މޯދީގެ ގޮނޑިއަށް ވާދަކުރަން އޭނާއާ ވައްތަރު މީހަކު ނިކުމެއްޖެ!

މިހާރު ކުރިޔަށްދާ އިންޑިއާގެ އާންމު އިންތިހާބުގައި ބޮޑުވަޒީރު ނަރެންދުރަ މޯދީ ވާދަކުރައްވާ އުއްތަރް ޕްރަދޭޝްގެ ވަރަނަސީ ދާއިރާއަށް އޭނާއާ ވައްތަރު މީހަކު ނިކުމެވަޑައިގެންފިއެވެ.

ކުރިން ބީޖޭޕީއަށް ކެމްޕެއިން ކޮށްދޭން އުޅުނު އަބީނަންދަން ޕަތަކް ނަމަކަށް ކިޔާ މީހާ އަމިއްލަ ގޮތުން ވާދަކުރައްވަން ނިންމާފައިވާ އިރު، އޭނާ ބުނީ ހޮވިއްޖެ ނަމަ ބޮޑުވަޒީރުގެ މަގާމަށް ގެންނަން ތާއީދު ކުރާނީ ކޮންގްރެސް ޕާޓީގެ ރާހުލް ގާންދީއަށް ކަމަށެވެ. މޯދީއާ ވައްތަރު ވުމުގެ އިތުރުން އޭނާއާ އެއްގޮތަކަށް ހެދުން އަޅާ އަބީނަންދަން ބުނީ އޭނާއަކީ "ޑަމީ" ކެނޑިޑޭޓެއް ނޫންކަމަށާއި ދެކޮޅީ ހަމައެކަނި މޯދީއާ ކަމަށެވެ.

މި މަހުގެ 26 ވަނަ ދުވަހުގެ ކުރިން އޭނާ ވަރަނާސީ ދާއިރާއަށް ވާދަކުރަން ފޯމް ހުށައަޅާނެ ކަމަށް އަބީނަންދަން ބުނެފައިވާ އިރު، ހުކުރު ދުވަހު އޭނާ ވަނީ މިނިވަން ކެނޑިޑޭޓެއްގެ ހައިސިއްޔަތުން ލަކްނޯ އިން ވެސް ފޯމް ހުށައަޅާފައެވެ.

މޯދީ ނިސްބަތްވެވަޑައިގަންނަވާ ބީޖޭޕީއާ އެކު ކޯލިޝަން ހަދާފައިވާ ރިޕަބްލިކަން ޕާޓީ އޮފް އިންޑިއާގައި ހަރަކާތްތެރިވެފައިވާ އަބީނަންދަން މޯދީއާ އެއްގޮތަށް ހެދެން އެޅުމުގެ އިތުރަށް، ވާހަކަދެއްކުމުގެ އުކުޅުތަކާއި ބަސްމަގު ވެސް ގެންގުޅެނީ އެއްގޮތަކަށެވެ. އަދި ވަރަށް ގިނަ ފަހަރު މަތިން އޭނާ ވަނީ މޯދީ ވެވަޑައިގެންނެވި ވައުދުތަކަށް ވެސް ހަޖޫ ޖަހާފައެވެ. އަދި ބީޖޭޕީ ދޫކޮށް ކޮންގްރެސްއަށް ދާން ޖެހުނީ ވެސް މޯދީ ވެވަޑައިގެންނެވި ވައުދުތައް ފުއްދަވައިދެއްވަން ނުކުޅެދުމުން ކަމަށް ވެސް އޭނާ ވިދާޅުވިއެވެ.

އިންޑިއާގައި މިހާރު ކުރިޔަށްދާ އާންމު އިންތިހާބުގެ ވޯޓުލާން ފަށާފާވާއިރު، މޯދީ އާއި އަބީނަންދަން ވާދަކުރާ ވަރަނަސީގައި ވޯޓުލުމަށް ހަމަޖެހިފައިވަނީ މޭ 19 ވަނަ ދުވަހުގައެވެ. ހަތް ފިޔަވައްސަކަށް ބަހާލައިގެން ކުރިޔަށް ގެންދާ އިންތިހާބުގެ ވޯޓު ގުނަން ފަށަން ހަމަޖެހިފައިވަނީ މޭ 23 ވަނަ ދުވަހުގައެވެ.