ކުރެހުންތެރިޔާ ޒުލައިހާ އަލީގެ ''އަ ވަލްނިރަބަލް ބިއުޓީ: މޯލްޑިވްސް'' މައުރަޒު ހުޅުވައިފި

ކުޅަދާނަ ކުރެހުންތެރިޔާ ޒުލައިހާ އަލީގެ "އަ ވަލްނިރަބަލް ބިއުޓި: މޯލްޑިވްސް" މައުރަޒު ހުޅުވައިފިއެވެ.

ހުކުރު ދުވަހުގެ ރޭ ނެޝަނަލް އާޓް ގެލަރީގައި އޮތް ހަފުލާއެއްގައި މައުރަޒު ރަސްމީކޮށް ހުޅުއްވައިދެއްވީ ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހުއެވެ. މި ރަސްމިއްޔާތުގައި ރައީސް ސޯލިހުގެ އަނބިކަނބަލުން ފަޒްނާ އަހުމަދުގެ އިތުރުން މިނިސްޓަރ އޮފް އާޓްސް، ކަލްޗަރ އެންޑް ހެރިޓޭޖް ޔުމްނާ މައުމޫން ވެސް ބައިވެރިވަޑައިގެންނެވިއެވެ.

މައުރަޒު ހުޅުއްވައިދެއްވުމަށް ފަހު ރައީސްގެ ދެކަނބަލުން އަދި މިނިސްޓަރ ޔުމްނާ ވަނީ ޒުލައިހާގެ ކުރެހުންތައް ބައްލަވާލައްވާފައެވެ. މި މައުރަޒަކީ ނެޝަނަލް ސެންޓަރ ފޯރ އާޓްސް އާއި މިނިސްޓްރީގެ ވެސް އެއްބާރުލުމާ އެކީގައި ބާއްވާ މައުރަޒެކެވެ.

ދެ ދުވަހުގެ މުއްދަތަށް ހުޅުވާލައިގެން ކުރިޔަށް ގެންދާ މައުރަޒުގައި ފެނިގެން ދަނީ ޒުލައިހާ އަލީގެ އަމިއްލަ ކުރެހުންތައް އެކަންޏެވެ. މި މައުރަޒުގައި ފެނިގެންދާ ކުރެހުންތަކަކީ ރާއްޖޭގެ ނާޒުކު ގުދުރަތީ މާހައުލުގައި ފެންނަން ހުރި މަންޒަރުތަށް ދައްކުވައިދޭ ކުރެހުންތަކެކެވެ.