ސިވިލް ކޯޓުގެ އިސްގާޒީ އަބްދުﷲ އަލީގެ ސުލޫކީ މައްސަލަ ސާބިތެއް ނުވި
އެ މައްސަލަ ސާބިތު ނުވާކަމަށް 31 މެއި 2021 ގައި ކޮމިޝަނުން ނިންމާފައިވޭ
ސިވިލް ކޯޓުގެ އިސްގާޒީ އަބްދުﷲ އަލީ
ސިވިލް ކޯޓުގެ އިސްގާޒީ އަލްއުސްތާޒު އަބްދުﷲ އަލީއާ ގުޅިގެން ޖުޑީޝަލް ސަރވިސް ކޮމިޝަން (ޖޭއެސްސީ) އިން ތަހުގީގު ކުރި ސުލޫކީ މައްސަލަ ސާބިތުނުވާކަމަށް ނިންމައިފިއެވެ.
ސިވިލް ކޯޓުގެ އިސްގާޒީ އަލްއުސްތާޒު އަބްދު ﷲ އަލީއާ ގުޅިގެން ބަލާފައިވާ މައްސަލައަކީ ސިވިލް ކޯޓަށް ހުށަހެޅިފައިވާ މައްސަލައެއްގައި ދައުވާކުރާ ފަރާތުގެ ބަދަލުގައި ކޯޓަށް ހާޒިރުވުމަށް ޢައްޔަން ކޮށްފައިވާ ފަރާތް ކޯޓަށް ހާޒިރު ނުކޮށް މައްސަލަ ބާތިލު ކޮށްފައިވާ ކަމަށް ބުނާ މައްސަލައެކެވެ. މި މައްސަލަ ތަހުގީގު ކުރުމަށް ކޮމިޓީއެއް އެކުލަވާލައި އެ މަސައްކަތް ފަށާފައިވަނީ 17 ޖޫން 2020 ގައެވެ.
މި މައްސަލަ ތަހުގީގު ކުރުމަށްފަހު ޖޭއެސްސީން ހޮނިހިރު ދުވަހު ނެރުނު ބަޔާނެއްގައި ބުނީ، އެ މައްސަލަ ސާބިތު ނުވާކަމަށް 31 މެއި 2021 ގައި ކޮމިޝަނުން ނިންމާފައިވާ ކަމަށެވެ.
ޖޭއެސްސީން ދާދި ފަހުން ވަނީ ފެމިލީ ކޯޓުގެ ގާޒީ ހުޒައިފާ މުހައްމަދާ ގުޅޭ ގޮތުން ބެލި މައްސަލަވެސް ސާބިތުނުވާކަމަށް ނިންމާފައެވެ.
