ލަންކާގައި ވެކްސިން މަދުވެ ދެވައްތަރުގެ ދެ ޑޯޒް ޖެހުމާއި ބެހޭ ދިރާސާއެއް ކުރަނީ

ތަފާތު ދެ ބްރޭންޑެއްގެ ދެ ޑޯޒު ޖެހުމާއި ގުޅޭ ދިރާސާއެއް ކުރަމުންދާކަމަށް ސްރީލަންކާ ސަރުކާރުން ހާމަކޮށްފިއެވެ.

މި ދިރާސާއަކީ އަސްޓަރާޒެނަކާގެ ފުރަތަމަ ޑޯޒް ޖަހާފައިވާ މީހުންނަށް އެހެން ބްރޭންޑެއްގެ ދެވަނަ ޑޯޒެއް ދިނުމުގެ ރައްކާތެރިކަން ކަށަވަރުކުރުމަށް ކުރިއަށްގެންދާ ދިރާސާއެކެވެ. މިކަން ކުރުމަށް ލަންކާ ސަރުކާރުން ނިންމީ އަވައްޓެރި އިންޑިއާގައި ވެކްސިނuގެ ޑިމާންޑު ބޮޑުވެ، ވެކްސިން ތައްޔާރުކުރާ އިންޑިއާގެ ސިރަމް އިންސްޓިޓިއުޓުން އިތުރު ޑޯޒްތައް އުފައްދައި އެތެރެކުރުމުގައި ހުރި ދަތިތަކުގެ ސަބަބުންނެވެ.

ލަންކާގެ ޗީފް އެޕިޑިމިއޯލޮޖިސްޓް ޑރ. ސުދަތު ސަމަރަވީރާ ހާމަކުރައްވާގޮތުގައި އިންޑިއާގައި ކޮވިޑް ބަލިމަޑުކަން ފެތުރިފައިވާ މިންވަރަށް ބަލާއިރު ސިރަމް އިންސްޓިޓިއުޓުން އޯޑަރުކޮށްފައިވާ އަސްޓްރާޒެނަކާ ވެކްސިންގެ މިހާތަނަށް ނުލިބިހުރި ޑޯޒްތައް ކައިރި މުސްތަގުބަލެއްގައި ލިބުމަކީ ވަރަށް ނާދިރުކަމެކެވެ.

އެހެންކަމުން، ލަންކާއިން ވަނީ ވެކްސިންގެ ފުރަތަމަ ޑޯޒްދިން ބްރޭންޑް ފިޔަވައި އެހެން ބްރޭންޑެއްގެ ދެވަނަ ޑޯޒް ދިނުމަކީ ކުރެވިދާނެ ކަމެއްތޯ ބެލުމަށް ދިރާސާއެއް ފަށާފައެވެ.

ޗައިނާއިން އުފައްދާ ސިނޮފާމް ވެކްސިން މިހާރު ލަންކާއަށް އެތެރެކޮށްފައިވާއިރު، އެ ވެކްސިން ޖަހަން ފެށުމުގެ ހުއްދަ ލަންކާގެ ރައްޔިތުންނަށް އަދި ދީފައެއްނުވެއެވެ. މީގެއިތުރުން، ރަޝިޔާގެ ސްޕަޓްނިކް ވެކްސިން ވެސް ލަންކާއަށް ވަރަށް އަވަހަށް އެތެރެކުރުމަށް ހަމަޖެހިފައިވެއެވެ.

ސްރީލަންކާގެ 900،000 އަށްވުރެ ގިނަ މީހުން މިހާތަނަށް އަސްޓްރާޒެނަކާގެ ފުރަތަމަ ޑޯޒް ފުރިހަމަކޮށްފައިވެއެވެ.