ތިން އަހަރުގެ މެދުކެނޑުމަކަށްފަހު އދ.ގެ އިންސާނީ ހައްގުތަކާބެހޭ ގޮނޑިއަށް އެމެރިކާ

ތިން އަހަރުގެ މެދު ކެނޑުމަކަށްފަހު އދގެ އިންސާނީ ހައްގުތަކާބެހޭ ކައުންސިލުގެ ގޮނޑިއެއް އަނެއްކާވެސް އެމެރިކާއަށް ލިބިއްޖެއެވެ.

ތިން އަހަރަށްފަހު އެ ކައުންސިލްގެ ގޮނޑިއެއް އެމެރިކާއަށް ލިބުނުއިރު އެ ކައުންސިލަކީ 47 މެންބަރު ގައުމުގެ މައްޗަށް އެކުލެވޭ ކައުންސިލެކެވެ. 2018ވަނަ އަހަރުގެ ތެރޭގައި އިންސާނީ ހައްގުތަކާބެހޭ ކައުންސިލުން އެމެރިކާ ވަކިވެފައިވަނީ އިސްރާއީލާމެދު ތަފާތުކުރުން ގެންގުޅޭކަމަށް ބުނެ ހިތްހަމަނުޖެހުން ފާޅުކުރަމުންނެވެ.

އިސްރާއީލާމެދު ތަފާތުކުރުން ގެންގުޅޭކަމަށް ބުނެ އެމެރިކާގެ ގާނޫނުހަދާ މަޖިލީހުންވެސް ވަނީ އިންސާނީ ހައްގުތަކާބެހޭ ކައުންސިލަށް ވަރަށް ބޮޑަށް ފާޑުކިޔައިފައެވެ. ނަމަވެސް އެމެރިކާއަށް އެންމެ ފައިދާވާނީ އިންސާނީ ހައްގުތަކާބެހޭ ކައުންސިލުގައި އެ ގައުމުގެ ބައިވެރިވުން އޮތުމުން ކަމަށް އެ ގައުމުގެ ރައީސް ޖޯ ބައިޑަން ގެންދަވަނީ ވަކާލާތުކުރައްވައެވެ. އިންސާނީ ހައްގުތަކާބެހޭ ކައުންސިލުގެ ގޮނޑިއަކަށް އެމެރިކާ އިންތިޚާބުވުމުން އަންނަ އަހަރު ފެށުމަށް ހަމަޖެހިފައިވާ އެ ކައުންސިލުގެ އައު ދައުރުގައި އެ ގައުމުން ބައިވެރިވާނެއެވެ. އދގެ އިންސާނީ ހައްގުތަކާބެހޭ ކައުންސިލުގެ ބައްދަލުވުންތައް ބާއްވަނީ ސުވިޒަލޭންޑުގެ ޖެނީވާގައެވެ.