ޑިޖިޓަލް ޓެކްނޮލެޖީގެ ބޭނުން ހިފުމާއިމެދު މިހާރަށްވުރެ ފުޅާ ގޮތެއްގައި ވިސްނަންވެއްޖެ: ރައީސް ސޯލިހް
14 އެޕްރީލު 2019 | އާދީއްތަ 17:51ރާއްޖެ ފަދަ ޖަޒީރާ ޤައުމެއްގެ މުޅި އާބާދީއަށް އެއް ފެންވަރެއްގައި މުވާސަލާތީ ޚިދުމަތްތައް ފޯރުކޮށްދިނުމަކީ ވަރަށް ބޮޑު ގޮންޖެހުމެއް
ރައީސުލް ޖުމްހޫރިއްޔާ އިބްރާހީމް މުހައްމަދު ސޯލިހް
ޒުވާނުންނަކީ އަބަދުވެސް ބަދަލުވުމާއި އައު ކަންތަކަށް ތަރުޙީބުދޭ ބަޔަކަށްވާއިރު، އީޖާދީ އުފެއްދުންތަކަށް ޒުވާނުން އަހުލުވެރި ކުރުވުމުގައި، މިހާރަށް ވުރެ ފުޅާ ގޮތެއްގައި، ޑިޖިޓަލް ޓެކްނޮލޮޖީގެ ބޭނުން ހިފުމާމެދު ވިސްނަންވެއްޖެ ކަމަށް ރައީސުލް ޖުމްހޫރިއްޔާ އިބްރާހީމް މުހައްމަދު ސޯލިހް ވިދާޅުވެއްޖެއެވެ.
ދިރާގު ހައި-ސްޕިޑް ފައިބަރ ބްރޯޑްބޭންޑް ރާއްޖޭގައި %75 އަށް ފޯރު ކޮށްދިނުން ފާހަގަކުރުމަށް އާދިއްތަ ދުވަހު ދަރުބާރުގޭގައި އޮތް ރަސްމިއްޔާތުގައި ވާހަކަ ދައްކަވަމުން ރައީސް ވިދާޅުވީ އެކަމުގައި ދިރާގަށް ވަރަށް އިސް ދައުރެއް އަދާ ކުރެވިދާނެ ކަމަށް ޤަބޫލުފުޅުކުރައްވާ ކަމަށެވެ.
"ޑިޖިޓަލް ޓެކްނޮލަޖީ އަކީ އެއްވެސް އިމެއް، ހިފެހެއްޓުމެއް ނެތި ތަރައްޤީވެ ފައްކާވަމުން އަންނަ ސިނާއަތެއް. ޒުވާނުންނަކީ އަބަދުވެސް ބަދަލުވުމާއި އައު ކަންތަކަށް ތަރުޙީބުދޭ ބަޔަކަށްވާއިރު، އީޖާދީ އުފެއްދުންތަކަށް ޒުވާނުން އަހުލުވެރި ކުރުމުގައި، މިހާރަށް ވުރެ ފުޅާ ގޮތެއްގައި، ޑިޖިޓަލް ޓެކްނޮލޮޖީގެ ބޭނުން ހިފުމާމެދު ވިސްނަންވެއްޖެ. މިކަމުގައި ވެސް ދިރާގަށް ވަރަށް އިސް ދައުރެއް އަދާކުރެވިދާނެ. ރާއްޖޭގެ ތައުލީމީ ނިޒާމުގެ ތެރެއިން ޑިޖިޓަލް ޓެކްނޮލަޖީއަށް ދަރިވަރުން އަހުލުވެރިކުރެވިދާނެ ގޮތްތަކަކީ ކޮބައިތޯ ބަލާ، އެކަން ތަންފީޒު ކުރުމާމެދު ތިބޭފުޅުން ވިސްނުން ހިންގަވާނެ ކަމަށް އަޅުގަނޑު އުންމީދު ކުރަން" ރައީސް ސޯލިހް ވިދާޅުވިއެވެ.
ދިރާގަކީ މުވާސަލާތީ ހިދުމަތާއި ޑިޖިޓަލް ހިދުމަތް ދިނުމުގައި ވަރަށް ފަހުރުވެރި މާޒީއެއް އޮތް ކުންފުންޏެއް ކަމަށާއި ރަށްތަކާއި ބޭރުދުނިޔެއާ ރާއްޖެ ގުޅުވައިދޭ މައި ފާލަމަކީ ދިރާގު ކަމަށް ރައީސް ފާހަގަކުރެއްވިއެވެ.
ރާއްޖެ ފަދަ ޖަޒީރާތަކެއް މައްޗަށް އެކުލެވޭ ޤައުމެއްގެ މުޅި އާބާދީއަށް އެއް ފެންވަރެއްގައި މުވާސަލާތީ ޚިދުމަތްތައް ފޯރުކޮށްދިނުމަކީ ވަރަށް ބޮޑު ގޮންޖެހުމެއް ކަމަށާއި އެ ގޮންޖެހުންތަކާއެކު ވެސް، ދިރާގުން އަންނަނީ، ޒަމާނީ މުވާސަލާތީ ލުއިފަސޭހަކަމާއެކު، އެންމެ ފުރިހަމަ ޚިދުމަތްތައް ފޯރުކޮށްދެމުން ކަމަށް އިތުރަށް ރައީސް ވިދާޅުވިއެވެ.
ދިވެހިންގެ އެންމެހައި ގުޅުންތަކާ ލާމެހިފައިވާ ދިރާގު ކުންފުންޏަކީ، ރަށްރަށުގެ ތަރައްޤީގެ ވަރަށް މުހިންމު ބައިވެރިއެއް ކަމަށާއި ދިރާގަކީ، ރަށްރަށުގެ ވިޔަފާރިތައް ކުރިއެރުމުގައި، ވަރަށް މުހިންމު ދައުރެއް އަދާކުރާ ޚިދުމަތްތެރިއެއް ކަމަށް ރައީސް ފާހަގަކުރެއްވިއެވެ. އަދި ވަކިން ޚާއްސަކޮށް، މާލެއާ ދުރު އަތޮޅުތަކުގައި، ރިސޯޓްތައް ތަރައްޤީ ކުރުމުގައި، ދިރާގުގެ ޚިދުމަތްތައް ވަރަށް މުހިންމު ދައުރެއް އަދާކުރާ ކަމަށް ރައީސުލްޖުމްހޫރިއްޔާ ވިދާޅުވިއެވެ.
"ރައްޔިތުން އުންމީދުކުރާ ހަލުވިމިނުގައި ޚިދުމަތްތައް ދިނުމަށްޓަކައި، ދައުލަތުގެ މުއައްސަސާތަކުން ފޯރުކޮށްދޭ ޚިދުމަތްތައް ޑިޖިޓަލައިޒް ކުރުމަށް ވެސް، މިއަންނަނީ މަސައްކަތް ކުރަމުން. ސަރުކާރުގެ އެ ސިޔާސަތު ތަންފީޒުވެގެންދާއިރު، ވީހާވެސް ގިނަ ރަށްރަށަށް، ހައި ސްޕީޑް އިންޓަރނެޓްގެ ޚިދުމަތް ލިބި، ޑިޖިޓަލް ޚިދުމަތުގެ ފަރަޤު މިހާރަށްވުރެ ވެސް ކުޑަވެގެންދާނެ." ރައީސުލްޖުމްހޫރިއްޔާ ވިދާޅުވިއެވެ.
މި ސަރުކާރުން އަމާޒު ހިފާފައިވަނީ ޑިޖިޓަލް ޓެކްނޮލޮޖީގެ މަންފާ، ވީހާ ގިނަ ރައްޔިތުންނަށް ލިބޭނެ ގޮތަށް، ޑިޖިޓަލް ކޮމިޔުނިކޭޝަންގެ ޚިދުމަތްތައް ރާއްޖޭގެ ހުރިހާ ކަންކޮޅެއްގައި ފުޅާކުރުން ކަމަށް ރައީސް ވިދާޅުވިއެވެ.
