އާ އިންޑިއާއަކަށް ވައުދުވަމުން މޯދީގެ ކެމްޕެއިން އިފްތިތާހުކޮށްފި
30 މާރިޗު 2019 | ހޮނިހިރު 05:36ދުވަހަކުވެސް އިންޑިއާ ނުދެކޭހާ ތަރައްގީ ގެނެސްދެއްވާނެ ކަމަށް ވިދާޅުވި
އިންޑިއާގެ ބޮޑުވަޒީރު ނަރެންދުރަ މޯދީ ކެމްޕެއިން އިފްތިތާހު ކޮށްދެއްވުމުގެ ހަފުލާގައި ވާހަކަފުޅު ދައްކަވަނީ
އިންޑިއާ މުޅިން ބަދަލުކޮށްލާނެ ކަމަށް ވައުދުވަމުން، އެ ގައުމުގެ ބޮޑުވަޒީރު ނަރެންދުރަ މޯދީގެ ޕާޓީގެ (ބީޖޭޕީ) ކެމްޕެއިން ރަސްމީކޮށް އިފްތިތާހުކޮށް ދެއްވައިފިއެވެ.
މޯދީ ނިސްބަތްވެވަޑަައިގަންނަވާ ބާރަތިޔަ ޖަނަތާ ޕާޓީ މިފަހަރުގެ އިންތިހާބު ވެސް ކާމިޔާބު ކުރާނެ ކަމަށް ބެލެވިފައިވާ އިރު، މުޅި އިންޑިއާ ދުވަހަކު ވެސް ނުދެކޭހާ ތަރައްގީ ގެނެސްދެއްވާނެ ކަމަށާއި ގައުމުގެ ސަލާމަތާއި ރައްކާތެރިކަން ދަމަހައްޓާނެ ކަމަށް އެމަނިކުފާނު ވަނީ ވިދާޅުވެފައެވެ. މޯދީ މިފަހަރުގެ އިންތިހާބަށް ވެސް ވަރުގަދަ ކޯލިޝަނަކާ އެކު ނިކުމެވަޑައިގަންނާވާ އިރު، އެ ކޯލިޝަނަށް ކުރާ ތާއީދު ވަނީ މިފަހުން ޕާކިސްތާނާ އެކު ފެންމަތިވި ކޯޅުންގަނޑާ ގުޅިގެން އިތުރުވެފައި ކަމަށް މާހިރުން ވަނީ ބުނެފައެވެ.
އުއްތަރް ޕްރަދޭޝްގެ މީރުތްގައި އޮތް ހަފުލާއެއްގައި މޯދީ ވިދާޅުވީ އެމަނިކުފާނުގެ ސަރުކާރަކީ، ހަމައެކަނި ސްލޯގަންތަކެއް ހަދައިގެން މަސައްކަތް ކުރި ބަޔެއް ނޫން ކަމަށާއި ސްލޯގަންގައިވާ ކަންކަން ކުރަމުން އަންނަ ސަރުކާރެއް ކަމަށެވެ. އުއްތަރް ޕްރަދޭޝްއަކީ އެ ގައުމުގެ ގާނޫނު ހަދާ މަޖިލީހުގައި އެއްމެ ގިނަ ގޮނޑި ލިބިފައިވާ ސްޓޭޓެވެ.
ދުނިޔޭގެ އެއްމެ ބޮޑު ޑިމޮކްރެސީ ކަމުގައިވާ އިންޑިއާގެ މިފަހަރުގެ އިންތިހާބުގައި ވޯޓު ލުމުގެ ހައްގު ލިބިގެންވާ 900 މިލިއަން މީހުން އެބަ ތިއްބެވެ. އެކި ފިޔަވަހިތަކަށް ބަހާލައިގެން ބާއްވާ އާއްމު އިންތިހާބުގެ ވޯޓުލުން ނިމޭނީ މޭ 19ވަނަ ދުވަހުގައެވެ. ވޯޓު ގުނަން ފަށާނީ މޭ 23ވަނަ ދުވަހުގައެވެ.
