ހުކުރު ދުވަހު އިންޑިޔާގައި 22.6 މިލިއަން މީހުން ވެކްސިން ޖަހައި ރިކޯޑެއް ހަދައިފިއެވެ.

މިއީ އިންޑިޔާގައި ދުވާލެއްގެ މައްޗަށް އާންމުކޮށް ވެކްސިން ޖަހާ އަދަދަށްވުރެ ތިން ގުނަ އިތުރު އަދަދެކެވެ. ގިނަ އަދަދެއްގެ ބަޔަކު ވެކްސިން ޖެހުމަށް ބާރު އެޅުމުގެ ގޮތުން ބައެއް ސްޓޭޓްތަކުގައި ވަނީ އެގައުމުގެ ބޮޑުވަޒީރު ނަރެންދްރަ މޯދީގެ އުފަންދުވަހާ ގުޅުވައި ޚާއްސަ ހަރަކާތްތައް ކުރިޔަށް ގެންގޮސްފައެވެ. މޯދީގެ އުފަންދުވަހަކީ ސެޕްޓެމްބަރ މަހުގެ 17 ވަނަ ދުވަހެވެ.

އިންޑިޔާގެ ހެލްތު މިނިސްޓަރ ވިދާޅުވީ ވެކްސިން ޖެހުމުގެ އައު ރިކޯޑަކީ މޯދީގެ އުފަންދުވަހުގެ ހަދިޔާކަމަށެވެ. އިންޑިޔާއަށް މިއަހަރުގެ އޭޕްރީލް މަހާއި މެއި މަހު ކުރިމަތިވި ކޮވިޑްގެ ނުރައްކާތެރި ދެ ވަނަ ރާޅުގެ ސަބަބުން މޯދީއަށް ވަނީ ގިނަ ބަޔެއްގެ ފާޑުކިޔުންތައް އަމާޒުވެފައެވެ.

ވެކްސިން ޖެހުމުގެ އައު ރިކޯޑެއް ގާއިމުވުމާއެކު މޯދީ ވަނީ ޓްވިޓަރގައި އެކަން ހާމަކުރައްވާ ހުކުރު ދުވަހު ވެކްސިން ޖެހި މީހުންގެ އަދަދަކީ ކޮންމެ އިންޑިޔާ ރައްޔިތަކުވެސް ފަޚުރުވެރިވާނެ އަދަދެއްކަމަށް ވިދާޅުވެފައެވެ. އަދި ކޮވިޑް-19 ފުހެލުމަށްޓަކައި ވެކްސިން ޖެހުން އިތުރުކުރުމަށް ވަނީ ގޮވާލައްވާފައެވެ.

އިންޑިޔާގައި އެއްދުވަހާ އެންމެ ގިނަ މީހުން ވެކްސިން ޖަހައިގެން އެންމެ ފަހުން ރިކޯޑެއް ހަދާފައިވަނީ އޮގަސްޓް މަހުގެ 31 ވަނަ ދުވަހުއެވެ. އެދުވަހު 14.1 މިލިއަން މީހުން ވެކްސިން ޖަހާފައިވެއެވެ.

އިންޑިޔާގައި ފާއިތުވި ދުވަސްތަކުގައި ވެކްސިން ޖަހާ މީހުންގެ އަދަދު ވަނީ ބޮޑުތަނުން އިތުރުވެފައެވެ. އެއީ ސެރަމް އިންސްޓިޓިއުޓުން އުފައްދަމުން އަންނަ އެސްޓްރަޒެނިކާ ވެކްސިން އުފައްދާ މިންވަރު އިތުރުކޮށްފައިވާތީއެވެ. ސެރަމް އިންސްޓިޓިއުޓުން މިމަހު އެކަނިވެސް 200 މިލިއަން ޑޯޒް އިންޑިޔާއަށް ފޯރުކޮށްދޭނެއެވެ. މިދިޔަ މަހު ސެރަމް އިން ވަނީ 150 މިލިއަން ޑޯޒް ފޯރުކޮށްދީފައެވެ.

މީގެއިތުރުން މިމަހުގެ ތެރޭގައި އިންޑިޔާގެ ބަހާރަތު ބައޯޓެކުން 35 މިލިއަން ޑޯޒްގެ ކޮވެކްސިން ވެކްސިން ފޯރުކޮށްދޭނެއެވެ.

އިންޑިޔާގައި މިވަގުތު އެންމެ އިސްކަމެއްދީގެން ކުރަމުން އަންނަ ކަމަކީ ވެކްސިން ޖެހުމެވެ. އިންޑިޔާގެ އެތެރޭގައި ވެކްސިން ލިބުން ދަތިވުމާއި ގުޅިގެން އެގައުމުން ވަނީ އޭޕްރީލް މަހުން ފެށިގެން އެހެން ގައުމުތަކަށް ވެކްސިން ފޯރުކޮށްދިނުން މަޑުޖައްސާލާފައެވެ. އިންޑިގާއި މިހާރު އަހަރެއްގެ މައްޗަށް 2 ބިލިއަން ޑޯޒް އުފެއްދުމުގެ ގާބިލްކަން އެބަހުއްޓެވެ. އިންޑިޔާއަކީ އެންމެ ގިނަ އަދަދަކަށް މެދު ފަންތީގެ ގައުމުތަކަށް ވެކްސިން ފޯރުކޮށްދޭ ގައުމެވެ.

އިންޑިޔާގެ 1.35 ބިލިއަން މީހުންގެ ތެރެއިން 792 މިލިއަން މީހުން ވަނީ ވެކްސިން ޖަހާފައެވެ.

އިންޑިޔާއިން ވަނީ 62 އިންސައްތަ މީހުންނަށް ވެކްސިންގެ ފުރަތަމަ ޑޯޒް ދީފައެވެ. އަދި ދެ ޑޯޒް 21 އިންސައްތަ މީހުންނަށް ވަނީ ދީފައެވެ. އިންޑިޔާއިން މަސައްކަތްކުރަމުން އަންނަނީ އަންނަ މަހުގެ މެދެއްހާ ހިސާބަށް ދާއިރު ހުރިހާ ބޮޑެތި މީހުންނަށް ވެކްސިންގެ ފުރަތަމަ ޑޯޒް ދިނުމަށެވެ.

އިންޑިޔާއިން މިހާތަނަށް 33.8 މިލިއަން މީހުންނަށް ވަނީ ކޮވިޑް ޖެހިފައެވެ. އަދި 444،248 މީހުން ވަނީ މިބަލީގައި މަރުވެފައެވެ.