްގެ ދަށުން ހޮވޭ ފަރާތްތަކުން ހިންގާ މި ފުޑް ސްޓޯލްތަކުގައި މައިގަނޑު ގޮތެއްގައި ވިއްކަން ހުންނަންޖެހޭނީ ދިވެހި ކާނާގެ ބާވަތްތައް ކަމަށެވެ.
ހެރިޓޭޖް މިނިސްޓްރީން ބުނީ މިކަމަށް ޝައުގެވެރިވާ ފަރާތަތަކުގެ ޕްރޮފައިލް އަދި ވިއްކާ ތަކެތީގެ މެނޫ އާއި އަގުތައް، މިމަހު 18 ގެ 14:00 ގެ ކުރިން admin@heritage.gov.mv އަށް ފޮނުވުމަށް އެދޭ ކަމަށެވެ.
