ފަނޑިޔާރު ހަސަން އަލީގެ މައްސަލައެއް ޖޭއެސްސީން ބަލަނީ
އައްޔަން ކޮށްފައިވަނީ މިދިޔަ އަހަރު
ހަސަން އަލީ ފަނޑިޔާރުކަމުގެ ހުވާ ކުރުމުގެ ރަސްމިއްޔާތުގެ ތެރެއިން
ފަނޑިޔާރު ހަސަން އަލީގެ މައްސަލަ އެއް ޖުޑީޝަލް ސަރިވިސް ކޮމިޝަން (ޖޭއެސްސީ) އިން ބަލަން ފަށައިފިއެވެ.
ބުދަ ދުވަހު ޖޭއެސްސީން ނެރުނު ބަޔާނެއްގައި ބުނީ، ހަސަން އަލީއާ ބެހޭ ގޮތުން އެ ކޮމިޝަނަށް މައްސަލައެއް ހުށައެޅި އެ މައްސަލަ ބަލަން ހަމަޖެހިފައިވާ ކަމަށެވެ. ކުރިން ހުށައެޅިފައިވާ މައްސަލައަކާއި އެކު އޭނާގެ ދެ މައްސަލައެއް އެ ކޮމިޝަނުން ދަނީ ބަލަމުންނެވެ.
ޖޭއެސްސީން ބުނީ، މައްސަލަ ބެލުމަށް އެކުލަވައިލާފައިވާ ކޮމިޓީއަށް އަލަށް ހުށަހެޅުނު މައްސަލަވެސް ހުށައަޅަން ނިންމާފައިވާ ކަމަށެވެ.
ހަސަން އަލީގެ މައްސަލަ އެއް ބަލަން ނިންމާފައިވާކަމަށް ޖޭއެސްސީން ބުނެފައިވާއިރު، އޭނާ އިމިގްރޭޝަންގެ ކޮންޓްރޯލަރއަކަށް ހުންނެވިއިރު މަރާލާފައިވާ މިނިވަން ނޫހުގެ ނޫސްވެރިޔާ އަހުމަދު ރިލްވާނު ސީރިއާއަށް ގޮސް މަރުވެފައިވާކަން ދެއްކުމުގެ ގޮތުން ފުލުހުންގެ އިންޓެލިޖެންސް ދެ އޮފިސަރުން ރިލްވާނުގެ ޕާސްޕޯޓް ހޯދަން ހަސަން އަލީ ގާތުގައި އެދިފައިވާ ކަމަށް އޭނާ ރިޔާސީ ކޮމިޝަނަށް މައުލޫމާތު ދީފައިވާ ކަމަށް ކޮމިޝަންގެ ރައީސް ހުސްނުއްސޫދު ވަނީ ވިދާޅުވެފައެވެ. އަދި ފަނޑިޔާރު ހަސަން އަލީ އާއި ގުޅޭގޮތުން ބަލަމުންގެންދަނީވެސް އެ މައްސަލަކަން ކޮމިޝަނުން ވަނީ ކަށަވަރުކޮށްދެއްވާފަ އެވެ.
ޖޭއެސްސީ ބުންީ ފަނޑިޔާރު ހަސަން އަލީ އާއި ގުޅޭގޮތުން ބަލަމުންގެންދަނީ ރިޔާސީ ކޮމިޝަނަށް ދެއްވި ބަޔާނާއި ގުޅޭ މައްސަލައެއް ކަމަށެވެ.
ހައިކޯޓުގެ ފަނޑިޔާރު ކަމަށް ހަސަން އަލީ އައްޔަން ކޮށްފައިވަނީ މިދިޔަ އަހަރުގެ މާޗް މަހުއެވެ. އޭނާ ވަނީ މީގެ ކުރިން އިމިގްރޭޝަން ކޮންޓްރޯލާގެ މަގާމާއި އާސަންދަ ކުންފުނީގެ މޭނޭޖިން ޑިރެކްޓަރުގެ މަގާމުގެ އިތުރުން ހައުސިން މިނިސްޓްރީގެ ނައިބުކަން ވެސް ކުރައްވާފައެވެ.
