އެރިކްސަންގެ ސޮއި ހޯދަން ސޯލްޝެއާ ބޭނުންވޭ

ޓޮޓެންހަމްއަށް ކުޅެމުން އަންނަ ޑެންމާކްގެ އެޓޭކިން މިޑްފިލްޑަރ ކްރިސްޓިއަން އެރިކްސަންގެ ސޮއި ހޯދަން މެންޗެސްޓާ ޔުނައިޓެޑުގެ ކޯޗު އޮލެ ގުނަ ސޯލްޝެއާ ބޭނުންވާ ކަމަށް ރިޕޯޓްތައް ބުނެފިއެވެ.

ދަ މިރާއިން ބުނީ، ކުރިޔަށް އޮތް ސީޒަނަށް ތައްޔާރުވުމުގެ ގޮތުން އެރިކްސަންގެ ސޮއި ހޯދުމަކީ ޔުނައިޓެޑުގެ ޓާގެޓެއް ކަމަށާއި، އެކަމަށް ބާރު އަޅަނީ ކޯޗު ސޯލްޝެއާ ކަމަށެވެ.

ޓޮޓެންހަމްއާއެކު އެރިކްސަން ހަދާފައިވާ އެއްބަސްވުން މި ސީޒަނަށް ފަހު ހަމަވާއިރު، އޭނާ މި ސީޒަނަށްފަހު އެހެން ކްލަބަކަށް ބަދަލުވާނެ ކަމަށް ބެލެވެއެވެ.

ޔުނައިޓެޑުގެ އިތުރުން ބާސާ އާއި ރެއާލް މެޑްރިޑުން ފާރަލަމުން އަންނަ އުމުރުން 26 އަހަރުގެ އެރިކްސަން ހޯދުމަށް ގިނަ ކްލަބްތަކުން އަންނަނީ މަސައްކަތް ކުރަމުންނެވެ.

އަޔަކްސް އިން 2009 ވަނަ އަހަރު ކެރިޔަރު ފެށި އެރިކްސަން ޓޮޓެންހަމް އަށް ބަދަލުވީ 2013 ވަނަ އަހަރެވެ. އޭނާ ވަނީ މިހާތަނަށް އެޓީމަށް ކުޅުނު 266 މެޗުގައި 64 ލަނޑު ކާމިޔާބު ކޮށްފައެވެ.

ޓޮޓެންހަމްއާ އެކު ލީގް ކަޕްގެ ދެވަނަ 2014 ވަނަ އަހަރުގެ ސީޒަނުގައި ހޯދި އެރިކްސަން ވަނީ ޓޮޓެންހަމްގެ މޮޅު ކުޅުންތެރިޔާގެ މަގާމު ދެ ފަހަރެއްގެ މަތިން ހޯދާފައެވެ.

މީގެ އިތުރުން ހަތަރު ފަހަރު ޑެންމާކްގެ އެންމެ މޮޅު ކުޅުންތެރިޔާގެ މަގާމު ހޯދާފައިވާ އެރިކްސަން ވަނީ ގައުމީ ޓިމަށް ކުޅުނު 87 މެޗުގައި 26 ލަނޑު ކާމިޔާބުކޮށްފައެވެ.