ރައްޔިތުންގެ މަޖިލީހުގެ ބިލެތްދޫ ދާއިރާގެ މެމްބަރު އަޙުމަދު ޙަލީމް (ދޮންބިލެތް) އަށް، ފ. ފީއަލީ ޕީޕީއެމް-ޕީއެންސީ މެމްބަރުން ހުރަސްއަޅައިފިއެވެ.
ކުރިއަށް އޮތް ރައްޔިތުންގެ މަޖިލީހުގެ އިންތިޚާބުގެ ކެމްޕެއިނަށް މެމްބަރު ޙަލީމް ހޮނިހިރު ދުވަހު ފީއައްޔަށް ވަޑައިގެންނެވުމުން، ޕީީޕީއެމްގެ އިސް ފަރާތްތަކާއި، އާންމު މެމްބަރުން ވަނީ ހުރަސްއަޅައިފައެވެ.
އޭގެތެރޭގައި މި ސަރުކާރުން ފީއަލީ ޞިއްޙީ މަރުކަޒުގެ ސީނިއަރ އެޑްމިނިސްޓްރޭޓަރ ހެލްތު ސަރވިސްގެ މަގާމަށް ހަމަޖައްސާފައިވާ މުޙައްމަދު ޝިފާއުއާއި ފީއަލީ ޒުވާނުންގެ މަރުކަޒު ހިންގުމަށް ހަމަޖައްސާފައިވާ މުޙައްމަދު ޢާމިރު ހިމެނެއެވެ. އެ ފަރާތްތައް އިސްވެ ވަނީ މެމްބަރު ޙަލީމަށް ހުރަސްއަޅައި، އަދި ކެމްޕެއިން ހަރަކާތަށްވެސް ހުރަސްއަޅައިފައެވެ. ނަމަވެސް ފުލުހުން މެދުވެރިކޮށް ފަހުން ވަނީ އެކަން ހުއްޓުވައިފައެވެ.
މެމްބަރު ޙަލީމްގެ ކެމްޕެއިންގައި އިސްކޮށް އުޅުއްވާ ބޭފުޅަކު އެކަމާ ގުޅޭގޮތުން ރާއްޖެއެމްވީއާ ވާހަކަދައްކަވަމުން ވިދާޅުވީ، ސަރުކާރު ޕާޓީގެ އަމަލަކީ އެއްވެސް ވަރަކަށް ބަލައިގަނެވޭނެ ކަމެއް ނޫންކަމަށެވެ. އަދި ހަމަހަމަ ކަމާއެކު ކެމްޕެއިން ކުރުމުގެ ފުރުސަތު އޮންނަން ޖެހޭނެ ކަމަށާއި، ކެމްޕެއިނަށް ހުރަސްއަޅައިގެން ނުވާނެކަމަށެވެ.
